​Һунгуулиин гурбан участок Сотниководо хүдэлнэ

Ивалга аймагай Сотниково һууринда һунгуулиин гурбан участок һунгагшадые угтажа абана. Энэл аймагта хабаатай Ошурково тосхондо үшөө нэгэ участок хүдэлнэ.

Һалхитай байгаашье һаань, һунгуулиин энэ гурбан участогто үглөөнһөө зон ерэжэ эхилээ.

-Урданайхяараа үглөөнэй 7-до нэгэ хүгшэн ерээ. Аятайханаар угтажа, һунгалта 8 сагһаа эхилхэ гэжэ ойлгуулаабди. Тиимэ һэн хадань, яаралгүй хүршэнэртэеэ ерүүжэм даа гэжэ хүгшөөдэй найдуулаад ябаа, – гэжэСотниковой һургуулиин тамирай танхим соохи243-дахи һунгуулиин участогой түрүүлэгшэ Татьяна Доржеевна Токтохоева хөөрэбэ.

Энэл һургуулиин фойе соохи 242-дохи участогто эгээл түрүүн эрэ хүн ерэжэ һунгаа.

-Энэмнай ехэ һайн тэмдэг гээшэ, - гэжэ һунгуулиин участогой дарга, һунгалтын ажалда хорин жэл таһалгаряагүй ажаллажа байһан Наталья Бурякова хөөрэнэ. – Тиимэһээ манай участогто һунгалта һайнаар, дутуу дундагүйгөөр үнгэргэгдэхэ, - гэжэ найдажа байһанаа2 жэлдэ таһалгаряагүй комиссиин даргаар ябаһан дүй дүршэлтэй Наталья Витальевна мэдүүлээ.

Партизанска гудамжаар оршодог нютагай клубай байшан соо оршоһон 242-дохи участогто 9 сагта 48 хүн дуугаа үгөө, тэдэнэй тоодо - гуша хүрөөгүй табан залуушуул. Эгээл түрүүлжэ Михаил Посельский һунгаа.

-Аймаг соогоо манай участогто ондоо тээхи һунгагшад мэдүүлгээр һунгаха эрхэтэй. 9 хахадта иимэ эрхэтэй гурбан хүн һунгаа. Үшөө 12 хүнүүдые, ямар нэгэн шалтагаанаар һунгуулиин участогто ерэжэ шадахагүй, ехэнхидээ үбшэн, ябадаггүй хүнүүдые, 14 сагһаа хойшо гэртэнь ошожо һунгуулхабди, - гэжэ Наталья Витальевна хөөрэбэ.

Харин 242-дохи участогһаа 10 сагта машина гаража, һунгуулиин гэшүүд гэр гэрээрнь мэдүүлгээр ябажа һунгуулаа.

-Юһэн хүниие һунгуулаа, гурбан айлда орожо шадаагүй, - гэжэ комиссиин нарин бэшээшэ Марина Коротова мэдүүлээ.

265-дахи участогто һунгалтын гүрэнэй хоёр хэлэн дээрэ хэблэгдэһэн 650 бюллетень байна гэбэл, бэшэ хоёртонь гансал ородоор хэблэгдэһэн бюллетенгүүд байгаа гэжэ анхарагдаа.

12 сагта 265-дахи участогто 246 һунгагшад дуугаа үгөө. Тэдэнэй тоодо – 40 залуушуул, хоёрынь түрүүшынхиеэ һунгажа байна. 242-дохи участогто 211 хүн һунгаа. 243-дахи участогто 2 115 һунгагшадай 11 хубинь һунгаа. Хахад үдэр болотор ехэнхидээ наһатайшуул һунгаа гэжэ тэмдэглэмээр, харин залуушуул һунгахаяа ехээр яаранагүй хаш.