854
Мүнөөдэр, июлиин 25-да, Ородой Холбоото Уласай Засагай газарай Түрүүлэгшын орлогшо Аркадий Дворкович албанай хэрэгээр Буряад Улас ерэбэ.
Уласай үйлэдбэринүүд, эмхи зургаанууд болон ажаһуугшадай зайн галай түлбэри бага болохо, элшэ хүсэнэй ажахы хүгжөөхэ, “Аюулгүй, һайн шанартай харгынууд” гэһэн түсэлөөр Улаан-Үдэдэ болон дүтэ аймагуудай харгын заһабарилга тухай шухала асуудалнуудаар Аркадий Дворкович, Буряад Уласай Толгойлогшын уялгануудые дүүргэгшэ Алексей Цыденов болон бусад зүбшэн хэлсэбэ.
Бөөн ехээр (оптоор) болон үсөөнөөр (розничноор) зайн гал худалдадаг дэлгүүрнүүд зарим нютаг можонуудта онсо янзаар хүдэлхэ гуримтай юм. Ородой Холбоото Уласай Засагай газарай урда долоондо абаһан тогтоолоор иимэ нютаг можонуудай тоодо Буряад Улас оруулагдаа.
“Энэ талаар Буряад Уластахи байдалые бэлэн гэхээр бэшэ. Бултанай оролдолгоор тэрэниие һайжаруулхаар гэжэ федеральна засаг зургаанда ойлгоно. Абтаһан тогтоолой ёһоор, Буряад Уласта зайн галай сэн дүрбэнэй нэгэ хубяар бага болохо. Тиихэдэ, үнэтэйгөөр зайн гал хэрэглэдэг эмхи зургаануудта нэн түрүүн түлбэринь бага болохо”, - гэжэ Аркадий Дворкович хэлэбэ. Зайн галай түлбэри нэгэ түхэриг тухай гү, али хорёод процентээр бага болохо. Тиихэдээ нэн түрүүн энэниие бага болон дунда олзын хэрэг эрхилэгшэд өөр дээрээ ойлгохо гэжэ гүрэнэй Засагай газарай түлөөлэгшэ тэмдэглэбэ.
“Сентябрь һарада зайн галай үнэ сэн бага болохо. Тиихэдэ Федеральна антимонопольно албан зайн гал хэрэглэдэг ажахынууд, үйлэдбэринүүд болон ажаһуугшадай тэрэнэйнгээ түлөө оруулдаг түлбэриие ами аминдань тоолон гаргаха юм. Буряад Уласта олзын хэрэг эрхилэлгэ зайн галай сэнһээ ехэтэ дулдыдадаг. Хүршэ Эрхүү можодо зайн галай түлөө түлбэринь һураггүй бага юм. Ушар тиимэһээ олзын хэрэг эрхилэгшэд тиишээ тэгүүлнэ. Иимэ байдалда хүгжэхэнь ехэ хүндэ. Энээниие зааһхын тула уласай хэмжээндэ зохихо шиидхэбэринүүд абтаха болоно. Зайн галаар хангадаг эмхинүүдые нэгэдүүлжэ, саашадаа тэдэнээ хүгжөөжэ, ажаһуугшадые зайн галаар шанар ехэтэйгээр хангаха зэргэтэйбди. Сэнгэй доошолходо, хуби ниилүүлһэн нээмэл «РЖД» бүлгэм уласай хүгжэлтэдэ хубитаяа баһал оруулалсаха гэжэ найданабди. Тиимэһээ нютаг можонууд руу, хари гүрэнүүд руу үйлэдбэрингээ эд зөөри үргэнөөр худалдаха, мүн тиихэдэ аяншалга хүгжөөхэ арга боломжонууд Буряад Уласта үргэдхэгдэхэ. Буряад Уласай саашадаа улам хүгжэхэ талаар шухала шиидхэбэри абтаба”, - гэжэ Аркадий Дворкович хэлэбэ.
Буряад Уласта коммерческэ эмхинүүд зайн галай түлөө үнэтэйгөөр түлэдэг юм. Олзын хэрэг эрхилхэ, аяншалга хүгжөөхэ һалбаринуудта энэнь нүлөөлдэг гэжэ Буряад Уласай Толгойлогшын уялга дүүргэгшэ Алексей Цыденов тэмдэглэбэ.
“Зайн галай түлбэриин асуудал шухала асуудалнуудай нэгэн юм. Эдэй засагай онсо газарта шулуун нүүрһэ түлихэ хорюултай юм. Айлшадай байрлаха гэрнүүд, зочид буудалнууд зайн галай хүсөөр дулаагаар хангагдадаг. Тиимэһээ олзын хэрэг эрхилэлгэ гансал зунай сагта амжалтатай ябуулагдадаг. Зайн галай сэнһээ олзын хэрэг эрхилэлгэ ехэтэ дулдыдана”, - гэжэ Буряад Уласай Толгойлогшын уялга дүүргэгшэ хэлэбэ.
Анна Огороднигой гэрэл зураг.
