979
Эхинһээнь эршэтэйгээр ажаллана
Баторай эсэгэ Илья Гармаев абынгаа буусада таряаша-фермерскэ энэ ажахые 30-аад жэлэй саада тээ байгуулаа. Тэрэ гэһээр энэ болотор Гэндэн Цыренов Баир Дамбаев хоёр үбэл зунгүй ажахыда ажаллана. “Гэндэн Дугаржапович бэрхэ ажалшан юм. Хошуун-Үзүүрэймнай, нютагаймнай ахатан гээшэ. Түрүү механизатор Баир Дамбиевичнай һаяхана 49-тэй болоо”, - гээд, залуу фермер хөөрэнэ. Мүнөөнэй сагта адуу малдаа элдэб үбшэ хабшанһаа һэргылэлгын тарилга табиха, бэеынь шалгаха гээшэ шухала гээд мэдээжэ. Эдэ бүгэдые дүй дүршэлтэй ветеринар Баир Дашибылович Дамбаев хэнэ. “Шэнэ байдалда” бүхыдөө 5-6 хүн ажалладаг. “Иигээд лэ сугтаа үдэр бүри үглөөнһөө үдэшэ болотор хүдэлдэгбди. Ажалнай эхи захагүй даа. Май һарын эхеэр зуһаландаа гарахабди”, - гээд, Батор Гармаев мэдээсэбэ.
Хамба лама айлшалаа...
Үнгэрһэн зун Түгнын дасанай дэргэдэ 16 субарга арамнайлалгын ёһолол үндэр хэмжээндэ үнгэргэгдөө һэн. Энэ үйлэ хэрэгтэ Хамба лама Дамба Аюшеев Мухар-Шэбэрэй аймаг морилходоо, “Шэнэ байдалай” зуһалан буужа, ажахын байдалтай танилсаа. Хони мал үсхэбэрилхэ талаар һонирхолтой хөөрэлдөөн болоо.
Хүрьһэтэ газар хүсэ шадал үгэдэг
Батор Гармаев үбгэ эсэгэнэрэйнгээ газар дээрэ табан хушуу малаа үдхэжэ байхадаа урматай. Хүлөө шоройдожо, хүн болоһон тоонто нютагһаа алтан энэ дэлхэй дээрэ үлүү һайхан юумэн юун байхаб? Батор Гармаев хүрьһэтэ газарһаа хүсэ шадал абаад, ажалаа улам урагшатайгаар ябуулха гэжэ оролдодог. Саашадаа тэрэ Түгнын талын омогорхол болохо хонидойнгоо тоо мянга гаранда хүргэжэ, хэдэн гүүртэнүүдые байгуулха түсэбтэй.
Абынгаа гэрэлтэ дурасхаалда...
Зулгы һайхан зунай сагта хурдан хүлэг моридой урилдаан олониие суглуулха. Июль һарада Түгнын талада “Айрагай наадан” заншалта ёһоор эмхидхэгдэхэ. “Энэ үйлэ хэрэг эсэгымни гэрэлтэ дурасхаалда зорюулагдаха”, - гээд, Батор хөөрэнэ. Түгнын түрүү хүбүүдэй нэгэн, абарга бүхэ Илья Санжиевич Гармаев буряад болон сүлөөтэ барилдаагаар 20 дахин чемпион, Сурхарбаан нааданай 10 удаа абарга болоһон габьяатай юм гээд һануулая.
Автор: Дарья ЦЫДЫПОВА
