Февралиин 5-да Буряадай оперо болон баледэй театрай байшан соо дуу, хатарай «Байгал» театрай дуушан Бүтидэй Дондок-Сэрэнэй зохёохы ажалай 10 жэлэй тоосоото тоглолто үнгэрбэ.
Театрай байшан соо нэгэшье сүлөө һуури үгы, танхим дүүрэн байжа, дуушанай бэлиг сэгнэгшэд, буряад дуунда дуратай хүн зон ехэ хүхюу зугаатай, баяр баясхаланай оршон байдалда абтанхай байгаа һэн. Уданшьегүй хүшэгэ нээгдэжэ, ирагуу хонгёо хоолойтой Дондок-Сэрэн гүнзэгы удхатай урданай дуунуудые жэнхэни буряад маягаар зэдэлүүлжэ эхилбэ. Түрүүшын «Булган зөөтэй халтар» гэһэн дуу дуулаһанайнь удаа тайзан дээрэ «буряадай гургалдай» гүүлэдэг арадай дуушан Буда-Ханда Дашиева гаража, залуу дуушанда хүхэ, сагаан хадагуудые барюулжа, бэлиг талаангыень үндэрөөр сэгнэдэгээ мэдүүлһэн байна. Мүн тиихэдэ Буряад Уласай арадай дуушад Сыдып Банчикова, Сэсэг Сандипова, Цыпилма Аюшеева, Балданцэрэнэй Баттувшин, габьяата дуушад Даваа Дашинорбоев, Баир Табхаров, Аюр Догданов, театрай хүтэлбэрилэгшэ Ородой Холбооной Уласай соёлой габьяата хүдэлмэрилэгшэ Дандар Бадлуев гэгшэд Дондок-Сэрэниие амаршалан дэмжэлсэжэ, суг хамта олон дуунуудые дуулалсаа һэн. Дуунуудыень театрай оркестр, «Эрдэни ятаг» гэһэн бүлэг болон хатаршад шэмэглэһэн байна.
Шэнэхээн нютагһаа гарбалтай Буряад Уласай габьяата дуушан Бадма-Ханда Аюшеева нютагайнгаа хүбүүе амаршалаад, арадай «Яахаш хүнбиб» болон олондо мэдээжэ «Эжыдээ» гэһэн дуунуудые хангюурдажа, харагшадые хужарлуулба.
– Би Дондок-Сэрэнэй тоглолтодо Москва хотоһоо зорижо ерэбэб. Халуун альга ташалгаар манай Дондок-Сэрэниие угтажа, дэмжэжэ байһан таанадта, харагшадта, ехэ баярые хүргэнэб. Саашадаа Дондок-Сэрэн бүхы буряад арад түмэнөө дэлхэй дээрэ суурхуулжа байха гэжэ найданаб. Мүн тиихэдэ өөрынгөө түрэл «Байгал» театртаа, Дандар Жаповичта маанадые, газаа талаһаа ерэһэн зон гэжэ голонгүй угтан абаад, дэмжэжэ, «хүлыемнай дүрөөдэ, гарыемнай ганзагада» хүргэһэндэнь доро дохин, һайниие хүргэхэ байнаб. Дондок-Сэрэндээ ажалдань үндэр амжалтануудые хүсэнэб, – гэжэ тэрэ баярай үгэнүүдые хэлээ.
Энэ үдэшын үшөө нэгэ баяр гэхэдэ, дүү хүбүүгээ амаршалжа, Дондок-Сэрэнэй эгэшэ Номин «Уулза гол» гэһэн урданай дуу дуулажа, мүн лэ хонгёо хоолойгоороо зониие баясуулба.
Дуушан болохоб гэжэ һанаагүйб
– «Басаган хүн харида» гэжэ би нүхэртэеэ 2004 ондо Буряад Улас ерэжэ, Хори аймагай Ашанга һууринда олон жэлдэ малда ажаллаабди. Мүнөө Улаан-Үдэ хотодо ажаһуунабди. Манай нагасанар ехэ дууша угтай байһан юм. Дондок-Сэрэнэй багадаа дуулажа ябадагыень һанадаггүйб, ехэ номгон, даруу зантай юм һэн. Ахань дуулажал ябагша һэн, – гэжэ Номин эгэшэнь хөөрэнэ.
Үнэхөөрөөшье, мүнөө сагта хаража байхада, бүһэтэй зон сооһоо Бүтидэй Дондок-Сэрэн буряад арадай урданай дуунуудые дууладаг аха захатан болоод байна гэхэдэ, алдуу болохогүй. Анхан Ородой Холбооной Уласай габьяата дуушад Ц. Хоборков, Ч. Генинов болон Д-Д. Базаров гэгшэд дууладаг байһан гэжэ мэдээжэ. «Байгал» театрта Дондок-Сэрэнтэй хамта һүүлэй 3-4 жэл соо Зэдэ нютагһаа гарбалтай Алдар Дашиев арадай дуунуудые дуулалсана.
