​Хоёр юрэнхылэгшын хөөрэлдөөн

Үнгэрэгшэ гарагай долоондо Ородой Холбооной Ула­сай Юрэнхылэгшэ Вла­димир Путин Америкын Холбоото Штадуудай Юрэнхы­лэгшэ Дональд Трамптай утаһаар хөөрэлдэбэ. Энээн тушаа амарал­тын үдэрнүүдтэ бүмбэрсэг дэл­хэйн бүгэдэндэ мэдээсэл тараадаг бүхы хэрэгсэлнүүд дуулгаа.

Анха түрүүшынхиеэ

США-гай шэнэ юрэнхылэгшын тушаалаа эзэлжэ һууһанһаа хойшо энэ хөөрэлдөөн анха түрүүшынхиеэ эмхидхэгдээ гэжэ онсололтой. Ма­най юрэнхылэгшэ тэрэниие хуулиин ёһоор тушаалдаа ороһон ушараарнь амаршалаад, ажалдань амжалта хүсөө гэжэ Кремлиин хэблэлэй албан тэрэ үдэртэнь мэдээ­сээ.

Хоёр ороной хоорондохи харил­саа холбоо түни түбшэн, адлихан эрхэтэй болон, бэе бэедээ туһатай байхаар тогтонижоруулха болон саашань хүгжөөхэ талаар хамтын ехэ ажал габшагайгаар, эдэбхи ехэ­тэйгээр ябуулха һанаатай байһанаа дүшэн табан минутын туршада болоһон хөөрэлдөөнэй үедэ уласуу­дай дарганар гэршэлбэд.

Дээрмэшэ, алууршадай ябадал – дэлхэйн хатуу асуудал

Уласхоорондын мүнөөдэрэй байдалые мүн лэ ехэ дэлгэрэн­гыгээр зүбшэн хэлсэлгэ болоо. Алуурша, дээрмэшэ бүлгэмүүдэй хуули бусын ябадалтай тэмсэхэ, дэлхэй дээрэ дайн байлдаанай боложо байгаа газарнуудта тог­тууритай амгалан байдал бусааха ба дайшалхы элдэб зэбсэг тараа­хые болюулха тухай, мүн тиихэдэ Иранай ядерна бэлэдхэлнүүдэй программа болон Солонгосой хахад арал дээрэхи байдал ту­хай асуудалнуудаар хоёр юрэн­хылэгшэ хөөрэлдөө. Украинада тогтоод байһан хэсүү байдал ту­хай һанамжануудаа тэдэ баһал хубаалдаһан байна. Эдэ болон бу­сад бүхы асуудалнуудаар нүхэр ёһоной холбоо байгуулжа, хамта ажаллаха тухайгаа хоёр тала хэл­сээ.

Тэрэшэлэн, дэлхэй дээрэхи мүнөө үеын гол ехэ аюул – уласхоорондын алуурша, дээрмэшэдэй хүдэлөөнтэй (терроризмтай) хэг­дэжэ байгаа тэмсэлдэ хүсэ шадалаа нэгэдүүлгэ болоно гээд тэмдэглэг­дэбэ. Сириин Араб Уласта ИГИЛ болон алуурша, дээрмэшэдэй бу­сад эмхи, бүлгэмүүдые бута сохин усадхаха зорилготойгоор Ородой Холбооной Уласай болон Амери­кын Холбоото Штадуудай хамтын алхамуудые бодото дээрэ аша үрэтэйгөөр залан хүтэлхэ тухай юрэнхылэгшэнэр һанамжа нэгэтэй байһанаа гэршэлээ.

Бэе бэедээ туһатай байя

Хоёр ороной эдэй засагай бүхы һалбаринуудта адли туһатай ху­далдаа наймаанай харилсаануудые һөөргэнь бусааха болон шэнээр зо­хёон байгуулха хэрэгэй шухалань мүн лэ онсологдоһон байха юм. Хоёр талын харилсаануудые бүхыдөө бэхижүүлхэдэ, тэдэниие бүри үргэдхэхэ болон тогтууритайгаар хүгжөөхэдэ энэ ажал аша үрэтэй байха гээд хэлэгдэбэ.

Владимир Путин Дональд Трамп хоёр нюур нюураараа уулзаха га­зараа, тэрэ уулзалгын болзорые элирхэйлхэ тухай даабаринуудые өөһэдынгөө албан зургаануудта үгэхэбди гэжэ хэлсэбэд. Утаһаар хөөрэлдөөд, абаһаар үгэеэ ойл­голсожо, эды зэргэ хэлсээнүүдтэ хүрэһэниинь һайшаалтай.

Үреэлэй үзүүртэ – тоһон

Манай ороной арад зондо аза жаргал болон амгалан байдал До­нальд Трамп хүсэхэһөө гадна, Аме­рикын арад Россида болон тэрэнэй эрхэтэдтэ дулаахан ульһатайгаар хандадаг юм гэжэ хэлээ.

Манайшье гүрэндэ ажаһуугшад баһал тиимээр американецуудта хандадаг гэжэ Владимир Путин мүн лэ дуулгаа. Хоёр зуу гаран жэлэй туршада манай гүрэн Аме­рикын Холбоото Штадуудые дэм­жэжэ, бүхэдэлхэйн хоёр дайнай үедэ нүхэр ёһоной хэлсээ холбоо­той байгаа, мүнөөшье сагта алуур­ша, дээрмэшэдэй уласхоорондын хүдэлөөниие усадхаха хэрэгтэ США гүрэниие гол шухала анда улас гэжэ тоолонобди гээд манай ороной юрэнхылэгшэ харюусаһан байха юм.

Бидэ гэһэн хамтаараа

Бэе бэетэеэ саг үргэлжэ харилса­жа байхабди гээд хоёр юрэнхылэг­шэ хэлсэбэд. Утаһаар болоһон энэ хөөрэлдөөн яһала зохидоор үнгэрөө гэжэ тэмдэглэгдэнэ. Эгээл томо уласууд һүүлэй үедэ горитой ехээр доройтоод байгаа харилсаа холбоогоо һайжаруулха гү, али ехэн­хи шэглэлнүүдээрнь шэнээр тогтоон байгуулха гү – энээнһээ бүхы энэ бүмбэрсэг дэлхэйн саашан­хи хүгжэлтэ сэхэ дулдыдаха гэжэ бүгэдэ зон, бусад хари гүрэнүүдэй дарганар һайн мэдэнэ.

Хоёр юрэнхылэгшын хөөрэлдөөн тухай ямар һанамжатайбта гэһэн асуудалтайгаар Буряад Уласай Ара­дай Хуралай Түрүүлэгшэ Цырен-Да­ша Доржиевта хандахадамнай, пар­ламентын дарга иигэжэ харюусаба: “Энээхэн хөөрэлдөөе һайн тэмдэг гэжэ һананаб, һай һанахаһаа бэшэ ондоо бодол байхагүй. Иигэжэ үгэеэ ойлголсоод, хоёр гүрэн хамтаржа, ажалаа саашань сугтаа ябуулаа һаань, арадуудтамнайл һайн байха зэргэтэй”.

Дональд Трампын үреэлһээ эхилһэниинь ехэ гүнзэгы удха ша­нартай. Үреэлэй үзүүртэ – тоһон, ха­раалай үзүүртэ – шуһан гээд буряад зон хэлсэдэг ха юм.