761
Түймэрһөө хохидоһон Черёмушки һуурин шэнээр бодхоолгодо һомологдоһон мүнгэн алмагдажа, үлэһэн мүнгэ Северомуйск һууринда гал аюулһаа хохидогшодто дамжуулха тухай Буряад Уласай Толгойлогшын тушаалда һунгагдаһан Алексей Цыденовэй дурадхал Владимир Путин дэмжэбэ.
Ородой Холбоото Уласай Юрэнхылэгшэ Владимир Путинай можо нютагуудай һунгагдаһан хүтэлбэрилэгшэдтэй уулзаһанай удаа энээн тухай Алексей Цыденов хэлэбэ.
«Мүнөөдэр үнгэргэгдэһэн уулзалгада можо нютагуудай хүтэлбэрилэгшэд арад зоной этигэл, найдабари харюулха болонот гэжэ юрэнхылэгшэ хэлэбэ. Түймэрһөө хохидоһон Черёмушки һуурин шэнээр бодхоолгодо һомологдоһон мүнгэн алмагдажа, үлэһэн мүнгэ Северомуйск һууринда гал аюулһаа хохидогшодто дамжуулха тухай дурадхал Владимр Путин дэмжэбэ», - гэжэ Алексей Цыденов тэмдэглэбэ.
2016 ондо түймэрһөө хохидоһон Северомуйск һууринай ажаһуугшадта 14 сая түхэриг мүнгэ һомолхо тухай сентябриин 14-дэ Ородой Холбоото Уласай Онсо байдалай талаар сайд Владимир Пучковтой Черёмушки һууринда үнгэргэгдэһэн зүблөөндэ уласай хүтэлбэрилэгшэ хэлсэһэн байна. Тиихэдэ Владимир Пучков энэ дурадхал дэмжээ һэн. Теэд энэ дурадхал бэелүүлхын тула Ородой Холбоото Уласай Засагай газарай тогтоолдо заһабари оруулха хэрэгтэй байжа, уласай засаг зургаан федеральна түб хандаһан байна.
2016 оной июнь һарада Северомуйск һууринда түймэр боложо, 24 гэрнүүд галда шатаһан байна гэжэ һануулнабди. Түймэрһөө хохидоһон 87 ажаһуугшадта 9,57 сая түхэриг мүнгэн туһаламжа үзүүлэгдэһэн юм. Энээнһээ боложо, 28 гэр бүлэнүүд БАМай ажаһуугшад хуушарһан гэрнүүдһээ зөөлгэ гэһэн програмада хабаадаха эрхэнь хаһагдаа. Ородой Холбоото Уласай Засагай газарай зохихо шиидхэбэри абабал, тэдэ зондо мүнгэн тэдхэмжэ үзүүлэгдэхэ юм.
