​Гурбан талын дангина

Гоо һайхан дангина басагадай мүрысөөн Бүгэдэ буряадуудай уласхоорондын “Алтаргана-2016” гэһэн үндэһэтэнэй ехэ нааданай шэмэг боложо үгөө. Үбэр-Байгалай хизаарай Агын тойрогой Юлия Ринчинова, Эрхүүгэй можын Баяндайн аймагай Дарима Урбаева болон Улаан-Үдэ хотын Цырегма Лубсанова гэгшэд эрхим гурбанай тоодо оролсоо гээд абаһаар лэ хэлэхэ шухала.

Тус хэмжээ ябуулгада 20 сэбэр гоё шарайтай басагад бэеэ харуулжа шадаа. Тэдэ Хитадай Үбэр-Монголһоо, Монголһоо, Үбэр-Байгалай хизаарай, Эрхүүгэй можын, Буряад Уласай хэдэн аймагуудһаа эндэ ерээ. Шүүлгын бүлгэмэй түрүүлэгшэ Руфина Дугаровна Уюинагай хэлэһээр, хабаадагшад мүрысөөнэй табан шанга шатануудые дабажа гараа. “Энэ хадаа заншалта болоһон дуу, хатарай шатанууд, бэеэ танилсуулга. Эгээл һонирхолтой шата гэбэл, үдэшын хубсаһа, зүүдхэл, гоёолтонуудые харуулалга гэжэ һананаб”, - гэжэ Руфина Уюина хөөрэнэ.

Шүүлгын бүлгэмдэ ганса буряад соёл, заншал һайнаар мэдэхэ хүнүүд оруулагдаагүй. Мүн тиихэдэ Дангинанарай элдэб шэнжын мүрысөөнүүдтэ хабаадаһан басагад оролсоо. Тэдээн сооһоо “Монгол туургата арадуудай дангина” гэһэн уласхоорондын нааданай Гран-придэ хүртэһэн Арюна Бубеевагай жюридэ байлсаһаниинь һайшаалтай.

“Краса России” гэһэн регион хоорондын ниитэһээ тусхай шангууд Монголой Мүнхчимэгтэ болон Хитадай Үбэр-Монголой Хүлэн-Буир аймагай Сэрэн Баатарай Бальжин гэгшэдтэ барюулагдаба.

Үбэр-Байгалай хизаарай Агын тойрогой Юлия Ринчинова, Эрхүүгэй можын Баяндайн аймагай Дарима Урбаева болон Улаан-Үдэ хотын Цырегма Лубсанова гэгшэд “Алтаргана-2016” гэһэн нааданай “Гоо Дангина” болобо гээд тодороо. Иигэжэ гурбан нютаг нугада ажаһуудаг буряад басагадай түрүүлһэниинь баһа һайшаалтай. Юуб гэхэдэ, ямаршье ондо ондоо нютагуудта ажаһуугаашье һаа, ёһо заншалаа алдаагүй ябаһандань баярлаад, саашадахи угтаа дамжуулхань магадгүй.

Түрүүлһэн басагадта лауреадай баталамжанууд, мүнгэн шангууд болон Ивалгын дасанай 12-дугаар Хамба лама Даша-Доржо Этигэловэй Ордон соо адислагдаһан торгон бүтээлнүүд барюулагдаа.

Автор: Борис БАЛДАНОВ
Описание: Юлия Ринчинова 

Автор: Борис БАЛДАНОВ
Описание: Дарима Урбаева 

Автор: Борис БАЛДАНОВ
Описание: Цырегма Лубсанова