​Табитай болобол даа, "Үльгэрнай"!

Хүүхэлдэйн “Yльгэр” театр байгуулагдаhаар мүнөө жэл 50 жэлэйнгээ ойн баяр угтахань. Тиимэhээ гаража ерэhэн жэлдэ зохёохы талаар олон хараа түсэбүүдые урдаа табинхай.

Театрнууд 50, 100, 150 жэлэй ой уласай хэмжээндэ тэмдэглэдэг юм. Тиимэһээ 2017 ондо хүүхэлдэйн “Үльгэр” театрай 50 жэлэй ойн баяр тэмдэглэхэ тухай Буряад Уласай Толгойлогшо Вячеслав Наговицынай тусхай зарлиг гаранхай. Мүнөө сагта энэ хэмжээ ябуулга үнгэргэхэ талаар гаргашалагдаха мүнгэ зөөриин асуудал үшөө шиидхэгдэжэ байна. Тиигэбэшье “үльгэрэйхид” ойн баяраа үргэн дэлисэтэйгээр тэмдэглэхээр түсэблэнхэй.

Ойн баярай гол хэмжээн гэбэл, байгша оной сентябрь һарада эмхидхэгдэхэ уласхоорондын хүүхэлдэйн театрнуудай “Нүүдэлшэдэй зам” гэһэн наадан болоно.Тыва Уласай, Нерюнгри, Эрхүү, Шэтэ, Железногорск, Братск, Санкт-Петербург, Москва хотонуудай хүүхэлдэйн театрнууд хабаадаха тухайгаа мэдүүлээд байна. Мүн Монгол, Чехи, Израиль, Япон, Хитад гүрэнүүдэй театрнууд хабаадаха юм.

- Манай театр Буряад Уласай засаг түрын, Соёлой яаманай соносхоһон харалгада хабаадажа, грант шүүгээбди. Тиигэжэ ойн баяртай дашарамдуулан, шэнэ зүжэг табихамнай. Шэнэ аргаар хүүхэлдэйнүүдые бүтээдэг уран зураашые урихабди, - гэжэ “Үльгэр” театрай захирал Баирма Дашидоржиева хөөрэнэ.

Ушар юуб гэхэдэ, алишье ажалда шэнэ онол аргануудые хэрэглэлгэ гээшэ хүгжэлтын шухала эрхэ нүхэсэл болоно ха юм. “Үльгэр” театрайхид элдэб гоё хүүхэлдэйнүүдые бүтээдэг бэлэй. Харин мүнөө Москва, Санкт-Петербург хотонуудай театрнууд шэнэ аргаар хүүхэлдэйнүүдые бүтээнэ. Тиимэһээ манай театрайхид сагай ябасаһаа гээгдэхэ аргагүй ха юм. Уран зурааша ерэжэ, шэнэ аргаар хүүхэлдэйнүүдые бүтээжэ һургаха, мүнөө үеын эрилтэнүүдтэ харюусамаар зүжэгүүд табигдажа эхилхэ.

- Мүнөө сагта тайзан дээрэ тон үсөөн хэрэгсэлнүүдые хэрэглэн, имагтал артистын бэлиг, арга боломжонуудые дүүрэнээр элсүүлдэг болоо. Манай артистнууд ондоо театрнуудта орходоо, хүшэгын саанаһаа наадана ха юм даа, харин мүнөө зүжэгүүдээ ондоогоор табидаг болохобди, - гэжэ “Үльгэрэй” захирал мэдээсэнэ.

Ойн баярта зорюулан, режиссёр Эрдэни Жалцанов “Говорящий с ветром” гэһэн шэнэ зүжэг найруулжа байна. “Байгал” театрай хүгжэмшэн Баттулга хүгжэмыень зохёогоо. Энэл театрай гол дуушан Алдар Дашиев “Үльгэр” театрай артистнуудтай дууень гүйсэдхэхэ юм.

- Мүнөө зундаа артистнууднай Монгол орон болон Буряадайнгаа Зэдэ аймагаар ябажа, дуунуудые суглуулха экспедицидэ гараха, тиигэжэ сентябриин 1-һээ театральна хаһаяа эхилхэбди, - гэжэ Баирма Гуродагбаевна хөөрэбэ.

Энэ жэлдэ уран һайханай талые даагша Эрдэни Батоочирович Жалцанов болон театрай бэлигтэй артист Светлана Жамбаловна Бунеева гэгшэдэй ойн баярнууд тэмдэглэгдэхэ. Эдэ үйлэ хэрэгүүдтэ зорюулагдажа, хэдэн зүжэгүүд табигдахаар хараалагдана.

Цырегма Сампиловагай гэрэл зүрэг
"Үльгэрэй" артистнар хүүхэлдэйнүүдтэеэ