825
Шэнэхээнэй Кубогто хүртэхын түлөө буряад номо һуршаар мүрысөөн хоёрдохи жэлээ эмхидхэгдэнэ. Үнгэрһэн долоон хоногой эсэстэ Ивалга һууринда болобо.
- Тус мүрысөө Хитадай Шэнэхээнһээ уг гарбалтай зон 2016 онһоо хойшо эмхидхэжэ эхилээ. Түрэл буряад арадайнгаа ёһо заншал һэргээхын түлөө энэ мүрысөөн болоно бшуу, - гэжэ шүүгшэ Дарима Биликтуева хөөрэнэ.
– Мүнөө жэл Буряадаймнай 10 аймагуудай, Эрхүү можын, Үбэр Байгалай хизаарай 127 тамиршад хабаадаба гээшэ.
Түрүү һуури элирүүлхын түлөө хабаадагшад 40 болон 30 метр зайда харбаһан байна. Эрэшүүлэй, эхэнэрнүүдэй болон ветерануудай дунда эрхимүүд элирүүлэгдээ. Мүн тиихэдэ заншалта ёһоороо абсолютна чемпион тодороо.
Эрэшүүлэй дунда Могойтын аймагай Ага-Хангил һууринай Болот Ринчинов түрүүлжэ гараа. Улаан-Үдэ хотын Ринчин Хандажапов болон Зэдэ аймагай Алцаг һууринай Бато-Мунко Рабданов гэгшэд шангай һуури эзэлээ. Түрүү һуури эзэлэгшэ 8000 түхэригөөр урмашуулагдаа.
Эхэнэрнүүдэй дунда Ага аймагай Будалан һууринай Любовь Галсанова түрүүлжэ, 5000 түхэригөөр шагнагдаа. Улаан-Үдын Долгоржаб Базарова болон Загарай аймагай Онохойн Марина Носкова хоёрдохи, гурбадахи һууринуудта гараа.
Ветерануудай дунда Хэжэнгэ һууринай Николай Егоров нэгэдэхи һуури эзэлжэ, олониие гайхуулаа. Мэдээжэ Цырен-Доржо Магаков (Улаан-Үдэ) болон Сергей Табхаров (Сэлэнгэ аймагай Ташар һуурин) гэгшэд мүнгэн болон хүрэл медальнуудые абаба.
Абсолютна чемпионой нэрэ зэргэдэ Захаамин аймагай Үлэгшэн һууринай Бэлигтэ Цыремпилов хүртэжэ, 10 мянган түхэриг шанда хүртөө. Тэрэ Агын тойрогой гурбан түлөөлэгшэдые финалда илаба. Эдэ хэд бэ гэбэл, Баир Базардашиев (Һүдэнтэ), Болот Ринчинов (Ага-Хангил), Рабдан Цыренов (Согто-Хангил).
Любовь Галсанова эгээн оло дахин «ласти» оноһоной түлөө тусхай шанда хүртөө. 15 наһатай Ринчин Будаев «Эгээл залуу хабаадагша» гэжэ тодороо. Мүн 80 наһатай Даши-Дондок Дарижапов «Эгээл аха захатан» гэжэ элирүүлэгдээ.
Шэнэхээнһээ уг гарбалтай буряадуудай эблэлдэ тус мүрысөө эмхидхэһэнэйнь түлөө Буряадай һур харбалгын баяр хүргэбэ.
Борис Балдановай гэрэл зураг
Мүрысөөндэ илагшад
Автор: Борис БАЛДАНОВ
