Янжама Базарова, Максим Пущин
Һүүлэй жэлнүүдтэ гүрэн доторнай ажалай шэглэлэй мэргэжэлтэд хомор боложо эхилээ. Байдал заһаруулхын тула энэ асуудалда ехэ анхарал хандуулагдадаг болонхой. Тиигэжэ манай гүрэн 2011 ондо бүхэдэлхэйн WorldSkills гэһэн хүдэлөөндэ оролсоо. Харин Буряадтамнай ажалай мэргэжэлнүүдээр мүрысөөнүүд дүрбэдэхиеэ эмхидхэгдэбэ. Январиин 29- һөө февралиин 2 болотор залуу мэргэжэлтэд, оюутад, ахалагша ангинуудай һурагшад 24 шэглэлээр мүрысэбэ. 2017 онойхитой зэргэсүүлээд харабал, шэглэлнүүдэй тоо һураггүй олошорһон байна.
Буряад Уласай болбосоролой ба эрдэм ухаанай сайд Баяр Жалсановай хэлэһээр, WorldSkills манай нютагта хүгжэжэ байна.
- Мүнөө үедэ ажалай мэргэжэлнүүд залуушуулые һонирхуулдаг боложо байна. WorldSkills гэһэн нэгэдэл энээндэ тон ехээр нүлөөлнэ, - гэжэ Баяр Жалсанов тоолоно.
«Capital mall» гэһэн худалдаа наймаанай түбтэ болон дунда һуралсалай хэдэн эмхинүүдэй байшанууд соо мүрысөөнэй 7 талмай байгуулагдаа. Бүхы дээрээ 14-22 наһатай 177 хүн хабаадаһан байна. Улаан-Үдэ, Хабаровск, Новосибирск, Кемерово, Тольятти, Казань, Москва, Санкт-Петербург хотонуудһаа шүүгшэд ерэжэ, Буряадай хүбүүд, басагадай шадабари сэгнээ. Гагнууршан, электрик, тогоошон, үһэ абагша, компьютер заһагша, жолоошон, багша, эмшэн болон бусад мэргэжэлээр шанга мүрысөөн болоо гээшэ. Жэшээлбэл, тогоошодой дунда 11 хүн хабаадаа юм.
Залуу мэргэжэлтэдэй мүрысөө харахаяа һургуулиин үхибүүд олоор ябаһан байна. Энэнь һайшаалтай. Юуб гэхэдэ, удангүй тэдэ ерээдүйнгөө мэргэжэл шэлэхэ болоно бшуу. Тэдэнтэй һонирхолтой хөөрэлдөө шүүгшэд эмхидхээ.
Энэ мүрысөөн шэлэн абалгын шата гэжэ нэрлэгдээ. Түрүүлһэн залуу мэргэжэлтэд Сибириин федеральна тойрогой хэмжээндэ Буряад ороноо түлөөлхэ эрхэдэ хүртэнэ. Тэндэ амжалта туйлабалнь, август соо Южно-Сахалинск хотодо болохо Ородой чемпионадта сэхэ харгы тэдэнэй урда нээгдэнэ. Мүн тиихэдэ 2019 ондо дэлхэйн чемпионат Казань хотодо болохоор хараалагдана.
2017 ондо Буряадаймнай гурбан түлөөлэгшэ илагшадай тоодо ороо бэлэй гээд һануулая. Сибириин Гүрэнэй телекоммуникациин ба информатикын ехэ һургуулиин (СибГУТИ) һалбари болохо Буряадай инфокоммуникациин дээдэ һургуулиин оюутан Артем Матвеев “Компьютерай сүлжээ таталга болон заһабарилга” шэглэлээр 2-дохи һуури эзэлээ һэн. Энэл һалбарида һургуулиин ахалагша ангинуудай һурагшадай дунда Улаан-Үдэ хотын 32 дугаар һургуулиин шаби Артем Ефимов болон 19 дүгээр һургуулиин Владислав Есаулов түрүүлжэ гараа бэлэй.
Мүнөө жэлэй түрүү һуури эзэлэгшэдые Гүрэнэй Дүүмын һунгамал Алдар Дамдинов амаршалхаяа ерээ. “WorldSkillsRussia” гэһэн бүхэроссиин нэгэдэлэй таһагые даагша Оксана Орлова зорюута Москва хотоһоо ерээ.
Эмшэдэй түрүүшын шалгалта
Хүнэй хойноһоо хараха болон эмшэлхэ талаар мүрысөөн анха түрүүшынхиеэ Буряадтамнай эмхидхэгдэһэн байна. Эндэ Хабаровск, Хяагта болон Улаан-Үдэ хотонуудай, Селенгинск һууринай медицинскэ колледжнуудай 5 оюутан хабаадаба.
- Мүрысөөнэй талмай дээрэ больницынхидал адли байдал тогтоожо, үхибүүдэйнгээ түлөө һанаата болонобди. Мүн шүүгшэдшье һанаагаа зобоно. Юуб гэхэдэ, анха түрүүшынхиеэ иимэ мүрысөөндэ оролсоһондоо баяртайшье һаа, зосоомнай хүлгөөтэй, - гэжэ Улаан-Үдын медицинскэ колледжын багша Нина Сангадиева хөөрэнэ.
Ерээдүйн багшанарта найдая
Буряадай багшанарай колледжын үүсхэлээр World- Skills гэһэн мүрысөөндэ ерээдүйн багшанарай дунда харалган хэдэн жэлэй урда оруулагдаһан байна. “Бага ангинуудта заалга”, “Физкультура заалга”, “Хүгжэм заалга” болон “Һургуулида ороодүй хүүгэдые хүмүүжүүлгэ” гэһэн шэглэлнүүдээр мүрысөөн болоо.
