“Хараасгай” гэжэ нэрэтэй хүүгэдэй сэсэрлиг Ярууна аймагай Нарһата тосхоной баруун урда зүгэй 90 үхибүүдые амжалтатайгаар хүмүүжүүлнэ. Тэндэхи хүүгэд Буряад Уласай Арадай Хуралай һунгамалнуудые Улаан Яруунын соёлой байшан соо гоё хатараараа, дуугаараа баясуулба.
Хүндэтэ айлшад шангаар альга ташажа, багахан “хараасгайнуудые” угтан абаа. Тэдэниие сэсэрлигэй хүмүүжүүлэгшэд бэлдэһэн байна. Юуб гэхэдэ, “Хараасгай” соо хүгжэмэй болон хатар һургадаг багша үгы юм.
90 үхибүүд гурбан наһанай бүлэгтэ хубаагданхай. Зургаатайһаа дээшэ наһанай 25 хүбүүд, басагадые элдэб арадуудай болон буряад угсаатанай дуу, хатарта Чимита Жалсановна Батомункуева һургана. Тэрэ өөрөө бэлигтэй хүмүүжүүлэгшэ юм. Дунда наһанай бүлэгтэ Светлана Бадраевна Раднаева шадамар бэрхээр 40 үхибүүдтэй хүдэлнэ. Энэ наһанай хүүгэдые гэрэл зураг дээрэ харанат. Тэдээнтэй Ольга Даниловна Гынденова хүмүүжүүлэгшэ хүдэлдэг байна.
Ольга Даниловнагай хэлэһээр, буряад хэлэ, ёһо заншал хүүгэдтэ ходо заагдажа байдаг.
“Хараасгай” сэсэрлигэй хүтэлбэрилэгшэ Жаргалма Цыден-Ешиевна Тышкенова 2016 оной Сагаалганай үедэ сэсэрлигэй хүүгэдэй дунда “Гэсэр-Дангина” урилдаа эмхидхэхэ тухай дурадхахада, бүхы Ярууна аймаг соо дэмжээ. Түрүүшын энэ мүрысөөндэ аяар 19 багахан хүбүүд, басагад бэлигээ харуулаа. Тиихэдэ “Гэсэр” гэһэн үндэр нэрэ зэргэдэ Эгэтын-Адагай хүбүүн эзэлээ. Тиимэһээ мүнөө жэлэй мүрысөөн Эгэтын-Адагта болохоор хараалагдана.
Тэрэ жэл бидэ энэ томо аймагай мүрысөө Улаан Яруунынгаа шэнэ соёлой байшан соо эмхидхээбди. Һаруул клуб дотор олон тоото һайндэрнүүдээ эмхидхэжэ баярланабди, - гэжэ хүмүүжүүлэгшэ Ольга Гынденова хөөрэнэ.
“Хараасгай” гэһэн сэсэрлиг үшөө 20-дохи зуун жэлэй 70-аад онуудта бодхоогдоһон байшан соо түбхинэнэ. Хэды заһабарилга тэрээн соо болобошье, мүнөө сагай эрилтэдэ тааранагүй.
Борис Балдановай гэрэл зураг
Эдир "хараасгайнууд" хатаржа байна
Борис Балдановай гэрэл зураг
Сэсэрлигэй хүмүүжүүлэгшэд