Байгша оной февралиин зургаанда Мухар-Шэбэр аймагта үсөөн үзэгдэдэг баяр болобо. Мандари Дымбрыловна Дымбрылова тэбхэр зуу наһатай боложо, үхи хүбүүдээ, аша зээнэрээ, гуша, дүшэнэрөө болон засаг түрын газарай хүтэлбэрилэгшэдые хүлгөөбэ.
Али олон нютагуудһаа аша ехэтэ хүгшөөгөө ойн баяраарнь амаршалхын түлөө нэбшэгэрээрээ ерэһэн үри һадаһадһаань гадна Мухар-Шэбэр аймагай Һунгамалнуудай зүблэлэй түрүүлэгшэ Ольга Симухина, ниигэмэй хангамжын таһагай дарга Тамара Лаптева, аймагай Ветерануудай соведэй түрүүлэгшэ Валерий Хаптуев, аймагай сэрэгэй комиссар Батор Лхасаранов, Боом һууринай сомоной дарга Бэлигтэ Тыкшеев болон нютагай Ветерануудай соведэй түрүүлэгшэ Людмила Гончикова гэгшэд Түгнэ нютагта Ханда басагандаа байдаг гэртэнь айлшалан, зуу наһатада Ородой Холбооной Уласай Юрэнхылэгшэ Владимир Путинай, Буряад Уласай Толгойлогшо байһан Вячеслав Наговицынай болон Мухар-Шэбэр аймагай засаг дарга Владимир Молчановай Хүндэлэлэй грамотануудые баярай оршондо дамжуулан уншажа үгөөд, гарай бэлэгүүдые мүнгэн нэмэритэйгээр барюулба.
Түхэреэн сагаан Түгнын дунда голһоо тээ дээхэнүүр оршодог Боом нютагай хойнохи Баян Хара уула үбэлэй һаари хүйтэндэшье оройгоороо уняартан манаржа, тала дайдаяа сахижа һууһан ара, үбэрэй орьёлнуудай нэгэ харуул мэтээр һүрөөтэйгээр холоһоо мандайн харагдадаг юм. Тэрээнэй ара талаар Сагаан дабаанай һубаряа хүтэлнүүдые сүм хушаһан хүбшэ тайга нэмжыдэг, харин тээ наагуурнь нэмжыгээшэ хадалиг нарин талада анхан Хабшараанга гэдэг үзэсхэлэн һайхан нютаг оршодог бэлэй. Тус нютагта тэбхэр зуун жэлэй саана, 1917 оной февралиин 6-да, малша айлай гэр бүлэдэ золтой басаган Мандари түрөө юм. Тэрээнэй эжы Ринчинэй Сэбэгмид гэгшэ Эсэгэ ороноо хамгаалгын Агууехэ дайнай эрхим бэрхэ сэрэгшэдэй нэгэн болохо мэргэн буудагша Сэрэндаша Доржиевай эсэгэ Доржо дарханай дүү басаган байгаа. Дүтынь элинсэг хулинсагуудыень Сэбэгмид эхынь талаар харахада, саанань дархашуул Ринчин, Мэргэн, Үнэнхэ, Һарюута гээд, угайнь бэшэг архивай дансанууд соо таһалдадаг. Доржо дарханһаа наашалбал, тэрээнэй хүбүүн суута Сэрэндаша, Далай, удаань тэрээнэй хүбүүн - эдэ мүрнүүдэй автор ябана. Минии хоёрдохи хүгшэн эжы болохо Мандари төөдэй элүүр энхэ зандаа, хараа муутай дээрэһээ харууһанда ороошье һаа, һэргэлэн һонор ухаагаараа, гүн сагаан сэдьхэлээрээ олоной амиды бурхан болонхой, хоймортоо нам һуугаад, ажабайдалаа дурсан дурсан, суута дархашуулай шадалтай гэр бүлэдэ түрэһэнөө, гушаад онуудаар Сэрэндаша Доржиевай мотоцикл унаатай байһые, яагаад гэр бүлөөрөө хамалган сүлэлгэндэ ороһые, Енисей мүрэнэй эрьеэр зобоһон тулиһанаа, 15-тайдаа яажа бусаһанаа, дайнай үедэ болон һүүлээрхи жэлнүүдтэшье хүдөө ажахыда харанхыһаа харанхы болотор хүдэлһэнөө, гэр бүлэ болоһоноо удхалан хөөрэжэ һуухадань, манай ороной, арад зоной тобшо түүхэ номой хуудаһа ираһандал эльгэ зүрхэ хүмэреэнэ.
- Эжы, иимэ үндэр наһа наһалха ямар нэгэн нюуса бии гээшэ гү?
- Ямар тиимэ нюуса нөөсэ байха һэм даа. Эдидэг юумэеэ эдеэд лэ, гансал үлүү гараса бэшэ, үлдэхэ сагта үлдөөд лэ, дэн ехэ бэшээр үлдэхэ гээшэ бэе махабадта баһа хэрэгтэй! Архи тамхяа татаад лэ – халтал заримдаа хүртэхэдэ болоно, - гимнастикын орондо һайса хүдэлөөд лэ ябахадаа, хэнтнайшье зуу хүрэхэ даа, - гээд, налгай илдамаар энеэнэ. – Тиихэдэ масаглаха гэжэ байха. Үбдөө һаа, хоол ехээр барингүй, үбһэ ногоонойнгоо домдо хүртэбэл дээрэ гэжэ һанагшаб. Харин гол шухалань гэхэдэ, хамаг юумэн хүнэй һанаанһаа ааб даа. Үндэр дээдэ бодолтой, үндэр дээдэ һанаатай, зула мэтээр бадаржа ябагты! Һанаһан юумэнтнай номой ёһоор бүтэжэ байхань болтогой! – гэжэ зуу наһата хоёр альгаа хабсаран наманшалжа, хойтохи үетэнөө болон арад зоноо үреэнэ.