​Хойто аймагууд руу харгынууд шэнэлэгдэһээр

Муяын аймагта 418 километр утатай авто-унаагай харгынууд тоологдоно. 2012 – 2016 онуудта энэ аймагай харгынуудые заһабарилгада 339 миллион 200 мянган түхэриг гаргашалагдаһан байна. Тиигэжэ дүрбэн хүүргэ заһабарилагдаба. Гадна Северобайкальск – Шэнэ-Уоян – Таксимо гэһэн харгы дээрэтабан километр хэмжээнэй участок дүүрэн заһабарилагдаа. Таксимо – Бодайбо харгын нэгэ участок мүн лэ капитальнаар заһабарилагдаба. Мүнөө Муяын аймагта үшөө хоер хүүргэ һэльбэн шэнэлэгдэжэ эхилэнхэй. 2017-2019 онуудта аймагай харгынуудые заһабарилгада 223 миллион 960 мянган түхэриг һомологдохоор түсэблэгдэнэ.

Хойто-Байгалай аймагта автомобильна харгынуудай утань 705 километр болоно. Тиимэһээ энэ аймагай харгынуудые болбосон түхэлтэй болгохын хэрэгтэ 2012 – 2016 онуудта бүхыдөө 978 миллион 300 мянган түхэриг һомологдоо. Тиигэжэ үгтэһэн мүнгөөр Северобайкальск – Даван харгын дүрбэн километрэй зай, Северобайкальск – Шэнэ-Уоян – Таксимо харгын табан километрэй зай шэнэлэгдээ. Тэрэшэлэн, 9 хүүргэнүүд заһабарилагдаба. 2017 – 2019 онуудта Хойто-Байгалай аймагай харгынуудые һэльбэн шэнэлхэ хэрэгтэ 288 миллион 700 мянган түхэриг һомологдохоор хараалагдана. Северобайкальск хотын харгынуудайнь хамтын хэмжээн 98 километр болодог юм. Тэдэниие һэльбэн шэнэлхэ хэрэгтэ 2012–2015 онуудта 59 миллион 100 мянган түхэриг шэглүүлэгдэһэн байна. 2017 ондо 14 миллион 700 мянган түхэриг гаргашалагдаха түсэбтэй.