​Далияа тайруулһан эрэ тахяа

Америкын Холбоото Штадуудай Конгресс муу һанаа һанаалжа, “модон һоёо һоёолоод”, Ородой Холбоото Уласай эдэй засагта харша шэнэ хэмжээнүүдые абажа, хүсэндөө орохыень үнихэнэй тэсэжэ ядан байжа хүлеэдэг һэн. Харин гүрэнэй Юрэнхылэгшэ Дональд Трамп түрүүшээр тэдэ хэмжээнүүдые баталжа, тус хуули абахаяа яараагүй. Энээн тухай Герман Уласай Гадаадын харилсаануудай сайд Зигмар Габриель мэдээсэһэн байгаа. 

- Саг сагтаа, сахилза хүхэдөө гэдэг гүб даа. Ородой Холбоото Уласай эдэй засагта харша хэмжээнүүдые хүсэндэнь оруулха тухайгаа Дональд Трамп шиидээгүй зандаа, - гэжэ Зигмар Габриелиин амалһан үгэнүүдые мэдээсэлэй “Новости” албан дамжуулаа бэлэй. 

Американ Конгрессэй гаргаһан хуулиин бэелүүлэгдэхэһээ урид Америкын Холбоото Штадуудай Юрэнхылэгшэ Европын гүрэнүүдэй засагай газарнуудай һанамжада түшэглэхэ байха гэжэ немец гүрэнэй дипломат һанаһан байгаа. Тиигэхын тула Дональд Трамп шэнэ хуулиингаа хүсэндөө ороодүй байхада Европын түшэмэлнүүдтэй оло дахин зүбшэхэ гэжэ Зигмар Габриель хүлеэгээ ха юм. 

Америкын Холбоото Штадууд мүнөө дээрээ Европодо үйлэдбэриин шэглэлдэ хабаатай улас түрын хэрэгүүдые бүтээжэ байна. Ородой Холбоото Уласай нэгэ хубинь Европо түбидэ оршодог гэжэ бултанда мэдээжэ. Теэд Америкын Холбоото Штадууд манай гүрэниие заал һаа илгадаг гээшэ. Украинада тохёолдоһон бэрхэшээлнүүдые шиидхэхэ, мүн тиихэдэ тэндэхи засаг зургаануудые «гадаадын» дарлалтаһаа сүлөөлхэ талаар арга бэдэрнэ гээшэбди гээд американ дипломадууд дуулгана. 

Ородой Холбоото Улас Америкын Холбоото Штадуудай Засагай газарай үгэ бүхэниие анхаралтайгаар шагнаад, буряадаар хэлэбэл, гуулингыень гаргажал һалаха байха. Ондоогоор хэлэбэл, худал хуурмаг үгэнүүдыень зада шүүгээд, саагуураа һанаашалжа ябаһан үнэн хэрэгыень шадамар бэрхээр элирүүлхэл даа.

Өөрөө өөрыгөө хизаарлаһан Дональд Трамп 

Ородой Холбоото Уласай эдэй засагта харша хэмжээнүүдые хараалһан шэнэ хуули доро Америкын Юрэнхылэгшэ Дональд Трамп гараа табижа, хүсэндэнь оруулба гэһэн мэдээн Сагаан гэрһээ ерэбэ гэжэ Bloomberg CNN хоёр үрдилдэжэ байгаад дуулгаа. Нэгэ хэды сагай үнгэрһэн хойно Дональд Трампын зүбшэлэгшэ Келлиэн Конуэй тэдэнэй мэдээсэһэниие лаблаба гэжэ Reuters агентствэ баталаа. Гэхэ зуура, Associated Press гэжэ эмхиин Сагаан гэртэхи нэгэ түлөөлэгшэ Дональд Трампын ямар ушарһаа тус хуули хүсэндэнь оруулһан тухай өөрынгөө һанамжа элирхэйлбэ. Тэрэ һанамжаар, Ород гүрэн Америкын Холбоото Штадуудта Юрэнхылэгшын һунгалтын болохо хэрэгтэ оролсоһон байна. Энээнһээнь боложо, Дональд Трамп манай гүрэниие хэһээхэ гэжэ бодоо хаш. 

«Яарахада – даараха» гээд буряад-монголшууд хэлсэдэг гүб даа. Шэнэ хуули моторлоходоо, Дональд Трамп өөрынгөө засаг өөрөө хизаарлажархиһан байба. Америкын Холбоото Штадуудай Конгресс һая болотор «Манай зохёожо, хүсэндэнь оруулһан Ородой Холбоото Уласай, Хойто Солонгосой, Иранай эдэй засагта харша хуулинуудые шэнэ Юрэнхылэгшэмнай гэгээн сагаан нэгэ үдэр болюулжархигшаб», - гэжэ үни удаан һанаагаа зобожо ябаһан байгаа. Хэнтэйшье хөөрэлдэхэдөө, сэхыень нюужа һурашаһан тэдэ Юрэнхылэгшынгөөшье толгой эрьюулбэ. 

- Мүнөө болоходо, шэнэ хуулиимнай зарим тэды таланууд Америкын үндэһэн хуулида тааруу бэшэ байна аа гү гэжэ би һанаагаа зобожо байнаб. Америкын Юрэнхылэгшын засаг нилээд хаһагдашаба ха юм. Жэшээнь, мүнөө би Конгрессэй зүбшөөлгүй Ородой Холбоото Уласай эдэй засагта харша хэмжээнүүдые өөрын шиидхэбэреэр болюулха аргагүй болобоб. Хожом ерээдүйдэ энэмнай американ бизнесэй хүгжэлтэдэ муу нүлөө үзүүлхэнь дамжаггүй. Үшөө тиихэдэ уласхоорондын хэмжээндэ хүдэлхэдэмнай, һаад түбэг ушарха байха, - гэһэн үгэнүүдые Америкын Холбоото Штадуудай Юрэнхылэгшын американ олониитэдэ хэлэхэ үедэнь, толгой соонь: «Үхэһэн хойноо!» гэһэн бодол нэгэнтэ бэшэ ороһон лэ байха. 

