893
Ородой Холбооной Уласай Юрэнхылэгшэ Владимир Путинай жэл бүри үнгэргэдэг заншалта хэблэлэй бага хурал Москвада пятницын үдэр үнгэрбэ. Сэтгүүлшэдтэй уулзалга четвергын үдэр түсэблэгдэһэн аад, Анкара хотодо декабриин 19-дэ хорото этэгээдэй гарһаа хосорһон Түүрэг Уласта Ород гүрэнэй элшэн сайд Андрей Карловые хүдөө табиһан ушарһаа нэгэ үдэрөөр хойшолуулагдаһан байна.
Түби дэлхэйн сэтгүүлшэд – Улаан Преснидэ
Ниислэлэй Улаан Пресниин эрьедэ оршодог Уласхоорондын худалдаа-наймаанай түбтэ Ород гүрэнэй Юрэнхылэгшэтэй уулзаха үдэр ехэ хүлгөөтэй байба: эртэ үглөөнһөө бага хуралда бүридхэлдэ абтаһан олон гүрэнүүдэй болон Ород гүрэнэй можо нютаг бүхэнһөө ерэһэн сэтгүүлшэд эндэ суглараа. Уласхоорондын худалдаа-наймаанай түбэй нэгэдэхи ба хоёрдохи дабхарнуудай холл соо телеканалнуудай операторнууд һүндэлнэ. Олонхи операторнууд ажалаа эхилжэ, сэхэ дамжуулга хэжэ байна, олондо мэдээсэл тараадаг хэрэгсэлнүүдэй түлөөлэгшэдтэй Юрэнхылэгшэ Владимир Путинай үнгэргэдэг энэ хэмжээ ябуулгада нэгэтэ бэшэ хабаадалсажа байһан телеканалнуудай сэтгүүлшэд хоорондоо уулзана, мэдээжэ хүнүүдые тойрон байжа шагнана.
Нютаг можонуудай хэблэлэй албанай түлөөлэгшэдэй ехэ эдэбхитэй байһаниинь эли харагдана, тэдэнэр Юрэнхылэгшын анхарал татажа, тэрээндэ асуудал табихын тула нютаг можынгоо нэрые плакадууд болон баннернууд дээрэ бэшээд ерэбэ. Тэдэнэй олонхинь плакадтай ерэһэнэйхиие гэжэ асуудалаа табиха азатай байба бшуу.
Хэблэлтэй харилсаха рекорднууд тухай
Жэл бүри декабрь һарада Ород гүрэнэй Юрэнхылэгшэтэй бага хурал үнгэргэгдэдэг заншалтай. Владимир Путинай сэтгүүлшэдтэй харилсаан дэлхэйдэ ори гансахан гэхэдэ болохо юм. Өөрын гүрэнэй болон Ород гүрэндэ зүбшөөрэлтэй хүдэлдэг гадаадын оронуудай сэтгүүлшэдтэй иимэ харилсалгые алишье гүрэнэй хүтэлбэрилэгшэ зүбшөөдэггүй байна.
2001 ондо эмхидхэгдэһэн сэтгүүлшэдтэй түрүүшын уулзалга эгээл богонихон саг соо болоо һэн, тиихэдэ Ород гүрэнэй толгойлогшо 1 саг 35 минутын хугасаа соо асуудалнуудта харюусаһан байна. 2008 оной бага хуралда 4 саг 40 минутын туршада Владимир Путин сэтгүүлшэдтэй харилсаһан юм - энэнь эгээл ута байһан. Эдэ бүхы уулзалганууд дунда зэргээр 3 саг 22 минута соо үнгэрһэн байна.
Нэгэдэхи канал, “Россия 1”, “Россия 24” гэһэн телеканалнууд энэ бага хуралһаа сэхэ дамжуулга ябуулжа байгаа. ОТР - Ородой олониитын телевидени сурдо-оршуулгатайгаар дамжуулаа. “Маяк”, “ВестиФМ” ба «Россиин радио» гэһэн радиостанцинууд мүн лэ баһа сэхэ дамжуулжа байгаа. Гэхэтэй хамта, Ородой Холбооной Уласай болон хари гүрэнүүдэй хэдэн зуугаад олондо мэдээсэл тараадаг хэрэгсэлнүүд, интернет хэблэлнүүд, сонинууд, сэтгүүлнүүд сайтнууд дээрээ он-лайн аргаар тус уулзалгые дамжуулжа байһан байна.
Энэ жэлэй бага хурал үшөө эхилээгүй байгаад, ээлжээтэ рекорд харуулаа. Зүбшөөрэлтэй болоһон сэтгүүлшэдэй тоогоор олон байба гэхэ гү, али Ород гүрэнэй ба гадаадын олондо мэдээсэл тараадаг хэрэгсэлнүүдэй мянга табан зуу гаран түлөөлэгшэд эндэ суглараа бшуу. Тиигэжэ бүхы уулзалгануудай дунда баһал дээдэ зэргын туйлалта болоо.
