884
Огородой эдеэ бүхэли жэл соо манай Сибирьтэ эдихэнь аргагүй бшуу. Харин Зэдын аймагай өөрын хэрэг эрхилэгшэ Оксана Нимаева энээниие буруушаана.
2015 оной эхиндэ Оксана Нимаева гэр бүлөөрөө үгэрсэ ургуулжа эхилээ. Нэн түрүүн үбэлэй сагай теплицэ бодхооһон байна. Мүн тиихэдэ зунай сагта хэрэглэхэ үшөө нэгэ теплицэ баригдаа.
- Би өөрөө бүхы наһаараа түрэл Доодо Бургалтайдаа малай ажахыда хүдэлөөб. Малай эмшэнэй мэргэжэлтэйб даа. Наһанай амаралтада гарабашье, малаа адуулаад ажаһуугааб. Харин басаганайнгаа үгэрсэ ургуулжа эхилэе гэжэ дурадхахадань, ехээр арсаагүйб. Юуб гэхэдэ, жэл бүри малай хойноһоо ябахада, хүндэшэг болонхой, - гэжэ өөрын хэрэг эрхилэгшын аба Еши-Доржо Бумацыренович Сосоров хөөрэнэ.
2016 оной январь һарада түрүүшын үгэрсэ һуулгагдаа. Оройдоол мартын 1-һээ огородой зүйл Зэдын аймагай магазин алаабхинуудта наймаалагдажа эхилээ. Ургаса үдэр бүри хуряагдана. Нэгэ зуура 30 килограмм хүрэтэр үгэрсэ абтагдана. Мүн тиихэдэ өөрын хэрэг эрхилэгшэ мангир наймаалһан байна.
- Мартын нэгэнһээ мүнөө болотор хоёр тонно гаран үгэрсэ абтагдажа, наймаанда табигдаа. Тиимэһээ нютагаймнай зон манай үгэрсэ ехээр абаһандань баяртай байнабди. Хэды тиигэбэшье, арад зонойнгоо һанаа хүсэд дүүргэнэгүйбди, - гэжэ Еши-Доржо Бумацыренович хөөрөөгөө үргэлжэлүүлнэ. - Хүдөө ажахыда ажаллажа эхилжэ байһан фермернүүдэй дунда республиканска грант шүүһэн байнабди. Энэ мүнгөөр үшөө нэгэ томо теплицэ бодхоожо байнабди. Тэндэмнай ганса манай гэр бүлэ хүдэлхэ бэшэ, мүн ажалай һууринуудые дуратайшуулда нээхэбди.
Огородой эдеэ тариха гээшэ баһа хүнгэн хэрэг бэшэ гэжэ Еши-Доржо Сосоров мэдээсэнэ. Тэрэнэй хэлэһээр, үгэрсэ ургуулхада ямаршье нюуса байхагүй. Үгэрсэ уһалхадаа, элдэб химикат хэрэглэгдэнэгүй. Юуб гэхэдэ, үгэрсэ эдеэнэйнгээ шэнжэ алдана. Харин үбэлэй теплицэ соо 25 градусһаа бага дулаан байха ёһогүй.
Уран гартай Еши-Доржо Бумацыренович ехэнхи ажалаа өөрөө хэнэ. Тиигэжэ зунай түхэлэй теплицэ дуһаалалгын аргаар уһалалгын хэрэгсэл өөрөө бүтээгөө.
Автор: Борис БАЛДАНОВ