Бидэ тоглолтын урда Дондок-Сэрэнтэй уулзажа, хэдэн асуудалнуудые һураһан байнабди.
– Өөр тухайгаа тобшохоноор хэлэжэ үгыт.
– Би Буряад нютаг 2007 ондо ерэһэн байнаб. Бодоод үзэхэдэмни, нюдэ сабшаха зуура арбан жэл үнгэршэбэ. «Байгал» театрта хүдэлжэ эхилһээр тэбхэр арбан жэл болобоб. Саг ехэ түргэн байна.
– Та Буряад орон ерэхынгээ урда тээ Шэнэхээн нютагтаа дуу дууладаг байһан гүт? Хүгжэмэй ямар һургуули дүүргэһэн байнабта?
– 2002 ондо дунда һургуулияа дүүргэхэдээ, тон дуушан болохом гэжэ тэгүүлжэ ябаагүй хүнби. Тиигэбэшье Хүлэн Буйр хотодо хүгжэм дуунай тусхай мэргэжэлэй һургуулиин вокальна таһагта 4 жэл һуража гараад, Хүхэ хото ошожо, 2 жэлэй туршада дуунайнгаа мэргэжэл мүлижэ, шадабарияа дээшэлүүлээб. Һүүлээрнь нютагайнгаа сомоной засагай газарай соёлой таһагта хүдэлжэ байтарни, даргамнай: «Ши аяар 6 жэл соо уртын дуушанай мэргэжэлдэ һуража гараад, миин соёлой хүдэлмэришэнөөр хүдэлжэ ябахагүй байгааш. Үбэр Монголдо уртын дуушадай урилдаан болохонь, тэндэ ошожо хабаадалса», – гэжэ дурадхаа һэн. Тиихэдэнь ехэ бэлдэншьегүйгөөр ошоо һэм. Мүрысөөндэ 169 уртын дуушад хабаадалсахаяа ерэнхэй байгаа. Түрүүшын шатын һүүлээр 35 дуушадые үлээгөө. Гэнтэ мэдэхэдээ, тэдэнэй тоодо орошоһон байгааб. Буруу харана гүб гэжэ этигэжэ ядаа һэмби. Хоёрдохи шатада ондоо дуунуудые дуулаха ёһотой байгаабди. Хоёрдохи шатын hүүлээр финалда ороһон 12 хүнэй тоодо баһа орошооб. Энэнь намайе урмашуулаа, ехэ түлхисэ боложо үгөө һэн. Гурбадахи шатада бэлдэхэдээ, дууладаг дуунуудаа ухаандаа һэргээжэ, ямарыень дуулахаяа бодооб, шэбшээб. Хажуудамни зүбшэн хэлсэхэ, сэдьхэлэйнгээ һанал бодолые хубаалдаха хүн байгаагүй. Гансаараа ерэшоо ха юмбиб, багшашьегүй. Тиигэжэ энэ мүрысөөндэ гурбадахи һуури эзэлээ һэмби. Энэмнай 2005 он байгаа.
– Гэр бүлэ тухайгаа хэдэн үгэ. Хэнтнай дууладаг байгаа гээшэб?
– Минии эжымни ехэ һайхан хоолойтой, гоёор дууладаг һэн. Эгэшэ, аханарни бултадаа дууладаг. Гэр бүлэдөө 9 үхибүүдэй эгээ одхонииньби. Мүнөө Улаан-Үдэ хотодо гансал эгэшэмни гэр бүлэтэеэ ажаһуудаг юм. Бэшэмнай булта нютагтаа. Тиимэһээ бүри багаһаа аялга дуунай оршон байдалда үндыһэн хадаа дуулаха дуратай, ольһотой хүн гүб гэжэ һанагшаб.
– Нютагаа хэр удаан боложо ошонот?
– Хаанашье ябахада, нютагай татаса гэжэ заатагүй байдаг гээшэ ааб даа. Түрүүшэгээр ерээд байхадаа, нютагаа, түрэлхидөө һанадаг һэнби. Мүнөө нэгэ бага дадаа гээшэ гүб. Тиигэбэшье ошохоёо һанабал, ямаршье сагта ошодогби. Мүнөө сагта харгы зам гэжэ тиимэ хүндэ бэшэ ха юм даа.
– Монголнуудые гү, али танай Шэнэхээн нютагайхидые хаража байхада, дууладаггүй хүн үгы гэжэ һанахаар байдаг. Дуунай, дуушанай үүргэ ямар гээшэб?
