778
Байгша оной августын хоёрто Байгалай эрьеын Лемасово газарта хизаарламал харюусалгатай “Группа-Дали” бүлгэмэй баазада 77 хүнүүд, тэрэнэй тоодо 66 үхибүүд санхатажа, эмнэлгын газарта ороһон байна.
Энэ болоһон ушараар Буряад Уласай Засагай газарта онсо байдалай талаар комисси байгуулагдажа, аяншалгын комплексдо мэргэжэлтэд ошобо. Уласай Элүүрые хамгаалгын яаманай мэдээсэһээр, эмнэлгын газата ороһон хүнүүдэй ами наһанда аюул үгы.
Тиихэдэ Буряад Уласай спортын болон залуушуулай бодолгын талаар яаманай сайд Баир Ангуров, Роспотребнадзорой мэргэжэлтэд болон бусад Лемасовын бааза ошобо. Гэхэтэй хамта сагдаагай албанай хүдэлмэрилэгшэд мүрдэлгэ эхилһэн байна. Буряад Уласай прокуратура энэ ушараар үнгэргэгдэхэ шалгалта хинаха юм.
Буряад Уласай Толгойлогшын уялганудые дүүргэгшэ Алексей Цыденов тохёолдоһон байдал шалгалта үнгэргэхэ даабари үгэһэн байна.
“Тохёолдоһон байдал шиидхэхэ гэжэ Буряад Уласай Толгойлогшын уялгануудые дүүргэгшэ даабари үгэһэн байна. Бүридхэлдэ абтаагүй бааза юундэ үхибүүдэй амаралта эмхидхээб гэжэ шалгахабди. Тиихэдэ бүридхэлдэ абтаагүй, үхибүүдэй амаралта эмхидхэһэн иимэ аяншалгын баазануудые бултыень заабол шалгаха болонобди”, - гэжэ Буряад Уласай Засагай газарай Түрүүлэгшын аюулгүй байдалай асуудалнуудай талаар орлогшын уялгануудые дүүргэгшэ Пётр Мордовской хэлэбэ.
