917
Уржадэр, майн 2-то, уларилай байдал хэды дулаан тогтобошье, эстафетэдэ оройдоол 600 гаран хүн хабаадаба. Энэ хадаа хэзээ хэзээнэйхиһээ бага гээд хэлэлтэй. Һүүлэй хэдэн жэлдэ Буряад Уласта тогтоод байһан олониитын спортын байдал харуулна бшуу. Хэды тиигэбэшье, манай мүрысөөн һонирхолтойгоор үнгэрбэ гээшэ.
Нээлгын баяр ёһололдо Буряад Уласай Спортын болон залуушуулай сайд Баир Ангуров хабаадажа, эстафетэ хүн зондо хэрэгтэй мүрысөөн байһаниие гэршэ боложо үгөө.
Һүүлэй хэдэн жэл соо тус хэмжээ ябуулга дээдэ хэмжээндэ эмхидхэжэ байһан хүнүүдтэ яаманай Хүндэлэлэй грамотануудые Баир Ангуров барюулба. Буряад Уласай Спортын болон залуушуулай яаманай һайшаалда “Буряад үнэнһөө” сониной редактор Туяна Владимировна Самбялова, ахамад дизайнер Аркадий Осорович Батомункуев болон ажалай ветеран Радна-Нима Балданович Базаров гэгшэд хүртэбэ. Мүн Буряад Уласай хүнгэн атлетикын федерациин гэшүүд Надежда Николаевна Суворова, Алиса Николаевна Суворова, Евгений Сидорович Спиридонов болон Маргарита Анатольевна Телешева гэгшэд баһа Хүндэлэлэй грамотада хүртөө.
- Мүнөөдэрэй хүнгэн атлетикын һайндэр ехэ удха шанартай. Эгээл энээнһээ эхилжэ, урдахи жэлнүүдтэ хабаадаһан олон тоото урилдаашад саашадаа шанга гэгшын ГТО тушаажа шадаһан байна. Мүн тиихэдэ Буряадаймнай түрүү хүнгэн атледүүд тус мүрысөөнһөө спортынгоо эхи табиһан түүхэтэй. Мүнөөдэр хабаадаһан хүбүүд, басагад тэдээн шэнги үндэр дүн харуулха бэзэ гээд найдагдана, - гэжэ Баир Ангуров тэмдэглэбэ.
Фото Аркадия Батомункуева
Эстафетэдэ һургуулиин үхибүүдһээ эхилээд, сэрэгшэд, ажалай бүлэгүүд хүрэтэр хабаададаг юм
Фото Аркадия Батомункуева
Эстафетын анха түрүүн эмхидхэгдэхэһээ хойшо эдэбхитэй хабаадагша Н.Никифорова шагналнуудые барюулалсаа
Юһэн жэлэй юрэнхы һургуулинуудай дунда 28-дахи санаторно һургуулиин хүбүүд, басагад бусадһаа үлүү байһанаа дахинаа гэршэлээ. Мүн тиихэдэ нэгэдэхи болон хоёрдохи тусхай һургуулиин хүүгэд баһа хоёр дахин шалгараа. Эндэ наймадахи тусхай һургуули хоёр дахин хоёрдохи һуурида гараа.
Оройдоол 19 басагадай, 22 хүбүүдэй команданууд дунда һургуулинуудай бүлэгтэ хабаадаба гээшэ. Эндэ басагадай 42-дохи болон хүбүүдэй 49-дэхи һургуулиин команданууд нэгэдэхи һуурида гараа. Эхэнэрнүүдэй дунда 49-дэхи болон 32-дохи һургуулиинхид шангай һууринуудые эзэлээ. Харин бүһэтэйшүүлэй дунда 42-дохи болон 32-дохи һургуулиин шабинар хоёрдохи ба гурбадахи һууринуудта гараа.
Фото Аркадия Батомункуева
Илалта туйлагшад баяртай даа
Һүүлшын эгээл шанга гэжэ тоологдодог хоёр мүрысөөндэ табан эхэнэрэй болон долоон эрэшүүлэй команданууд байгаа. Тиигэжэ дунда мэргэжэлэй һуралсалай гуламтанууд сооһоо ганса Буряадай республиканска багшанарай колледж командануудаа хабаадуулба. Тэдэнэр энэ бүлэгтэ шүүжэ гараһаниинь гайхалгүй.
Ажалай эмхи зургаануудай бүлэгтэ ганса сэрэгэй албанайхид мүрысөөндэ ерээ. Эндэ десантнигууд танкистнуудые шүүжэ шадаа.
Дээдэ һургуулинуудай дунда Буряадай гүрэнэй университедэй басагад болон хүбүүд түрүүлһэн байна. Тус һуралсалай гуламтын Математика болон информатикын институдай даргын орлогшо Иннокентий Очиров басагадай болон хүбүүдэй команда табижа хабаадуулһандань, доро дохин баяраа мэдүүлэе. Иимэ бэрхэ хүнүүд спортын һалбариин түрүүдэ байбал, республика доторнай физкультура болон элүүр энхые сахилга дээшэлхэ байгаа бшуу.
Фото Аркадия Батомункуева
Дээдэ һургуулинуудай дунда Буряадай гүрэнэй университет түрүүлээ
Түрүүшын шатануудта 25-дахи һургуулиин Наталья Иванова, 32-дохи һургуулиин Владислав Грехов, Буряадай гүрэнэй университедэй оюутад Александр Расшивалов болон Оксана Котыхова түрүүлһэн байна. Тэдэ тусхай шанда хүртөө.
Иигээд лэ заншалта эстафетэ түүхэдэ оробо. Баир Ангуровтай хөөрэлдэхэдэмнай, ерэхэ жэл эстафетын үнгэргэлгэ нэгэ бага ондоо болгогдохо тухай хэлсээн гараа юм. Тиимэһээ бултаниие 2017 оной мүрысөөндэ уринабди.
Фото Аркадия Батомункуева
Илагшадта иимэ кубогууд барюулагдаа
Автор: Борис БАЛДАНОВ
