​"Боярышник" мэтэ спиртын зүйлнүүд үгы хэгдэнэ

Эрхүү хотодо тохёолдоһон аюулта ушарта олон зон муу шанартай архи уугаад наһа бараа гэһэн мэдээн гүрэн дотор хүн зоной сэдьхэл хүдэлгэhөөр. Хаа хаанагүй спирт холисотой зүйлнүүдые наймаалдаг эмхинүүд шалгагдана.

- Бүхыдөө Буряад орон дотор 161 мянган литр гэхэ гү, “Боярышнигай” 1379 бутылка тушаагдажа абтагданхай. 2016 оной декабриин 26-һаа 2017 оной январиин 9 болотор Буряад орон дотор 395 шалгалта үнгэргэгдөө. Наймаанай 14 газарнуудта хулгай болон һандаргалганууд үзэгдөө, - гэжэ Роспотребнадзорой хүтэлбэрилэгшэ Сергей Ханхареев мэдээсэбэ.

Роспотребнадзорой албан сагдаанартаа суг хиналтын ажал ябуулжа, спиртын холисотой 18 тонно зүйлнүүдэй наймаа Улаан-Үдэдэ болон Зэдэ, Сэлэнгэ, Хяагта, Кабанскын, Баунтын, Мухар-Шэбэр болон Ивалга аймагуудаар болюулаа. Ородой Холбооной Уласай Гүрэнэй ариг сэбэрэй албанай ахалха врачай 2016 оной декабриин 23-най тогтоолоор, спиртын холисотой эдеэнэй бэшэ зүйлнүүдые худалдалга болюудагданхай. Манай Буряад орон дотор шалгалтын, хиналтын ажалнууд ябуулагдажа байна.

Хэрбэеэ, элдэб һэжэглэмээр зйүлнүүдые худалдажа байһан ушар элирүүлбэл, 8-800-350-0015 гэһэн утаһаар үдэртөө, харин амаралтын үдэр гү, али үдэшэндөө 8(3012) 41-25-74 гээд утаһаар хонходожо, дуулгаха шухала.