Һүүлэй мэдээгээр, Америкын Холбоото Штадуудай Юрэнхылэгшэ Дональд Трамп амаралтада гаранхай. Тэрэ 17 хоногой туршада гэр бүлэтэеэ Нью-Джерси штадта оршодог гольф наададаг үмсынгөө поли дээрэ сүлөө сагаа үнгэргэхэ байна.

Гэхэ зуура Сагаан гэртэ хуушарһанаа шэнэлнэ, үмхирһэнөө урилна. Шэб шэнэхэн кондиционернүүд тэндэ хабсаргагдажа байна. Американ Конгресс холуур ниидэхэ шадалтай Юрэнхылэгшынгөө жэгүүрнүүдыень таһа тайража, үндэр хорёо гаталжа бирахагүй эрэ тахяа мэтэ болгоо гээ һэмди. Тиин амаралтынгаа үедэ Дональд Трамп хүнүүдые тушаалнуудта томилхо эрхэеэ мүн лэ хаһагдаба. Ородой Холбоото Уласта харша хуули моторложо баталхадаа, Америкын Юрэнхылэгшэ Конгресстэеэ эблэрхэгүй зон гүбди гэжэ үнэн зүрхэнһөө хүлеэһэн байгаа. Теэд найдалынь дэмы байшаба ха юм.

- Ородой Холбоото Уластай харилсаамнай тон тулюур болобо. Конгресстээл баярые хүргэгты. Тэндэ һуугаашад маанадай бэеэ аргалха даадхалшье бүтээжэ биранагүй ха юм, - гэжэ Трамп ехэ сухалтайгаар Твиттер соогоо бэшэһэн байна.

Үшөө тиихэдэ Дональд Трамп хориг табиха эрхэгүй болобо. Тэрээнһээ урдуурхи Юрэнхылэгшэдэй энэ эрхэеэ хэрэглэхэдэнь, Конгресс шадамараар тойруу хэмжээнүүдые абаадхидаг бэлэй. Теэд Америкын Юрэнхылэгшэд өөрынгөө шиидхэбэри һунгагшадайнгаа нюдэндэ элеэр харуулдаг байгаа ха юм. Дональд Трамп эндэшье газардаба.

Тиихэдээ Дональд Трамп улас түрын хэрэгүүдые шиидхэлгэдэ тугаар гараһан тугал шэнгеэр бэеэ абажа ябана гэжэ эли болобо. Гэбэшье энэл хүмнай энэ дэлхэйн агуу бизнесменүүдэй нэгэн гэжэ мартаха хэрэггүй.

Муу үгэ модоной оройгоор гэлсэдэг аабза. Тиигэбэшье хоёр-нэгэншье һаа, һайн үгэ баһал хэлэлтэй. Юрэнхылэгшын тушаал Трампын эзэлһэнһээ хойшо Америкэдэ ажалай 1 сая һуури бии болоо. Тиигэжэ энэ гүрэнэй түүхэдэ урдань үзэгдөөгүй амжалта туйлагдаба. Ажалгүйдэжэ зобогшод Америкын Холбоото Штадуудта тон үсөөн болоо.

Түүхэй мунса, нойтон шиидам 

Үнэн алдарта шажантанай һургаалай ёһоор, нэгэ хасарыешни хэнэйшьеб альгадабал, нүгөөдэеэ тодоод үгэ гэжэ хэлэгдэдэг. Теэд Владимир Путин үнэн алдарта шажанай һүмын санаартан бэшэ. Хара һанаатанай далда, мүн далда бэшэшье хэлсээ нюдэн дээрэнь үүдхэжэ байхадань, тэдэниие гамнаһан, хайрлаһанай хэрэггүй гэжэ тэрэ бодомжолно. Ород гүрэндэ харша ябуулга бүтээжэ байһан этэгээдүүдэй нюргандань бууха хүндэхэн мунса, толгойень бала сохихо нойтон шиидам хододоо бэлэн байдаг. 

Гэбэшье наншалдахаяа яараха хэрэггүй. Ород гүрэнэй засаг зургаан зохихо хэмжээнүүдые тэрэ дороо зохёогоод орхибо. Тон түрүүн Ородой Холбоото Уласай Засагай газар американ дипломадуудые мориндонь мордохуулжа, нютагынь бусааха гэжэ шиидэбэ. Ород гүрэндэ харша шэнэ хуулиин хүсэндөө ороһонһоо хойшо манай орондо американ 455 дипломадууд хүдэлхэ эрхэтэй гэһэн данса бүтэбэ. Тиин Америкын аша туһада Ород гүрэнэй дэбисхэр дээрэ аяараа хүдэлдэг байһан 755 хари болон манайшье гүрэнэй эрхэтэд ажалгүй болобо. Тэдэ саашадаа эндэ ажаһууха эрхэгүй болобо. Америкын Холбоото Штадуудай элшэн сайдуудай Москва хото шадархи зуһалан, эд хогшолоо хадагалха газарнууд хуряагдаба. Иимэл даа мүнөө дээрээ гунан дэлхэймнай али олон үзэгдэлнүүдэй нэгэн.