Шүүгшэ Леонид Сиратовай хэлэһээр, физкультураар мүрысөөн WorldSkills-ын программада хоёр жэлэй саада тээ оруулагдаа. 2017 ондо Сочи хотодо үнгэргэгдэһэн Ородой чемпионадта Леонид Сиратов ахамад шүүгшээр хүдэлһэн юм.
- Физкультура яагаад заадаг бэ гэжэ бултанда мэдээжэ. Иимэ мүрысөөн болодог гэжэ дуулахадаа, ехэ гайхаабди. Физкультурын багша үшөө юу харуулха, зааха аргатайб гэжэ байгаад һанаата болообди. Танилсаһанайнгаа удаа үшөө ехэ юумэ оюутадтаа дамжуулнагүйбди гэжэ ойлгообди. Тиимэһээ энэ мүрысөөнэй ашаар манай оюутад бүри һайнаар эрдэмээ дээшэлүүлнэ, дүй дүршэлтэй болоно, - гэжэ Леонид Сиратов хөөрэнэ.
Ерээдүйн физкультурын багшанарай дунда Наталья Ульянова түрүү һуурида гараа. “Һургуулида ороодүй хүүгэдые хүмүүжүүлгэ” гэһэн шэглэлээр багшанарай колледжын оюутан Юлия Андреева “Росинка” гэһэн хүүгэдэй сэсэрлигэй залуу мэргэжэлтэн Оксана Бурковаһаа үлүү байгаа. Полина Шаренда болон Анастасия Матвиевская гэгшэд хүгжэмэй болон эхин ангинуудай багшанарай дунда шалгараа. Һонирхолтойнь гэхэдэ, эхин ангинуудай багшанарай дунда һургуулиин үхибүүд хабаадалсаа. Прибайкалиин аймагай Туркагай һургуулиин Ярославна Горбик болон Тарбагатай аймагай Доодо Саянтын Дарья Жданова гэгшэд эндэ шангай һууринуудые эзэлжэ, олон оюутадһаа бэрхэ байшоо.
Газар доро эхэнэрнүүдшье хүдэлхэ
Газарай хэлбэри шудалагшадай дунда мүрысөөн хэдэн жэлэй туршада үнгэргэгдэнэ. Эндэ Буряадай газар дорохи баялиг ашаглалгын колледжын оюутад Максим Пущин болон Янжама Базарова гэгшэд түрүүлһэн байна.
- Гурбан шанга даабари үгтөө. Нэн түрүүн ажалаа түсэблэһэн байнабди. Удаань тала гаража, хэмжэлгын ажал ябуулаабди. Удаань бүхы хэһэн юумэеэ нэгэдүүлжэ, дүн гаргаабди, - гэжэ Максим Пущин хөөрэнэ.
Янжама Базаровагай хэлэһээр, энэ мэргэжэлээр ехэнхидээ бүһэтэйшүүл хүдэлбэшье, эхэнэрнүүд баһа хүдэлхэ аргатай.
- Минии абгай геолог мэргэжэлтэй юм. Би багаһаа хойшо ажалаарнь һонирходог байгааб. Тиимэһээ “маркшейдер” мэргэжэлдэ һуража байнаб, - гэжэ Янжама Базарова хөөрэнэ. – Шудалһанаа газар дорохи шахта соо дабтан бэхижүүлхэеэ ошоһон байнабди. Түрүүшэгээр аймшагтай байгаа.
Үһэ абагшадай мүрысөөн
Хүнэй үһэ абадаг мэргэжэлтэдэй мүрысөөндэ хабаадагшад сооһоо Ангелина Базаровае нэрлэмээр. Энэ басаган эрхим табан хабаадагшадай тоодо оролсоо. Ангелина 12 дугаар һургуулиин 9-дэхи анги дүүргээд, үһэ абадаг мэргэжэлтэй болохомни гээд, Уласай олон шэглэлэй колледждо һурахаяа ороо.
Үһэшэн (парикмахер) Ангелина Базарова
- Бага наһанһаа хойшо хүүхэлдэйнүүдэйнгээ үһэ элдэбээр заһажа наададаг һэм. Мүн аха дүүнэрэйнгээ үһэ бага зэргэ абажа туршадаг байгааб, - гэжэ Ангелина Базарова хөөрэнэ.
Тус шэглэлээр хүнгэн бэшэ аяар дүрбэн даабари үгтөө. Хабаадагша бүхэн ута үһэтэй эхэнэрнүүдэй үһэ шэрдэхэ даабари нэн түрүүн абаа. Мүн тиихэдэ эрэ хүнэй зураг хараад, тэрээнииень һажаажа, тон адляар үһэ заһаха гэжэ оролдоһон байнад.
Гоё хубсаһа оёгшод
Агаһаа уг гарбалтай Адиса Батомункуева хубсаһа оёгшодой мүрысөөндэ хабаадаһан байна. Тэрэ Уласай олон шэглэлэй колледжын оюутан юм. Мүрысөөнэй дүнгөөр, Адиса 2-дохи һуури эзэлээ.
- Ехэ хүндэ даабаринууд үгтөө. Найман часай туршада бидэ һайхан дотортой пиджак оёхо ёһотой байгаабди. Мүн дотортой юбкэ оёхо болон сэхэ юбкые өөрын дураар ондоо болгохо гэһэн даабаринууд яһала хүндэ байгаа. Юуб гэхэдэ, иимэ ажал түрүүшынхиеэ дүүргээб. Урид ганса өөртөө пальто, юбкэ, халат бага-сага оёдог һэм, - гэжэ Адиса хөөрэнэ.
Оёдолшон Адиса Батомункуева
Борис БАЛДАНОВ
Борис Балдановай гэрэл зураг