​Гиириин спортын одон - Василий Недорезов

Манай Д.Ж. Жанаевай нэрэмжэтэ Хориин нэгэдэхи дунда һургуулиһаа гараһан бэлигтэй бэрхэ хүбүүд, басагадолон даа. Тэдэнэй нэгэн Хори нютагһаа гараһан угтай, Буряад ороноо, тоонто нютагаа, түрэл һургуулияа угаа холо ойгуур суурхуулһан, спортдо ехэхэн хубитаяа оруулһан тамиршан Василий Недорезов тухай бэшэхэ хүсэлтэйб. Ажалша, хүндэтэй бүлын Сергей ба Светлана Недорезовтэнэй табан үхибүүдэйнь одхон хүбүүн Василий хадаа Буряад Республика дотороо ба гадаадын оронуудаар мэдээжэ болонхой юм.

Василий Недорезов 1992 оной, октябриин зургаанда Хориин аймагай Георгиевко нютагта түрөө юм. Хориин 1-дэхи һургуули амжалтатай дүүргэһэнэй һүүлээр, Улаан-Үдэдэ, Зүүн Сибириин технологическа университедэй «Бытовые машины и приборы» гэһэн мэргэжэлээр оюутан болонхой һуража байна. Эсэгынгээ мэргэжэл һайхашаажа, баһал угаа дамжан инженер-механик болохо һанаатай. 6-дахи курсын заочно таһагта ороод, мүнөө сагта контрактаар Улаан-Үдэдэ сэрэгэй алба хэнэ.

Эжы абаһаань, түрэлхидһөөнь, нүхэдһөөнь, багшанарһаань Василий ямархан зантай хүбүүн бэ гэжэ һураа һаатнай, нэгэ доро иигэжэ харюусахал даа: түбшэн даруу зантай, олон үгэгүй, томоотой, өөрыгөө биб гэжэ үлүү табидаггүй, ямаршье хүнүүдээр тон һайнаар харилсажа шадаха харюусалгатай, үнэн сэхэ зантай юм даа. Һанаһандаа заатагүй хүрэдэг, шанга зоригтой, хэды оло дахин илалта туйлабашье, зогсонгүй дабшажал ябаха. Минии буряад хэлэнэй хэшээлнүүдтэ Василий ябадаг байһан юм. “Гансал урагшаа эрмэлзэлһэн хараа бодолтой”, - гэжэ эжынь энеэбхилэн, омогорхолтойгоор хэлээ һэн даа.

Василий эхин классһаа спортоор бэеэ һорижо эхилээ. 2006 ондо ахайнь гиириин секцидэ дүү хүбүүгээ өөрынгөө тренертэ асаржа бэшүүлээ һэн. Тэрэ гэһээр лэ, Василиин ажабайдалда спорт шухала һуури эзэлдэг. Мүнөө Василий Недорезов Буряад ороной гиириин спортын одон болонхой. Василий Недорезовэй тренернүүдынь Н.Г.Стрекаловский болон А.А.Рассадин гээд һорилго хэнэд. Василиин амжалта удааншье хүлеэгдээгүй, тэрэ республиканска турнирта 2-дохи һуурида гаража, мүнгэн медальтай болоо. «Амжалта туйлахын тула нэтэрүүгээр зүдхэн ажаллаха хэрэгтэй, харин энэнь Васида бии» - гэжэ Н.Г. Стрекаловский тренерынь хэлэнэ.

2008 ондо Василий рекорд табижа, гурба дахин Россиин чемпион (Кирово-Чепецк хотодо) болоо һэн. Эндэ Россиин 22 регионһоо тамиршад хабаадаһан байна. Тэндэ командатаяа Буряад оронойхид 1-дэхи һуурида гараа. Энэл жэлдэ Россиин чемпиониие уласхоорондын мүрысөөндэ Эстони гүрэн уриһан юм. Мүрысөөн Йыгева хотодо, апрель һарада үнгэрөө. Эндэ 80 тамиршад 12 гүрэнһөө хабаадаа. Россиин командын бүридэлдэ Буряад оронһоо хоёр лэ хүн ошоһон лэ байна. Наһаараа эгээл залууниинь байба. 58 кг шэгнүүр соо 16 кг гиирь арба минутын туршада 113 дахин үргэжэ, дэлхэйн ба Европын чемпионой нэрэ зэргэдэ хүртэбэ. Мүн Буряадайнгаа 4 дахин чемпион болоһон юм. Хориин, Хэжэнгын, Яруунын, Загарайн аймагуудай Сурхарбаанай һайндэрнүүдтэ мүрысэжэ, нэгэдэхи һуури оло дахин эзэлһэн юм.

Гэртэнь гоё һайхан буланда хамаг медальнууд, дипломуудынь, мүрысөөнэй фото-зурагууд, кубогууд тахяатай байдаг.

2010 ондо «Лучшие выпускники школ, лицеев и гимназий Бурятии» гэһэн ном соо Василий Недорезов оронхой.

2010 ондо Латвиин Вентспилс хотодо алтан, 2011 ондо Челябинск хотодо мүнгэн, Черепаново хотодо хүрэл медальнуудаар шагнагдаа.

2013 ондо Ирланди гүрэнэй Вексфорд хотодо, Тюмень хотодо Бүхэдэлхэйн ба Европын чемпионадуудта алтан медальнуудта хүртөө

бэлэй.

2015 оной ноябрь һарада Улаан-Үдэдэ гиириин спортоор хоёрдохиёо боложо байһан бүхэроссиин мүрысөөндэ хэдэн алтан медаль абажа шадаа. Дүнгүүдээр Буряад ороной

команда 1-дэхи һуурида гараа бэлэй.

2015 оной февралиин 24-дэ Василий Недорезовтэ «Уласхоорондын классай спортын мастер» гэһэн нэрэ зэргэ олгогдоо. Тренерэйнь абьяас ба Василиин шударгы байһанай ашаар иимэ богони саг соо эрхим, үндэр амжалтануудые туйлажа шадаал даа. «Һайн багша гэрэл мэтэ, һайн шаби сэсэг мэтэ» гэжэ дэмы хэлсэдэггүйл даа.

2016 оной август һарада Буряад орондомнай Дэлхэйн Кубогай гиириин мүрысөөн Кабанскын аймагай Энхалук нютагта табадахи шата үнгэрһэн байна. 6 гүрэнһөө шанга тамиршад суглараа. Буряад ороной 4 шанга тамиршад соо манай Василий оролсожо, баһал 4 алтан медаль абаһан байна. Эндээл, энэл һарын 9-12 болотор, Гран-при сериин уласхоорондын турнир үнгэрөө.

Василий Недорезов мүнөө дээрээ 60 гаран алтан, 14 мүнгэн, арбаад хүрэл медальнуудтай болонхой.

Василий Недорезов Россиин, Буряад ороной, аймагайнгаа, түрэл һургуулиингаа омогорхол гээшэ. Василий бэрхэ, шанга зоригтой байһаараа, эсэгынгээ нэрэ нэрлүүлжэ ябаһан угаа үргэлжэлүүлэгшэ, мүн тиихэдэ угаа суурхуулагша хүбүүниинь - найдалынь болоно гээшэл даа. Эсэгын лэ найдалынь дүүрэн хүсэхэнь болтогой гэжэ үреэел даа бултадаа.