Халуун хөөрэлдөөнэй эршэ хүсэн
Ородой Холбооной Уласай Юрэнхылэгшэ Владимир Путинай хэблэлэй бага хуралда манай уласһаа “Бурятия” ГТРК-гай сэтгүүлшэд Алла Мальцева Владимир Жаров хоёр, мүн тиихэдэ би гээд хабаадаһан байнабди.
Гүрэнэй толгойлогшын сэтгүүлшэдтэй сэхэ урда урдаһаа хараад хөөрэлдэхэ түхэл, ямаршье, тэрэ тоодо хорон асуудалнуудта тодорхой болон дэлгэрэнгы харюунууд олондо мэдээсэл тараадаг хэрэгсэлнүүдэй түлөөлэгшэдэй тоншье эсэргүү бодолтойнуудыень “номгоруулжархина”.
4 саг шахуу үргэлжэлһэн бага хуралай үедэ Ород гүрэнэй толгойлогшо хөөрэхэ маягаа нэгэшье дахин хубилгаагүй, харюугүй байгаагүй. Владимир Путин хүндүүлхэй асуудалнуудта харюусахадаашье, зарим сэтгүүлшэдэй харшаар хандаашье һаань,тон тааруугаар, ёгтолон һагад, шоглон харюусадаг, уур сухалгүй, түбшэн түни зандаа байгаа. Зүгөөр тэрэнэй эршэ хүсэн, хүн зоной анхарал татаха шадабаринь нилээд ехэ: дүрбэн саг оройдоо ойлгогдонгүй үнгэршоо
Бүхы дээрээ Владимир Путин 48 асуудалда харюусаа. Тэдэнь уласхоорондын харилсаанууд, манай гүрэниие США-гай юрэнхылэгшын һунгалтада оролсоо гэжэ гэмнэхэ һэдэлгэ, Украинадахи дайн, допинг тухай шууяан, террористнуудтай тэмсэлгэ гэхэ мэтэ шухала асуудалнуудтай холбоотой байгаа. Гүрэн доторхи асуудалнууд баһал нилээд шангаар табигдаа: Ород гүрэнэй эдэй засагай һалбариин байдал, Керченскэ хүүргын барилга, байгаалиин байдал, хүдөө ажахын шиидхэгдээгүй асуудалнууд...
Ямаршье саарһа гуурһа харангүй
Хэблэлэй бага хуралай эгээ эхиндэ “Маяк” радиогой сурбалжалагшын жэлэй дүнгүүд ба эдэй засагай һалбариин байдал тухай асуухадань, гүрэнэймнай хүтэлбэрилэгшэ заншалта ёһоороо ямаршье саарһа гуурһагүйгөөр бүхы тоо баримтануудые хэлэжэ үгөө.
Владимир Владимировичай хэлэһээр, гүрэмнай эрхэтэдэйнгээ урда бүхы ниигэмэй уялгануудаа дүүрэн хэмжээндэнь дүүргэнэ, саашадаашье энээнээ алдахагүй. Мүнгэн хүрэхэ. Пенсинүүд тухай харюусахадаа, хэдэн үдэрэй үнгэрхэдэ, шэнэ жэлэй январь һарада бүхы пенсионернүүдтэ, хэн ямар, хэды шэнээн пенси абанаб – илгаагүй, бултандань нэгэ дахин үгтэдэг нэмэри түлбэри – 5000 түхэриг түлэгдэхэ гэжэ хэлээ.
Хэрбээ 2015 ондо гүрэн дотор үйлэдбэрилэгдэһэн бүхыдөө үрэ бүтээлэй (ВВП) доошололго 3,7 процентдэ хүрэһэн һаань, үнгэржэ байһан жэлэй дүнгүүд нилээд дээгүүр байхаар багсаамжалагдана – доошололго оройдоол 0,5-0,6 процентын хэмжээндэ байха. 5,5 процент – мүнгэнэй сэнгэй бууралгын тон бага хэмжээн гээшэ, мүн тиихэдэ Ород гүрэнэй Түб банкын алта мүнгэнэй нөөсэ ургаад абаа. Эдэй засагай һалбари эршэтэй болонхой, салин түлбэри дээшэлнэ, хүн зоной тоо олошорһоор, үхибүүд олоор түрэнэ.
Гүрэнэйнгөө таряашадта баяр баясхаланаа мэдүүлээ
– Хүдөө ажахыда ехэ һайн хүгжэлтэ ажаглагдана, - гэжэ Владимир Путин тэмдэглээ. – 4,5 процент – хүдөө ажахын дээшэлэлгэ.
Энэ жэлэй ургаса хуряалга тухай иигэжэ хэлээ: «119 сая гаран тонно ургаса абаабди. Эрхим үрэ дүн гээшэ. Хүдөөгэйхидтэ ажалайнь түлөө баяраа мэдүүлнэб”. Юуб гэбэл, энэмнай СССР гүрэнэй дүнгүүдтэй сасуулмаар тоонууд гээшэ, гүрэнэймнай шэнэ түүхэдэ иимэ ехэ ургаса абтажа үзөөгүй юм. Гадна хари гүрэнүүдэй хамаг эд бараа өөрынгөө эд бараагаар һэлгэжэ шадаашьегүй һаа, энэ ябуулга яаха аргагүй һайн ашаг үрэтэй: таряашаднай харюугай хэмжээнүүдые болюулха дурагүй байна.
