Сагаан һарын һайндэртэй дашарамдуулан, мартын 2-4-дэ заншалта ёһоор «Баатар, Дангина» гэһэн 27-дохи мүрысөөн үнгэрхэнь.
Тус хэмжээ ябуулгые Арадай уран бүтээлэй уласай түб (РЦНТ) эмхидхэнэ. Эндэ Буряад Уласай, Үбэр Байгалай хизаарай, Эрхүү можын аймаг аймагуудта үнгэрһэн шэлэн абалгын түрүүшын шатада илажа гараһан хабаадагшад Улаан-Үдэ хото ерэжэ, түгэсхэлэй мүрысөөнүүдтэ хабаадаха юм.
Мүнөө жэлэй урилдаанда олоной гуйлтаар «Сагаан һарын хатан» гэһэн номинаци дахин һэргээгдэхэ гэжэ дуулганабди. Эндэ 30-45 наһатай эхэнэрнүүд хабаадаха болоно. Гал гуламтаяа сахижа ябаха табисууртай эхэнэрнүүд, эжынэр сэсэн бодолоороо, бэлиг шадабаряараа, оюун ухаагаараа урилдажа, ёһотой хатан гүүлэхэ зиндаагаа гэршэлхэ ёһотой.
7-25 наһанай дангина басагад, баатар хүбүүд буряад арадайнгаа соёл, ёһо заншал гүнзэгыгөөр мэдэхэ байһанаа харуулхынгаа хажуугаар дуулаха, хатарха бэлигээ болон гоё һайхан үндэһэн буряад хубсаһа үмдэжэ харуулха юм. Даабаринууд 2017 ондо соносхогдоһон Байгаали хамгаалгын жэлдэ хабаатай байха гээд эмхидхэгшэд дуулгана.
Урилдаанай II шата П.И. Чайковскиин нэрэмжэтэ Соёл урлагай колледждо мартын 2-3-да үнгэрхэ. Харин 4-эй үдэр үдэшын 17 сагта Ород драмын гүрэнэй театрта мүрысөөнэй финал үнгэрхэ юм.