824
Буряад Уласай Толгойлогшын уялгануудые дүүргэгшэ Алексей Цыденов албануудай хоорондын зүблөөндэ “Аюулгүй, һайн шанартай харгынууд” гэһэн түсэлөөр харгы заһабарилагшадтай уулзажа, харгы заһабарилга саг соогоо һайн шанартайгаар, техническэ эрилтэнүүдтэ тааруугаар хэгдэхэ ёһотой гэжэ хэлэбэ.
“Бүхы ажалнууд саг соогоо һайн шанартайгаар хэгдэхэ ёһотой. Болзортоо үрдеэгүй һаа, үбэлэй хүйтэндэ асфальтаар харгы хушагдаха ёһогүй. Тиимэһээ хүйтэн болоһоной хойно харгы хэгдэбэл, тэрэ ашаглалгада тушаагдахагүй”, - гэжэ Алексей Цыденов тэмдэглэбэ.
Ородой Холбоото Улас дотор 2017-2025 онуудта “Аюулгүй, һайн шанартай харгынууд” гэһэн түсэлөр 49,7 мянган модоной федеральна, можо нютагуудай харгынууд һайн шанартай болгогдохо ёһотой.
Улаан-Үдын болон дүтын аймагуудай харгы заһабарилгада 2017-2018 онуудта 2,5 млрд. түхэриг мүнгэн гаргашалагдаха, тэрэнэй 1,25млрд түхэриг федеральна бюджетһээ һомологдохо. Тиихэдэ Улаан-Үдэдэ, Загарай, Ивалга, Тарбагатай болон Байгал шадарай аймагуудта 2017 ондо 64 харгынууд ашаглалгада тушаагдаха юм.
Буряад Уласай Толгойлогшын уялгануудые дүүргэгшэ Алексей Цыденовэй харгы заһабарилга өөрөө хинажа байдаг юм. Тэрэнэй хэлэһээр, мүнөө жэлдэ хэгдэһэн ажалай дүнгүүд энэ программаар саашадаа мүнгэ һомололгодо нүлөөлхэ. Мүнөө дээрээ ажалаа һайн шанартайгаар хээгүй һаа, удаадахи жэлнүүдтэ харгы заһабарилгада һомологдохо мүнгэн бага болохо.
Ородой Холбоото Уласай Засагай газарай Түрүүлэгшын орлогшо Аркадий Дворкович Буряад Уласта албанай хэрэгээр ябахадаа, харгы заһабарилгын ажалнуудаар урмашаһан байна гэжэ һануулнабди.
“Харгы заһабарилгын иимэ ажалнууд Буряад Уласта анхан хэзээшье хэгдээгүй. Буряад Уласай засаг зургаан ажаһуугшадтай зүбшэн хэлсэнэ. “Аюулгүй, һайн шанартай харгынууд” гэһэн түсэлөөр Ородой Холбоото Уласай Засагай газар энэ асуудалаар шанга эрилтэнүүдые табидаг юм. Улаан-Үдэдэ хэгдэжэ байһан ажалаар урматайбди”, - гэжэ Аркадий Дворкович хэлэһэн байна.
Буряад Уласай Засагай газарай сайтһаа гэрэл зураг абтаба.
