​Баатар сэрэгшэдэй мүнхэ дурасхаалда

Афганистанда болоһон дайнда баатарлиг үхэлөөр унаһан ма­най нютагай сэрэг­шэдэй мүнхэ дурасхаалда зорюулагдаһан бага футболоор мүрысөөн заншалта ёһоороо Улаан-Үдэдэ эмхидхэгдэбэ.

1989 оной февралиин 15-да һүүлшын совет сэрэгшэ Афганистанһаа гаргагдаа бэлэй. Тус үйлэ хэрэгтэ зорюулагдажа, 25 жэлэй саада тээ Буряад Уласай индустриальна техникумдэ энэ мүрысөөн үнгэргэгдэжэ эхилээ һэн. Афган дайнай ветеран Эрдэ­ни Кимович Доржиевай энэ хэм­жээ ябуулгые таһалгаряагүйгөөр эмхидхэжэ байһаниинь һайшаалтай.

Мүнөө жэлдэ энэ үйлэ хэ­рэгэй 25 жэлэй ойн баяртай дашарамдуулагдаһан мүрысөөндэ Монголой, Тыва Уласай, Үбэр Бай­галай хизаарай болон Буряадай хэдэн аймагуудай 43 команда су­глараа. Нээлгын баяр ёһололой үедэ мүрысөөндэ хабаадагшадые Буряад Уласай Толгойлогшын болон Засагай газарай захиргаа­най хүтэлбэрилэгшэ Пётр Носков, Арадай Хуралай һунгамал Сергей Дроздов болон Улаан-Үдэ хотын мэр Александр Голков гэгшэд амаршалаа. Афган дайнай вете­рануудта хүндэлэлэй тэмдэгүүд болон Баярай бэшэгүүд барюу­лагдаа.

Заншалта ёһоороо тус мүрысөөн олимпийскэ гуримаар үнгэргэгдөө. Эдэ мүрнүүдэй ав­тор энээниие ехэтэ буруушаана. Манай һанахада, мүрысөөнэй шэнэ гурим хараалха хэрэгтэй. Холоһоо ерэһэн наадагшад орой­доол нэгэ уулзалга үнгэргөөд, гэртээ бусаха баатай болоно. Тиигэжэ бүхы бэлдэлгэнь дэмы һалана бшуу. Мүрысөөндэ ерэһэн хадаа заабол гурбан наада үнгэргөө һаань, таатай байгаа. Энээн тухай бодожо үзэхэ хэрэг­тэй гэжэ һанагдана.

Тус мүрысөөндэ талмайн эзэд, индустриальна технику­мэй оюутад, түрүү һуури эзэлбэ (гэрэл зураг дээрэ). Һүүлшын уулзалгада тэдэ “Сла­ва” командые 1:0 гэһэн тоотой­гоор илажа гараа. Гурбадахи һуури эзэлхын түлөө нааданда 64-дэхи һургуулиинхид 4-дэхи һургуулиин командые шүүжэ шадаа.

Бүхы наадануудай һүүлээр тусхай шангуудта хүртэхэ фут­болистнуудай нэрэнүүд тодороо. Буряад Уласай индустриальна техникумэй бартаа хамгаалаг­ша Мунко Ангархаев болон ка­питан Антон Соломатин гэгшэд тус тустаа “Эрхим вратарь” ба “Эрхим наадагша” гэһэн нэрэ зэргэнүүдтэ хүртөө. Бато Ван­чиков (“Слава” команда) “Эрхим добтологшо”, 64-дэхи һургуулиин Жаргал Доржиев “Эрхим хамгаа­лагша” болобод.