​Геройнуудай май һара

"Геройнуудай май һара” гэһэн хэмжээн манай Буряад орон дотор ябуулагдана. Энэ патриотическа хэмжээн Буряад Уласай Эрдэм һуралсалай яаманай сайд Алдар Дамдинов, Арадай Хуралай депутат Игорь Зубарев, Ахын аймагай толгойлогшо Баир Балданов болон “Информ Полис” гэһэн хэблэлэй байшангай захирал Соёлма Дагаева гэгшэд үүсхэжэ эмхидхэбэ

Алдар Дамдиновай хэлэһээр, энэ хэмжээ ябуулга бүхы Буряад ороной аймагуудаар үнгэргэгдөөд, саашадаа жэл бүри заншалта болохо юм.

- Энэ хэмжээн Хориин аймагһаа эхи абажа, афган-сэрэгшэ Батор Санжиевта зорюулагдаһан Дурасхаалай самбар Хориин 1-дэхи дунда һургуулиин дэргэдэ тодхогдожо, баяр ёһололоор нээгдээ. Тиигэжэ май һара соо Эсэгэ ороноо хамгаалгын дайнда эрэлхэг хабаадагша баатар-геройнууд тухай, үнэн сэхэ үдэр бүриин хүшэр ажалаараа Илалта асарагша ажалша арад тухай хөөрэжэ, дурсажа байхабди,- гэжэ Алдар Валерьевич тэмдэглээ.

Автор: Цырегма Сампилова
Описание: Хориин 1-дэхи дунда һургуулиин дэргэдэ

Зэдын аймагһаа - эгээл түрүүшын Герой

“Геройнуудай май һара” гэһэн хэмжээнэй шугамаар эмхидхэгшэд Зэдын аймаг ошоһон байна. Буряадаймнай эгээл түрүүшын дайшалхы Герой – Гармажаб Аюрович Гармаев энэ аймагһаа гарбалтай юм.

Зэдын аймагайхид ехэ эдэбхитэйгээр энэ хэмжээндэ хабаадалсаба. Петропавловка тосхоной гол талмай дээрэ хилын харуулшан Гармажаб Гармаевай дурасхаалай хүшөө һэльбэн шэнэлэгдээ.

“Геройнуудай май һара” гэһэн хэмжээн Агуу Илалта асарагшад тухай, манай гүрэнэй хүн зоной эрэлхэг баатаршалга гаргаһан тухай үшөө дахин дурсажа, залуу үетэндэ мэдүүлжэ, дурсажа байха үшөө нэгэ талмай боложо үгэнэ.

Эмхидхэгшэд Зэдын аймагай ветеран, Сталинградай байлдаанда хабаадагша Алексей Павловтай уулзажа, хөөрэлдэһэн байна.

- Евгений Алексеевичтэй уулзахадаа, сэдьхэлдэмни сэлмэг мэдэрэл бии болоо. Дайшалхы ветеранай хөөрөөнүүд дурасхаалай нээлтэтэй ном мэтэ. Шэрүүн хатуу үе саг, үлэн хооһон байдал үзэжэ, гал бурма тэмсэл дабажа гараһан эдэ манай наһатайшуул Эхэ орондоо энэрхы хандаса, сэдьхэлэй һайхан һанал, шог хүхюу абари зангаа алдаагүй ябаһаниинь гайхамшаг. Эдэ ветерануудтай хөөрэлдэхэдөө, ажаһуудалай эршэ хүсэнһөө хүртэһэндэл болоно. Энэ юунһээшье үнэ сэнтэй, - гэжэ Ахын аймагай толгойлогшо Баир Балданов тэмдэглээ.

Энэ хэмжээ ябуулгада ганса дайшалхы бэшэ, эдэбхитэй ажалай габьяагаар амжалта туйлаһан хүн зон баһал ёһологдодог болохо. Энэ үйлэ хэрэг хадаа илангаяа залуушуулай хүмүүжүүлгэдэ аша туһатай, тиимэһээ тэдэнэр ходол хабаадуулагдаха.

Кабанскын аймаг утаһа дамжуулаа

“Геройнуудай май һара” гэһэн хэмжээн Кабанскын аймагта үргэлжэлүүлэгдээ. Энэ ехэ хэмжээ үүсхэгшэд Алдар Дамдинов болон Соёлма Дагаева хоёр аймагай түб Кабанск тосхондо Эсэгэ ороноо хамгаалгын дайнай ветеран Ксения Нечаеватай уулзаба.

92 наһанай үндэр дабаанда һонор сэлмэг ябаһан Ксения Дмитриевна Нэгэдэхи Прибалтийска фронтын байлдаануудта Кабанскын аймагай Пашино нютагай Кирилл Нечаевтай уулзажа, инаг дуранай агууехэ хүсэндэ абтаһан юм. Суг хамта хархис дайсадһаа Эхэ ороноо хамгаалжа шадаа. Ксения Дмитриевна Агуу Илалта Австриин Грацхотодо угтаһан юм.

Аймагһаа Эсэгэ ороноо хамгаалгын дайнда 9 мянга гаран зон мордоод, 5 мянганиинь гэртээ бусаха аза талаантай байгаа бшуу.

Алдар Дамдиновай хэлэһээр, энэ хэмжээн жэл бүри үргэнөөр үнгэргэгдэжэ, манай Буряад ороной, Росси гүрэнэй арад зоной гүн сэдьхэлэй хүгжэлтэдэ нүлөөлхэ болоно.

- Энэ хэмжээн хэшэг ехэтэй харгын эхин гээшэ, - гэжэ Алдар Валерьевич Дамдинов онсолоо.