Владимир Путинай хэлэһээр, Ород гүрэнэй Засагай газар хүдөө ажахын үйлэдбэриин дээшэлэлгэдэ найдана. Гэбэшье гүрэн саашадаашье хүдөө ажахые дэмжэжэ байха: ерэхэ жэлэй бюджедтэ хүдөө ажахыда 216 миллиард түхэриг хараалагданхай.
“Би хүүргэ барихаяа һанааб, харин таанад – тэрэнэй нэрэ”
Крым Уласай сэтгүүлшэн Керченскэ хоолой дээгүүр баригдажа байһан хүүргэдэ ямар нэрэ үгэхэ байһыень Юрэнхылэгшэһээ асуухадань, Владимир Путин иигэжэ харюусаа: “Та өөрөө мүнөө һая Керченскэ гэжэ нэрлээ ха юмта. Би тэрэниие бариха гэжэ һанаатайб, харин та нэрыень һанаат”.
– Хэзээб даа нэгэтэ Украинатай харилсаанууднай заатагүй һайжарха гэжэ бата этигэнэб. Тиимэһээ энэ хүүргэ ерээдүйдэ Ородой-Украинын харилсаануудые, худалдаа наймаанай, ниигэмэй, соёл түүхын холбоонуудые хүгжөөлгэдэ туһатай байха, - гэжэ юрэнхылэгшэ нэмэжэ хэлээ.
Бидэ эхилээ бэшэбди
Гүрэн доторхи бэрхэшээлнүүд тухай асуудалнуудһаа гадна уласхоорондын хэрэгүүд тухай, дэлхэйдэ боложо байгаа үйлэ хэрэгүүдтэ манай гүрэнэй нүлөө тухай асуудалнууд олон байгаа. Заримдаа даншье һаа бүдүүлиг асуудалнууд табигдаа. Зүгөөр Владимир Путин заншалта ёһоороо миһэржэ байгаад лэ, хурсахан харюунуудые үгөөд лэ байгаа.
Жэшээнь, «The Wall Street Journal» сониной сурбалжалагша Росси дотор болзорһоо урид юрэнхылэгшын һунгалта үнгэргэжэ болохоор гээшэ гү гэжэ һонирхоходоо, сохом ямар гүрэн тухай хэлэжэ байһыень лаб ойлгохоор бэшээр асуудалаа табяа юм. Тиихэдэнь Владимир Путин сэхэ тодожо абаад, ямар гүрэн тухай (Росси гү, али США гү) хэлэһыень шоглон асуугаад, һүүлдэ энеэдэ наадагүйгөөр иигэжэ харюусаа: “Болзорһоо урид һунгалта боломоор, зүгөөр зүйтэй бэшэ”.
Британиин «BBC» сониной сурбалжалагша манай гүрэнэй буу зэбсэгүүдээ олон болгожо байһан ушараар һанаагаа зобоһоноо мэдүүлээ. Ород гүрэнэй толгойлогшо тоб байса тодо харюу үгөө: “Бидэ эхилээ бэшэбди”. Саашань хэлэхэдээ, Владимир Путин гүрэн бүхэн дэбисхэрээ хамгаалха “шүхэр” зохёохоёо оролдодог гэжэ онсолоо. Холбоото Штадуудай ПРО-гой хэлсээнһээ гарашахадань, манай гүрэн хамгаалгынгаа байгуулгые һайжаруулха баатай болоо ха юм. Энэ балай гайхахаар юумэн бэшэ. Эгээл ехэ гаргашанууд хэгдэжэ дүүргэгдээд, мүнөө тэдэнь доошолжо эхилэнхэй.
–Зэбсэг олошоруулга – манай үүсхэл бэшэл. Бүри һая болотор американ хинагшад манай заводуудта һуугша һэмнай, энээн тухай мартаагүй бэзэт? – гэжэ юрэнхылэгшэ асуугаа.
Булигдаһанаа сагааруулжа шадахагүйдөө
Владимир Путин США-да болоһон һунгалтада зоной шэлэһэн юрэнхылэгшэ Дональд Трампын илалтада Ород гүрэн ямаршье хабаагүй гэжэ үшөө дахин онсолон тэмдэглээ.
Манай юрэнхылэгшын хэлэһээр, США-да “даб дээрээл зонхилжо байһан демокрадуудай нам” алдуунуудаа анхархын орондо гадаадаһаа зэмэтэниие бэдэрнэ. Тиин Владимир Владимирович США-гай демократическа намай “туйлаһан” бүхы алдуу эндүүнүүдые ехэбшэлэн тоолоо.
Автор: Баяр БАЛДАНОВ
