​Бэлигтэйшүүлэй ерээдүй халаан

Буряадай мэдээжэ уран шүлэгшэ Дондог Улзытуевай түрэһэн тоонто Шэбэртэ нютагта 80 жэлэйнь ойн баярта зорюулагдаһан хэмжээ ябуулганууд үргэн дэлисэтэйгээр үнгэргэгдөө гэжэ мэдээсээ һэмди.

Улаан-Үдэһөө бууһан айлшадые Шэбэртын Хүтэл гэһэн дабаан дээрэ һайндэртэ Шэбэртын дунда һургуулиин һурагшад нютагайнгаа түрүү зонтой хүндэтэйгөөр угтан абаа. Буряад Уласай энэ ехэ хэмжээ ябуулгые хүдөө нютагта эмхидхэжэ, үндэр зэргэдэ үнгэргэхэ гээшэ бэлэн хэрэг бэшэ. Гэбэшье нютагай захиргаанай толгойлогшо Цырен-Дондок Шоймполов ехэ харюусалгатайгаар хандажа, бэлигтэй поэдэй ойн баярай һайндэр үндэр хэмжээндэ үнгэрөө гэжэ хэлэлтэй.

Улаан-Үдэһөө болон Буряад ороной хүдөө аймагуудһаа энэ уулзалгада ехэ олон зон хабаадаа. Түсэблэгдэһэн хэмжээнүүдэй нэгэ үйлэнь Бэшүүр тосхондо эмхидхэгдээ. Шэбэртын дунда һургуулида үнгэрһэн уулзалга тон дулаахан харилсаанай оршондо үнгэрөө. Болзогдоһон сагай хэмһээ үлүү гарабашье, хүн зон гаража ошохоёо яараагүй. Үшөө удаан дулаахан дурсалгануудые шагнажал һуугаа һэн.

Шэбэртын һургуулиин болон хүүгэдэй сэсэрлигэй хүмүүжэмэлнүүд гоё һайхан наада харуулаа. Нютагайнгаа омогорхол болоһон бэлигтэй уран зохёолшо Дондог Улзытуевай уянгата шүлэгүүдые тэдэ сээжээр уншажа, хүн зониие уяруулаа һэн.

Шэбэртын дунда һургуулиин захирал Юлия Шоймполова айлшадые угтан абажа, талархалаа мэдүүлээ.

- Манай нютагай урдаа хараха түрүү хүбүүдэй нэгэн болохо Дондог Улзытуевай зохёохы замда анхаралаа табижа, аяар холоһоо ерэһэндэтнай баярые хүргэнэб. Бидэ энэ уулзалга хүүгэдэй сэсэрлигэй үхибүүдэй наадаар дэмы эхилээгүйбди. Юуб гэхэдэ, манай нютагайхид бэлигтэй хүбүүнэйнгээ үндэр нэрэ сэгнэжэ, уран шүлэгүүдыень уншажа, ходол дурсажа байдагбди, - гэжэ Юлия Юмжаповна тэмдэглээ.

Үнэхөөрөө, энэ һургуулиин һурагшад, багшанар уран найруулгын шэдитэ жэгүүртэ орон соо байдаг мэтээр үзэгдөө һэн. Үзэмжэ һайхан байгаалитай, сэбэр арюун агаартай, элдин сарюун хүн зонтой энэ нютагта уран найруулагшад, дуушад, хүгжэмшэд, бэлигтэй зон лэ мүндэлхэл ёһотой хаш. Энэ хүдөө нютагһаа бэлигтэй олон зон урган гараа. Эндэһээ ганса соёлой шэглэлэй зон бэшэ, мүн баһа Буряадайнгаа экономико, хүдөө ажахы, үйлэдбэри болон засаг түрын үмэнэ өөрынгөө хубитаяа оруулһан зон энэ Шэбэртын һургуулиһаа гараһан байна.

Шэбэртэ нютагай түрүү хүнүүдэй нэгэн намай (партиин) болон засаг түрын ажал ябуулгада наһаараа хүдэлһэн, мүнөө ажалай хүндэтэ ветеран Сергей Санжиев үгэ абажа, уран шүлэгшэтэй суг хамта һураһан үе сагаа һанан дурсаба.

- Дондог юундэб даа минии Улзы-Бал гэжэ буряад нэрэдэмни дурагүй һэн. 7-дохи ангида һуража байхадамни, “Ши залуу гвардиин Сергей Тюленинэй нэрээр Сергей боло”, - гэһэн юм. Тиигэжэ би Сергей Санжиев болоо һэм. Һүүлдэнь Дондогнай суутай поэт болоод, номоо бэлэглэхэдээ, “Улзы-Бал нүхэртөө, гэр бүлэдэнь” гээд гараа табиһан байгаа бэлэй, - гэжэ Сергей Гончикжапович хөөрэбэ.

Сергей Санжиев ахатанай 60-аад онуудта хүршэ нютагайнгаа колхозой түрүүлэгшэ болоод байхадань, Дондог түмэр дархашанаар ажаллаа һэн. Сергей Гончикжаповичай энэ ябадалыень гайхахадань, Дондог Улзытуев: “Юрын уран зохёолшые партида абанагүй. Би коммунист болохоёо һананаб. Тиигээд зорюута нютагаа ерэжэ, хүүдинсэдэ ажалланаб”, - гээ бэлэй. Тиигэжэ Дондог Аюшеевич Коммунис намай гэшүүн болоһондоо үндэрөөр сэгнэжэ, омогорхожо ябадаг байгаа.

Энэ болон үшөө олон һонин дурсалгануудые аха захатанһаа дуулажа, хүн зон ехэтэ һонирхобо.

Шэбэртэ нютагай захиргаан болон дунда һургуулиин багшанар, ажалшад, нютагайхид Дондог Улзытуевай 80 жэлэйнь ойн баярта гурбан долоон хоногой туршада бэлдэжэ, харюусалга ехэтэйгээр хандаһанайнь ашаар ёһотойл уянгата һайхан уулзалга үнгэрөө гэжэ тэмдэглэмээр.

Шэбэртэ һайхан нютагһаа бэлигтэй олон хүнүүд урган гаражал байдаг. Нютаг зонойнгоо нэрэ һүлдэ дээрэ үргэжэ ябадаг хүнүүдэй нэгэн болохо Буряадаймнай урдаа хараха уран зохёолшо Басаа Валера, хүдөө бэшэгшэ Цырен-Доржо Зандраев болон бусад мүнөө үеын эдиршүүлдэ жэшээ болон ябадаг юм гэжэ онсо тэмдэглэлтэй.