​Зайн галай сэн доошолуулха талаар ажал ябуулагдана

Ородой Холбооной Уласай монополидо эсэргүүсэхэ албанай август һарада абаһан шиидхэбэреэр Буряад ороной ажаһуугшад 1 киловатт зайн галай түлөө 2 түхэриг 87 мүнгэ түлэдэг болоо бэлэй, анхан 3 түхэриг 5 мүнгэ түлэдэг байгаа бшуу. Гарахаяа байһан 2017 оной түрүүшын һарада зайн галай сэн 27 мүнгөөр доошолхо юм гэжэ транспорт, элшэ хүсэ болон харгын ажахы хүгжөөлгын талаар сайд Сергей Козлов мэдээсэбэ.

- Энэ эхин алхам гээшэ. Ажал үргэлжэлүүлэгдэнэ, энэ асуудал Буряад Уласай Толгойлогшо хараадаа абанхай. Ород гүрэнэй Элшэ хүсэнэй яамантай бидэ хамта ажаллажа, багаханшье һаа, үрэ дүн харагдаба, - гэжэ тэрэ тэмдэглээ.

Эрхүү можынхидта орходоо, манай Буряад Уласта элшэ хүсэнэй сэн дээгүүр. Зайн галай үйлэдбэринүүдтэ ондоо тээхи инвесторнүүд мүнгэ зөөриеэ оруулхаяа яаранагүй.

Сергей Козловой тэмдэглэһээр, Буряад Уласта зайн галай сэн Ород гүрэнэй хэмжээндэ дундуур тоодо байна.

- Буряад Уласай хүтэлбэри зайн галай сэн Эрхүү можынхитай адли болгоохо тухай дурадхана. Тус асуудал Эрхүүдэ шиидхэгдэхэ ёһотой, энэ хадаа тариф доошолуулха нэгэ арга болохо бшуу. Ажаһуугшадай зайн галай түлбэриин сэн даб дээрээ доошолхогүй, мүнөө дээрээ сэн хэдыгээр бага болохоб гэжэ багсаамжалхашье аргагүйбди, - гэжэ сайд мэдүүлбэ.

Сайдай хэлэһээр, зайн гал дамжуулдаг сүлжээнэй ажал һайжаруулха талаар асуудал шиидхэгдэхэ.

- Энэ хадаа тариф хубилгалгада баһал нүлөөлнэ. ”МРСК Сибири” – “Бурятэнерго” болон бусад ажахынуудтай хамта шухала ажалнууд ябуулагдаха. Гарзануудые доошолуулха, үрэ дүнгүй эмхинүүд элирүүлэгдэхэ. Эндэ ганса техническэ талаар бэшэ, ажалшадайшье хүдэлмэриин дүн харагдаха. Эдэ бүгэдэ зайн гал хэрэглэгшэдэй түлэхэ түлбэри бүрилдүүлдэг ха юм, - гэжэ Сергей Козлов нэмэжэ хэлэбэ.

Манай Буряад Улас дотор зайн гал дамжуулдаг 22 эмхи бии. Тэдэнэй эгээл багахануудтань хубилалтанууд болохо хаш. Сайдай хэлэһээр, сетевой эмхинүүдэй олон болоходо, түлбэриин хэмжээн доошолдоггүй. Тиимэһээ зарим эмхинүүд нэгэдүүлэгдэжэ магад.

Газ оруулха асуудал тухай

Үнгэрһэн долоон хоногой хугасаада Ород гүрэнэй Элшэ хүсэнэй яаман болон “Газпром” компани Буряад Уласай Засагай газарта Буряад ороной дэбисхэр дээрэ газ ябуулха тухай шэнэдхэгдэһэн түсэл эльгээгээ. Мүнөө энэ түсэл шэнжэлэгдэжэ байна, ерэхэ жэлдэ тэрэ зүбшэн хэлсэгдэхэ юм. Манай эндэ газ ябуулха соргонуудые түхеэрэлгэдэ мүнгэ зөөри оруулха тухай асуудал табигдана.

- Уридшалан хэгдэһэн тоосоогоор, тус түсэл “Газпромдо” экономикын талаар ашаггүй, юуб гэхэдэ, Байгал шадархи газар дээрэ газ багаар хэрэглэгдэхээр хараалагдана. Зүгөөр энэ засаг түрын болон Ород гүрэнэй Элшэ хүсэнэй яаманай бэшэ, “Газпромой” һанамжа, - гэжэ транспорт, элшэ хүсэ болон харгын ажахы хүгжөөлгын сайд Сергей Козлов мэдээсэбэ.

Буряад Уласай Засагай газарта хэгдэһэн ажал шалгалтын удаадахи шатада орохоор түсэблэгдэнхэй. Удаань засаг түрэ Буряад Улас дотор социально-байгаали хамгаалгын түсэл бэелүүлхыень Ородой Элшэ хүсэнэй яаманда дурадхаха юм.

- Экологиин талаар бидэ ехэ харюусалгатайбди. Байгал шадархи дэбисхэр - Буряад Улас, Эрхүү можын урда зүг, Үбэр Байгалай хизаар ганса олзо оршын талаһаа харагдаха бэшэ ха юм. Энэ талаар зохихо шиидхэбэри Ород гүрэнэй засаг түрэ абаха ёһотой, - гэжэ Сергей Козлов онсолбо.