805
Мүнөөдэр педагогикын эрдэмэй кандидат, Болбосоролой һалбари хинадаг федеральна албанай хүтэлбэрилэгшэ Сергей Кравцов Буряад Улас албанай хэрэгээр ерэһэн байна.
Үндэр сайд Буряад Уласай Толгойлогшын уялга дүүргэгшэ Алексей Цыденовтэй хамта Улаан-Үдын юрэнхы болбосоролой 2-дохи һургуулида хүрэжэ,тэндэ хэгдэһэн заһабарилгын ажалнуудые хараба.
«Табан жэлэй туршада ондоо һургуулида һуража байһан шабинар бусаха. Хари болон Ород гүрэнэй олон һургуулинуудаар ябааб, тиимэһээ энэ һургуули бүхэроссиин болбосоролой эрилтэнүүдтэ таарана, зарим талаараа хари гүрэнэй һургуулинуудһаа дээрэ», - гэжэ Сергей Кравцов хэлэбэ.
1937 ондо баригдаһан һургуули хуушараа гэжэ шиидхэбэри абтажа, тэрэнэй һэльбэн заһабарилга 2012 ондо эхилээ. Федеральна бюджетһээ мүнгэ һомололго бага боложо болон бусад шалтагаанһаа тэрэнэй заһабарилга удаашарһан байна. Һургуулиин заһабарилга дүүргэхэ хэрэгтэ газарай хүдэлбэл, гэр байранууд бүхэ, һайн шанартайгаар баригдаха программын хэмжээндэ Буряад Улас тэдхэмжэдэ хүртэхэ гэжэ 2016 оной зун Ородой Холбоото Уласай Барилгын болон гэр байрын ажахын яаманда шиидхэгдэһэн юм. Тэрэнэй удаа заһабарилга эршэтэйгээр ябуулагдажа, һуралсалай шэнэ жэлдэ һурагшад шэнэлэгдэһэн һургуулидаа ерэхэ гэжэ 2017 оной эхиндэ Улаан-Үдын захиргаанай барилгын хороондо мэдээсэһэн байна.
Мүнөө дээрээ һургуулиин байшан заһабарилагдажа, бүхэлэгдэжэ, залгалаа баригдаа. Улаан-Үдын 2-дохи һургуулида шэнэ классууд нээгдэжэ, проекторнүүд, интерактивна самбарнууд абтаба. Тиихэдэ тамирай заал, 200 хүнэй багтах эдеэ хоолой газар гэхэ мэтэ шэнэлэгдээ. Эрэмдэг бэетэй үхибүүдтэ үргэдэг оньһон түхеэрэгдэбэ. Сентябриин 1-дэ 879 үхибүүд энэ һургуулиин богоһо алхажа орохо юм.
2017 ондо Улаан-Үдэ хотын юрэнхы болбосоролой 2-дохи һургуули зуун жэлэй ойн баяраа угтаха гэжэ тэмдэглэлтэй.
Удаань Сергей Кравцов Алексей Цыденов хоёр Буряадай гүрэнэй оперо болон баледэй театрта багшанарай августын хуралдаанда хабаадаа. Тэрэнэй һүүлээр Болбосоролой һалбари хиналтын федеральна албанай хүтэлбэрилэгшэ гүрэнэй ниитэ нэгэ шалгалта 100 баллаар тушаһан оюутадтай уулзаһан байна.
Анна Огороднигой гэрэл зурагууд.
