​Байгалай хойто бэеын хүүгэд тамир һайтай

Северобайкальск хотын үхибүүд тусхай хүүгэдэй тамирай һургуулида спортын зүйлнүүдээр бэеэ аятай байдалда һорино гээшэ. Үнгэрһэн жэл тус һургуулиин “Нева” гэһэн спортын байшан заһабарилагдаа. Энээн тухай Северобайкальск хотын ДЮСШ-гай хүтэлбэрилэгшэ Цырегма Базардашиевна Дандарова мэдүүлнэ.

- 2015 ондо Северобайкальск хотодо республиканска бюджедһээ дамжуулагдаһан мүнгэнэй нэгэ миллион 565 мянган түхэриг манай һургуулида үгтөө. Хэдэн жэл соо энэ мүнгэ абахаяа шамдаабди, - гэжэ Цырегма Базардашиевна хөөрэнэ. – Энэ туһаламжын ашаар бидэ евросонхонуудые табяабди. Хажуу талахи ханаяа дулаалаабди. Мүн тиихэдэ дулаасуулгын соргонуудые һэлгэжэ, спортымнай танхим соо дулаан болоо. Үбэлэй янгинама хүйтэндэ эндэ һорилго хэхэнь аргагүй байгаа. Харин мүнөө зосоонь 22-23 градус дулаан байна.

Северобайкальскын ДЮСШ-да зургаан спортын зүйлөөр үхибүүдые һоридог. Уран һайханай гимнастика, мини-футбол, самбо, баскетбол, санаар урилдаан болон боксдо 500 гаран хүбүүд, басагад ябана гээшэ. Тэдэниие 12 һоригшод бэлдэнэ гээд хэлэхэ шухала. Цырегма Дандаровагай хэлэһээр, һүүлэй хэдэн жэлдэ залуу мэргэжэлтэд хүдэлхэеэ ерэһэниинь баясамаар байна. Тус һургуулида бэеэ һориһон зарим үхибүүд һоригшын мэргэжэл шэлэжэ, гэдэргээ бусаһандань һайшаалтай.

Северобайкальск хотын тамиршад Буряад Уласай мүрысөөнүүдтэ ехээр хабаададаггүй бшуу гэжэ зунай спортын хүдөөгэй наадануудай һүүлээр Тамирай болон залуушуулай яаманай мэргэжэлтэд тэмдэглээ. Энээндэнь хэдэн шалтагаан олдохо юм. Гол шалтагаан гэхэдэ, харгын сэн болоно. “Манай хото хэды Улаан-Үдэһөө холошье һаа, эдир тамиршадаа Буряадай чемпионадуудта эльгээхэеэ оролдодогбди”, - гэжэ һургуулиин директор мэдүүлнэ.

Гэхэтэй хамта, республиканска түхэлэй мүрысөөнүүд энэ һургуулиин дэргэдэ үнгэргэгдэжэл байдаг. 2016 оной эхиндэ уран гимнастикаар Буряад Уласай чемпионат Северобайкальск хотодо үндэр хэмжээндэ эмхидхэгдээ.

Хэды тиигэбэшье, хойто зүгэй хотын тамирша үхибүүдэй холо, ойрын мүрысөөнүүдэр ябахадань, Улаан-Үдыншье хүүгэд нэгэ бага атаархана ёһотой. Футболоор һоригшо Вячеслав Щипицынэй хэлэһээр, Северобайкальск хотын эдир футболистнууд Сочи, Санкт-Петербург, Саха-Яхад Улас, Амарай болон Эрхүүгэй можонуудта, Красноярска хизаарта болоһон мүрысөөнүүдтэ хабаадалсана. Һүүлэй байдалаар, гурбан бүлэг футболоор бэеэ эндэ һорино.

Хойто зүгэй уран һайханай гимнаст басагад улас дотороо мэдээжэ юм. Северобайкальск хотын һургуули Буряад Уластаа эгээл шанга һургуулинуудай нэгэн гээд дэмы тоологдодоггүй бшуу.

- Манай басагад бэрхэнүүд даа. 2015-2016 һуралсалай жэлэй үедэ дүрбэн басагаднай спортын мастерта кандидат болоо. Мүн тиихэдэ хэзээб даа, энэл зал соо багаһаа хойшо һорилго хэһэн басагаднай гэртээ бусаад, иимэ һайн дүн харуулхадань, ехэ һайн байна, - гэжэ Цырегма Базардашиевна омогорхон хөөрэнэ.

Северобайкальск хотын захиргаан уран һайханай гимнастнуудай һайн дүн харуулһанай түлөө ехэ туһаламжа үзүүлжэ байдаг. Дэлхэйн чемпионадуудта, Олимпиин наадануудта таарама шэнэ хибэс тэдэ һургуулида дамжуулаа.

Бокс хадаа Северобайкальск хотодо 1976 онһоо хойшо хүгжэжэ эхилээ. Мэдээжэ һоригшо, уласхоорондын классай судья Баир Цыренович Дандаровай хэлэһээр, БАМ барилсаһан түрүүшын эдэбхитэн боксын секци Северобайкальск хотодо нээһэн түүхэтэй.

- Үшөө 1976 ондо боксёрско ринг манай хотодо хэншьеб даа асараад, соёлой байшан соо тэрэнь бог шоройдо, тооһондо дарагдаад хэбтээ. Хэншье тэрэ ринг байна гэжэ ойлгоогүй. Табан жэлэй удаа энээниие Борис Жилин обёоржо, үхибүүдые шэнэ ринг дээрэ боксдо һургажа эхилээ. Тэрэ гэһээр манай ринг хуушараа, хэдэн дахин заһаабди. Мүнөө сагта заһахашье һуури тэндэ үлөөгүй. Энэ ушараар Буряад Уласай Арадай Хуралай депутат Валерий Иванович Назаровта хандаһан байнабди. Үхибүүдэй спортдо һайнаар хандадаг депутат бидэниие ойлгожо, боксёрско ринг бэлэглээ. Намартаа тэрээн дээрэ һорилго хэжэ эхилхэбди, - гэжэ һоригшо Баир Дандаров баяраа мэдүүлнэ.

Северобайкальск хотодо боксоор дүрбэн мүрысөөн болодог юм. Баир Цыреновичэй хэлэһээр, август һарада рингэеэ Байгалай эрьедэ табижа, үхибүүдые һорилгын майханай лагерь байгуулха түсэб байна. БАМ-ай харгын захаар оршодог нютаг можонуудай олон тамиршад эндэ һорилго гарахаяа мэдүүлэнхэй. Һорилгын һүүлээр багахан мүрысөөн болохо юм.