744
“Захааминай малшад – нютагай баялиг” гэһэн удаан болзорой түсэл мүнөө жэл мартын 10-һаа үргэлжэлүүлэгдэхэнь. Энээн тухай Захаамин аймагай засаг дарга Сергей Гонжитов мэдээсэлэй “Буряад үнэн” албанда дуулгаба.
Захаамин аймагай захиргаан нёдондонһоо энэ түсэл бэелүүлжэ эхилһэн юм. Түрүүшынь шата 2016 оной февраль һарада болоо. Федеральна, уласай болон аймагай захиргаанай хүтэлбэрилэгшэд болон мэргэжэлтэд тиихэдэ табан бүлэг боложо хубаараад, малшадай байрладаг бууса, үбэлжөөнүүдээр ябажа, ажалша, малша, хүдэр бүхэриг хүдөө зонтой золгоо һэн.
Энэшье удаа элүүрые хамгаалгын, эрдэм һуралсалай, соёлой, олондо мэдээсэл тараадаг хэрэгсэлнүүдэй, аймагай номой сангай, Пенсиин жасын, мал эмнэлгын газарай, ойн болон зайн галай ажахынуудай, дотоодын хэрэгүүдэй таһагай, газарай харилсаануудай талаар мэргэжэлтэд холын заямха, буусануудта хүнгэн бэшэ ажал хэжэ, ажахы эрхилжэ байһан зонтой уулзаха юм. Олон ондоо албануудай түлөөлэгшэд байра байдалаарнь һонирхожо, хэрэгтэй һаань, малшадта туһалха, хангалтануудые бүримүһэн үзүүлхэ болонод.
– Энэ түсэл бэелүүлхэдээ, шэнэ юумэ бидэ зохёоно бэшэбди. Урданай сагай, хамтын ажахынуудай байһан совет үеын дүй дүршэл һэргээгдэнэ гээшэ. Холуур таража ажаһуудаг малша зондоо анхаралаа хандуулха хэрэгтэй. Үнэхөөрөөл эдэ зомнай – нютагаймнай сэгнэшэгүй ехэ баялигынь болоно гээшэ – гээд, Захаамин аймагай засаг дарга Сергей Гонжитов хэлэнэ.
Түрүүшын шатын үнгэрһэнэй һүүлдэ шэнжэлэлгын ажал хэгдэжэ, зарим тэды дүнгүүд согсологдоо юм ааб даа. Түсэлэйнгөө хүсэтэйшье, тулюурханшье талануудынь эмхидхэгшэд мэдэжэ абаа. Малшад өөһэд хоорондоо дүй дүршэлөө хубаалдажа баясаа. Аймагай дарга малшадтаяа нюур нюураараа уулзахадаа, урдань зоной табиһан асуудалнуудые шиидхэхэ талаар хэмжээнүүдые абаха, һуудал байдалыень нюдөөрөө хараха аргатай бшуу.
Автор: Василий ЦЫБИКОВ
