​​ЭХЭ ХЭЛЭЭР ЭЭЛЖЭЭТЭ МҮРЫСӨӨН

Буряад хэлээр һурагшадай дунда эмхидхэгдэдэг заншалта болоһон «Эхэ хэлэн – манай баялиг» гэһэн мүрысөөн арбан зургаадахияа үнгэргэгдэжэ байна.

Ород гүрэнэй Буддын шажантанай заншалта Сангхын Бандида Хамба лама Дамба Аюшеевэй үүсхэлээр болон тэрэнэй харгалзалга доро болодог тус хэмжээ ябуулга энэшье удаа үргэн дэлистэйгээр эмхидхэгдээ.

Олон тоото лама санаартан, багшанар, түрэлхид, сэтгүүлшэд, буряад хэлэ шэнжэлэгшэд, тэрэниие дэлгэрүүлэгшэд болон уран гартан Ивалгын дасанда үглөөнһөө хойшо үймэлдэжэ байнад. Буряад Уласай аймагуудһаа, хүршэ можо, хизаарһаа сугларһан һурагшад элдэб бүлэгүүдээр хубааржа, эрдэм мэдэсэеэ, хүсэ шадалаа, бэлиг талаангаа хёрхо жюриин урда харуулнад.

Засагай зургаануудай түлөөлэгшэд – Арадай Хуралай Можонууд хоорондын холбоонуудай, үндэһэ яһатанай асуудалнуудай, залуушуулай бодолгын, олониитын болон шажан мүргэлэй нэгэдэлнүүдэй талаар хорооной түрүүлэгшэ, түүхын эрдэмэй доктор Цыденжап Батуев, Хяагта болон Ивалга аймагуудай засаг дарганар Александр Буянтуев, Виктор Очиров гэгшэд мүрысөөндэ хабаадагшадые шагнаха харахаяа, дэмжэхэеэ ерэнхэй байнад.

Энэ удаа мүрысөөнэй эбээн тэдхэгшэнь «Титан» хамжаан болоо. Тэрэнэй хүтэлбэрилэгшэ Вадим Бредний, мүрысөөндэ хабаатай бусад тушаалтад Хамба ламатай хамта һайндэр нээлгын баяр ёһололдо хабаадалсажа, һурагшадай болон томошуулай урда үгэ хэлэхэдээ, боложо байһан үйлэ хэрэгэй ехэ удха шанарые онсолон тэмдэглээ.

Вадим Бредниин хэлэһээр, хэдэн жэлэй туршада «Титан» хамжаан энэ мүрысөө дэмжэжэ байна. Тиихэдээ ехэ бодолтойгоор, харюусалгатайгаар энэ хэрэгтэ хандадагаа олзын хэрэг эрхилэгшэ дуулгаа. Энэ удаа 500 мянган түхэриг мүнгэ һомолжо, тус мүрысөөнэй гаргашануудые хаабабди гээд тэрэ тэмдэглэһэн байха юм.

Үндэһэн хэлэн дээрээ тордиһогүйгөөр хэлэжэ, бэшэжэ шадаха, уран дарха хэхэ хүбүүд, хубсаһа оёдог басагад хаа-хаанаһаа суглараад, мүрысөөнһөө мүрысөөндэ мүлижэл байнад шадабаряа. Энэнь эхэ хэлэнэймнай мүнөөдэрэй һайндэртэ эли харагдана.