875
Улаан-Үдэдэ июлиин 5-да федеральна болон уласай удха шанартай харгынуудай хангалга хүгжөөхэ тухай Федеральна харгын агентствын хүтэлбэрилэгшын орлогшо Георгий Прокуроновой хүтэлбэри доро зүблөөн үнгэргэгдэбэ. Ородой Холбоото Улас дотор Эрхүү – Улаан-Үдэ гэһэн харгын хангалга хүгжөөлгын түсэлдэ оробо гэжэ Георгий Прокуронов зүблөөндэ дуулгаба.
- Эрхүү Улаан-Үдэ хоёрой хоорондохи федеральна харгы Харгын хангалга хүгжөөлгын концепци бэелүүлхэ түсэлдэ туршалгын шата гараха юм. Саашадаа тэрэ жэшээтэ болохо ёһотой. Эрхүүһээ Улаан-Үдэ хүрэтэр ябахадаа, харгын хангалга хүгжэнхэй, харин тэдэнэй шанар дээшэлүүлхээр, - гэжэ Георгий Прокуронов хэлэбэ.
2013 оной ноябрин 21-дэ Ородой Холбоото Уласай Транспортын яаманда харгын хангалга хүгжөөлгын концепци баталагдаһан гэжэ һануулнабди. Мүнөөдэрэй баримтаар харгын хангалга тиимэ һайн шанартай бэшэ, тэрэ харгыда ябагшадай эрилтэнүүдтэ тааранагүй. Эмхи гуримгүйгөөр баригдаһан харгын шадархи эдеэ хоол баридаг, машина заһабарилдаг, түлишэ хэдэг болон бусад газарнуудые хуулиин эрхэтэй болгохо, харгыда эсэһэн хүн зоной зохидоор амархаар, юумэ харахаар, һонирхохоор газарнуудые байгуулха гэжэ энэ концепциин зорилго болоно.
Григорий Прокуроновой хэлэһээр, ганса гүрэнэй һомолһон мүнгөөр һайн шанартай хангалга байгуулхаар бэшэ. Тиимэһээ уласай болон можо нютагуудай захиргаанууд олзын хэрэг эрхилэгшэдые энээндэ хабаадуулжа, тэдэниие дэмжэжэ байха болоно.
Буряад Уласта эдеэ хоол бариха, машина заһабарилха, түлишэ хэхэ болон бусад, хамтадаа 179, газарнууд харгы шадархи хангалагын ажал ябуулна гэжэ Транспортын, элшэ хүсэнэй болон харгын ажахы хүгжөөлгын сайдай уялгануудые дүүргэгшэ Сергей Козлов тэмдэглэбэ. Энэ һалбарида олзын хэрэг эрхилэгшэд зүблөөндэ хабаадажа, һайн шанартай харгын хангалга байгуулхада ушардаг шиидхэхэ асуудалнуудаар зүбшэбэ.
Виктор Якимов Байгал шадарай Ильинка һууринда “Магистраль” гэһэн харгын хангалгын коплекс байгуулһан юм. Тэндэ гостиница, машина заһабарилха, түлишэ хэхэ, бэеэ угааха газарнууд, һүмэ, үмсын ажахы гэхэ мэтэ баригданхай. Тиихэдээ, тэрэ газарай кадастрай сэн ехэ боложо, тэрээнһээ уламжалан газарай болон зөөриин татабариин сэн баһал ургаа. Виктор Якимовой барилга хэхэ газар 26 млн түхэригөөр сэгнэгдэжэ, сүүдэй шиидхэбэриин һүүлээр 6 млн хүрэтэр сэнгынь унагаагдаһан байна. “Дүрбэлжэн метрэй газарай өөрын үнэ кадастрын сэнһээ бага юм ааб даа. Анхан эндэ ямаршье үнэ сэнгүй хооһон тала байгаа, тиигэбэшье 14 миллион түхэриг татабари түлөөб”, - гэжэ Виктор Якимов хөөрэнэ.
Сэлэнгэ аймагай засаг дарга Вячеслав Цыбикжапов харгы шадар болбосон түхэлтэй газаа гараха газарнуудые бариха шухала гэжэ тэмдэглэбэ.
Федеральна болон уласай харгынууд шадар эдеэ хоол баридаг газарнуудта бэеэ заһадаг газарнууд, тэрэнэй тодо эрэмдэг бэетэй зоной һаадгүй орохо аргатай байхыень шэнжэлэл хэхэ тухай Григорий Прокуронов хэлэбэ.