– Хүн бүхэн хоолойтой, хоолойшьегүй һаа, дуулаха дуратайл ябадаг ха юм. Дуун гээшэмнай хүнэй сэдьхэлэй байдалда ехэ нүлөө үзүүлдэг гээшэ. Хүн ямар нэгэ уйдхар гашуудалда дарагдаад гү, али бодолгото болоод ябахадаа, дуу шагнажа, гунигаа тарааха, зүрхэ сэдьхэлээ урмашуулха, баясуулха байна ха юм. Би дуу дуулаха дуратай хадаа дуушан болохом гээд болодоггүй, харин саанаһаа табисуур, тусхай онсо бэлиг гэжэ байха. Буряад зон хадаа уг унгитай арад гээшэ аабза. Дууша угтай зон гэжэ баһал байдаг.
– Мүнөө сагта хүдөө нютагуудаар, аймагуудаар театр болон уран hайханай бүлэгүүдэй концерт наада табижа ябахань хомор болонхой. Энэ талаар танай түсэбүүд ямар гээшэб?
– Манай «Байгал» театр элдэб наадануудта хабаадажа, Эрхүү можо, Үбэр Байгалай хизаараар ябадаг гээшэ ааб даа. Теэд өөрынгөө программатай аймагуудаар ябаха хүсэл байгаашье һаань, баһа мүнгэ алтанай талаар хүндэ ха юм даа. Гансаараа гараад ябашаха бэшэ, харин хажуудаа хүгжэмшэн, бүжэгшэн гээд лэ, хамта ябаха болонобди. Унаашье хэрэгтэй.
– Ургажа ябаһан дуушад гэхэдэ, урданай, уртын дуу дууладаг залуу һүрэг хэр гээшэб? Тэдэнэртэй өөрынгөө дүй дүршэлөөр хубаалдаха, заажа үгэхэ тиимэ тусхай ябуулганууд тухай хэлэжэ үгыт.
– Би өөрөө һанадагби: урданай дуунай оршондо мэдээ орохоһоо хойшо үндыһэн тула буряад арадайнгаа уртын дуунда онсо хандасатай, сэдьхэлдээ, ухаан бодолдоо шэнгээһэн байгдана. Залуу зондо дуунай талаар шадаха, мэдэхэ юумээрээ хубаалдахаяа һанадагби. Харин мүнөө дээрээ тон ялас гэмэ, гоё һайхан хоолойтой, арадай дуу дуулаха сэдьхэлтэй хүн хомор болонхой гээшэ гү, али урданайнгаа буряад дуунда хүн дурагүй болошоһон гээшэ гү гэжэ һанамаар. Мүнөөнэй залуу дуушад ехэнхинь зохёогшын (авторска) дуунуудые дуулана ха юм даа. Зохёогшын дуун уртын дуунда орходоо, ондоол юм аабза. Буряад арадаймнай түүхэ, хэлэн аргагүй баян, уг изагуурынь айхабтар гүнзэгы. Буряад арадай дуун соо буряад зоной бүхы юумэн: эжы, аба, ёһо заншал, табан хушуу мал, амидаржа байһан нютаг, уһан, тала дайда, хада уула, шубуу шонхор гэхэ мэтэ – булта магтажа дуулагдадаг, гүн удхатай байдаг. Тиимэһээ мүнөө минии урданай дуу дуулажа ябаһамни, зүбшье юм гү гэжэ һанагшаб. Дуулажа ябадаг дуунууд соомни буряад арадаймнай юрын амидарал, түүхэ тэрэ шэгээрээ дамжуулагдаһан байдаг гэжэ һанадагби.
– Хэдэн жэлэй хугасаа соо тайзан дээрэ дуулажа ябахадаа, хаанаһаа шэнэ шэнэ дуунуудые оложо, өөрынгөө репертуарта оруулна гээшэбта?
– Тиимэ даа. Нэгэл дуугаа дуулажа ябагдадаггүй. Нютагаа ошохо бүхэндөө ахамад, наһатай зонһоо хоёр- нэгэшье һаань дуу бэшэжэ абадагби. Мүн баһа багаһаа хойшо мэдэжэ, дуулажа ябаһан дуунуудни хэдэн зуугаад байха. Тэдэнээ дахин һэргээжэ, тоглолтонуудтаа дабдахагүй гэжэ оролдон, удха түгэлдэр үгэтэй, һайхан аялгатай дуунуудые шэлэжэ дуулахые оролдодогби.
– Һайн даа, саашанхи ажалдатнай амжалта хүсөөд, арад зоноо баясуулжа, сэдьхэлэй тэжээл болохо һайхан дуунуудаа зэдэлүүлжэ ябыт даа гэжэ хэлэхэ байнабди.