Алдар Цыденжаповай намтараар...

Найруулагша Олег Штромой буулгаһан фильм үнэн болоһон ушар дээрэ үндэһэлэгдэбэ. Гол рольнуудые Бато Шойнжонов ба Дмитрий Певцов гэгшэд гүйсэдхөө. Сентябриин 26-һаа Олег Штромой хүдэлмэри үргэн олониитын һонорто дурадхагдаха.

Фильм Владивосток хотодо, Үбэр Байгалай хизаарай Ага тосхондо буулгагдаа. «Быстрый» эсминец дээрэ мүн буулгабаринууд болоо. Номгон далайн бүридэлһөө дайшалхы ехэ корабль гаргагдаһаншье һаа, тэрэниие хэрэглэхэ зүбшөөл үгтэһэн байна. Фильм буулгагшад бодото байдалые үнэн зүбөөр дүрсэлэн харуулхые оролдоо.

- Фильм дээрэ хүдэлһэн бүхы зондо баяр хүргэнэбди. Бато Шойнжонов һүр жабхалантай роль наадаа, Оросой Баатарай амидарал үнэншэмэ гоёор харуулжа шадаа, - гэжэ Буряад Уласай соёлой сайд Соёлма Дагаева тэмдэглээ.

Продюсернуудай ба зүжэгшэдэй хэлэһээр, нэн түрүүн баримтата фильм буулгаха түсэб табигдаһан байгаа. Теэд түсэл байгуулагшад бодото шанартай фильм буулгаха шиидхэбэри удаань абаа. Эндэ гол геройн бүлэ, нүхэсэһэн басаганиинь, Эхэ орондоо үнэн сэхэ дурлалынь харуулагдана.

- Алдар Цыденжапов олоной түлөө ами наһаяа үгөө. Энэ ушар минии сэдьхэл хүлгөөһэн байна. Теэд хүбүүн тухай юундэ хэншье, юушье мэдэнэгүйб гэжэ ехээр бодолгото болооб. Бидэ сценари бэшэжэ эхилээбди, нүхэдэйнь, хамта һураһан зонойнь дурсалгануудые суглуулаабди. Гурбан жэлэй туршада ажал ябуулаабди. Бэлэн болоһон хүдэлмэриеэ нэн түрүүн эжыдэнь харуулһан байнабди. Тон зүбөөр, үнэн сэхээр минии хүбүүнэй богонихон ажамидарал харуулаат гэжэ тэрэ хэлээ һэн. Эжыньшье, бишье сэдьхэлээ хүдэлжэ уйлалдаабди. Иимэ ехэ баатаршалга гаргаһан буряад хүбүүн тухай хөөрэһэндөө, би жаргалтайб, аргагүй ехээр омогорхоноб, - гэжэ фильмын продюсер Юрий Обухов хөөрэбэ.

- Фильмын гол бодол байгуулагша Юрий Михайловичта баяр хүргэнэб. Бүхы гүрэмнай Оросой Холбоото Уласай Баатар Алдар Цыденжапов тухай мэдэдэг болохо, - гэжэ Бато Шойнжонов онсолоо.

Сугларагшадта Алдарай эхир басаган Арюна Цыденжапова хандаба.

- Фильм харахаяа ерэһэн зондо тон ехэ баяр хүргэхэ байнаб. Манай гэр бүлэдэ энэ үйлэ хэрэг ехэ удха шанартай. Хэлэхэ үгэеэ олоногүйб, сэдьхэлни хүлгөөтэй. Һайнта даа, - гэжэ Арюна хэлэбэ.

Фильм Оросой Холбоото Уласай Соёлой яаманай, Оросой Холбоото Уласай Баталан хамгаалгын яаманай дэмжэлгээр байгуулагдаба. Һануулхада, 2010 оной сентябриин 24-дэ Фокино хотоһоо Камчатка руу гарахаяа байһан «Быстрый» эсминец дээрэ зайн галай утаһанай үзүүр ниилэжэ, түймэр эхилһэн байна. Дайшалхы ехэ корабль дээрэ 348 хүн байгаа. 19 наһатай матрос Алдар Цыденжапов нэгэшье бодомжолонгүй, галтай тэмсэхэ шиидхэбэри абаһан юм. Алдар хүгшэн абадаал адли, бага наһанһаа флодто алба гараха хүсэлтэй һэн.

Түймэрэй бурма руу алхаһан хүбүүнэй бэе ехээр шатаа, Номгон далайн флодой эмшэд ами наһыень абарха гэжэ дүрбэн үдэрэй туршада оролдоо. Наһа бараһанайнь удаа Алдар Цыденжаповта Оросой Баатарай үндэр нэрэ зэргэ олгогдоһон байна. Тэрэнэй нэрээр Номгон далайн флодой бүридэлдэ ородог корвет нэрлэгдээ.