​Һур харбагша басагаднай амжалта туйлаба

Орёл хотодо үнгэргэгдэһэн Ород гүрэнэй чемпионат болон Кубогта хүртэхын түлөө мүрысөөнүүдтэ Татьяна Бильтрикова аяар дүрбэн алтан медаль абажа шадаба. Бүхы дээрээ Буряадай харбагшад долоон медальда хүртөө.

Ородой Холбооной Уласай үбэлэй чемпионадта хэзээ хэзээнэйхиһээ олон тамир­шад суглараа. Эндэ 37 можо, хизаарнуудай 307 хүн хаба­адаба. Эндэ Буряад Уласай тамиршад гурбан медаль абаһан байна.

Эхэнэрнүүдэй дунда клас­сическа номо һуршаар хар­балгын финалда Татьяна Бильтрикова Олимпиин на­адануудта хүрэл медальда хүртэгшэ Инна Степановае илажа гараа.

Командна тоосоондо Бу­ряадай эхэнэрнүүдэй ко­манда түрүүлээ. Татьяна Бильтрикова, Наталья Эрды­ниева болон Виктория Бу­даева гэгшэд Үбэр Байгалай хизаарай эхэнэрнүүдые фи­налда шүүһэн байна.

Кубогта хүртэхын түлөө мүрысөөн бүри олон тамир­шадые суглуулаа. Аяар 403 тамиршан эндэ хабаадаһан байна.

Эхэнэрнүүдэй дунда Та­тьяна Бильтрикова финалда Саха-Яхад Уласай тамиршан Евгения Тимофеевае илажа, Ородой Кубогта хүртөө. Ху­биин тоосоондо Баир Цыбек­доржиев шангай гурбадахи һуури эзэлээ.

Командна тоосоондо Бу­ряадай суглуулагдамал ко­манданууд хоёр алтан медаль абаба. Эрэшүүлэй командын бүридэлдэ Базаржап Цыбе­нов, Баир Цыбекдоржиев, Эрдэм Цыдыпов мүрысөө. Эхэнэрнүүд Татьяна Биль­трикова, Наталья Эрдыние­ва болон Виктория Будаева харбаһан байна.

Тус мүрысөөнүүдтэ шалгарһан тамиршад Ород гүрэнэй суглуулагдамал ко­мандын бүридэлдэ оруу­лагдаад, март һарын эхиндэ Францида болохо Европын чемпионадта хабаадаха эрхэ­дэ хүртэбэ. Теэд хэн һоригшые уласхоорондын хэмжээнэй энэ мүрысөөндэ абахаб гэжэ үшөө мэдэгдэнэгүй.