БАСКЕТБОЛ
Февралиин 10-11-эй үдэрнүүдтэ Улаан-Үдэдэ баскетболоор һургуулиин хүүгэдэй дунда уласай мүрысөөнэй финальна шата үнгэргэгдэхэнь.
“КЭС-баскет” гэжэ нэрлэгдэһэн бүхэроссиин хэмжээнэй эхилһээр 10 жэлэй баяртай тус мүрысөөн дашарамдуулагдана. 2016-2017 онуудай һуралсалай жэлдэ дээрэ нэрлэгдэhэн мүрысөөнэй уласай шатада һургуулинуудай 322 команда хабаадаа. Һүүлшын шатада оройдоол дүрбэ-дүрбэн басагадай болон хүбүүдэй команданууд оронхой.
«People,s Park» гэһэн худалдаа наймаанай түбэй спортын танхим соо эдэ нааданууд февралиин 10-11-дэ үглөөнэй 11 сагһаа эхилхэ.
ФУТБОЛ
“Үбэлэй бүмбэгэ-2017” гэһэн нэрэтэй Буряад Уласай үбэлэй чемпионат февралиин 11-дэ түгэсэхэнь. ВСГУТУ-гай стадион дээрэ 12 саг 30 минутада талмайн эзэдэй “Локомотив” командатай 3-дахи һууриин түлөө наадан эхилхэ. Үдэрэй 13 саг 40 минутада түрүү һууриин түлөө БГУ болон “Ветераны” гэһэн команданууд уулзаха.
БАРИЛДААН
1997-1999 онуудай эдиршүүлэй дунда Буряад Уласай чемпионат февралиин 18-да Борсоевой нэрэмжэтэ үйлсын, 7а гэһэн байшанда оршодог спортын танхим соо үнгэрхэ гэжэ дуулгая. Эндэ шалгарһан барилдаашад Буряадай суглуулагдамал командын бүридэлдэ оруулагдажа, бүхэроссиин хэмжээнэй мүрысөөнүүдтэ хабаадаха эрхэдэ хүртэхэ.
БАГА ФУТБОЛ
“Бага футбол – дээдэ һургуулида” гэһэн бүхэроссиин түсэл Буряад Уласта нэбтэрүүлэгдэжэ байна. Тэрэнэй уласай шата февралиин 23-26-ай үдэрнүүдтэ ФСК-да болохо юм. Эндэ түрүүлһэн оюутадай команда Сибириин тойрогто Буряадые түлөөлхэ юм.
БУРЯАД ШАТАР
Сагаан һарын һайндэртэ зорюулагдажа, буряад шатараар мүрысөөн хоёрдохи жэлээ эмхидхэгдэнэ. Нютагаархидай эблэлнүүдэй команданууд сагаан-хара хюлгэнүүд дээрэ мүрысэхэ. Февралиин 25-да үглөөнэй 10 сагта Худалдаа наймаанай-экономическа техникумэй номой сан соо нааданууд эхилхэ юм.