​Харгыда һаатабал, яахаб?

Январиин янгинама хүйтэн түлэг дундаа ороод байна. Иимэ оршон байдалда холын харгыда ябаһан жолоошодой хэдэг ажалда элдэб бэрхэшээлнүүд олон болодог. Тиимэһээ харгыда ябаһан зоной орожо дулаасаха, тэдэнэртэ туһалха тусхай газарнууд Буряад Уласта хэр олон хаб даа?

Онсо байдалай яаманай мэргэжэлтэдэй мэдээсэһээр, гүрэнэй болон можо нютагай зиндаатай харгы замуудые зубшаад байдаг кафе, амарха зохид буудалнуудые тоолоходо, 79-дэ хүрэнэ.

Энэ хүйтэндэ гэрһээ холо харгыда ябаһан жолоошодой унаа тала газарта эбдэрээд, тогтошохо баатай болоо һаань, хэн туһалха болоноб? Мүн лэ иимэ ажалтай, халуун хүйтэниие үзэһэн хүн хойноһоонь ахижа ерэбэл, заабол туһалха гээбы гэжэ найдая. Харин орожо дулаасаха, хэрэгтэй туһаламжа абаха тусхай газарнууд Буряад Уласаймнай харгы замуудай далан зубшаад үгы.

Владивосток – Москва харгыгаар саг үргэлжэ ябадаг жолоошодһоо энээн тухай асуухада, бурхандаа мүргөөд лэ, өөрөө өөртөөл найдаад ябахаһаа сэсэн юумэн үгы гэжэ харюусана. Машинаяа зогсоожо, носохо хэрэгэй гарахада, туһалха сэдьхэлтэй хүнүүд байдаг лэ даа. Буряад Уласай Онсо байдалай албанай харгыдаа эбдэрһэн жолоошодой иимэрхүү эрилтэнүүдые хүсэд дүүрэнээр хангаха хоёр автопункт мүнөө дээрээ байна. Тэдэнь хүн зоной ябадаггүй, хүдөө, зэрлиг ямаршье газарта хүрэжэ ошохо шадалтай.

Тюмень можын жэшээ харахада, бурзан сагаан үбэлэй буухада, даараһаниие дулаасуулдаг, бээрэһэниие гэдхээдэг газарнууд үдэр һүнигүй хүдэлдэг байна. Буряад нютагууд хоорондоо яһала ехэ зайтай байдаг гээшэ. Заримдаа зуу гаран модоной зайда нэгэн гээ һаа – нюсэгэн тала, үгы гэбэл – ой тайга хүреэлээд байдаг аабза. Утын аянда ябажа, хоолойгоо тэжээдэг мэргэжэлтэ жолоошод дулаан хубсаһатай, хаанаһаашье хонходожо дохёо үгэхэ оньһотой, халуун сайтай, хүнэһөөр баян ябадаг гээшэ. Үшөө тиихэдэ хүр хүнгэрэг этэхэ хүрзэтэй, модо унагааха һүхэ, хюрөөтэй, гал түлихэ зуруултай ябадаг ааб даа. Хэрбэеэ баабгайн һабараа хүхэжэ байгаад унтаха сагта алибаа хэрэгээр холуур ябаха болобол, тэдэнһээ жэшээ абамаар байна. Мүн тиихэдэ замда гарахаһаа урид унажа ябаһан унаагаа хүсэд шалгаад, эбдэрһэн, түгдэрһэнөө заһаһан лэ хойноо аянда гарамаар.

Буряад Уласай харгы замуудые зубшаад, эбдэрһэн машина дулаасуулжа заһаха тусхай газарнууд үгышье һаа, хоол бариха, хоноод гараха газарнууд яһала олон. Тиимэһээ аянда ябатар энэ-тэрэ юумэнэй болоо һаань, тиишэ хандахада болохо гэжэ Онсо байдалай яаманай мэргэжэлтэд дуулгана. Үглөөдэр Крещениин үдэр. Тиимэһээ һая нааша шэмэрүүн хүйтэн тиимэ бэлээр буураад орхихогүй байха.