Оросой суглуулагдамал командын Олимпиин наадануудта мүнгэн медаль абаһанай удаа, һур харбалгын талмайнууд дээрэһээ мэдээсэлнүүд тон һонирхолтой болонхой. Эгээл тэрэ «мүнгэн» командын бүридэлдэ оролсоһон Инна Степанова Московско можодо шан абаба.
Паралимпиин наадануудта ошожо шадаагүй Оросой тамиршадта өөһэдын мүрысөө гүрэнэй засаг түрэ баригшад эмхидхээ. Һур харбагша Сергей Хутаков эндэ алтан медальда хүртэбэ.
2016 оной зунай халаанай һүүлшын мүрысөөнүүд Якутск болон Улаан-Үдэ хотонуудта үнгэрһэн байна. Эдэ бүгэдэ тухай хөөрэхэмнай.
Паралимпиадада хабаадажа шадаашьегүй һаа...
Бразилиин Риодо үнгэргэгдэжэ байһан Паралимпиин наадануудта Оросой бүхы тамиршадые оруулбагүй. Хэды тиигэбэшье, тусхай мүрысөөнүүд эрэмдэг бэетэй тамиршадай дунда сентябриин 8-10-най үдэрнүүдтэ болоһон байна.
Энэ хэмжээ ябуулганууд “Новогорск” болон “Озеро Круглое” гэһэн һорилгын түбүүдтэ үнгэргэгдөө. Оросой паралимпиин суглуулагдамал командын бүридэлэй бүхы 266 хүн спортын талмайнууд дээрэ гараа. Эдэ Оросой 55 можо хизаарнуудые түлөөлнэ гээшэ.
Манай Буряадай Сергей Хутаков һур харбалгын мүрысөөндэ хабаадалсажа, түрүү һуури эзэлээ.
Описание: Сергей Хутаков
“Микст” гэһэн мүрысөөндэ Сергей Хутаков Ирина Российскаятай харбажа, Бато Цыдендоржиев Маргарита Сидоренко хоёрые финалда 6:2 гэһэн тоотойгоор шүүгээ.
Командна тоосоондо манай Сергей Хутаков, Антон Запяев болон Бато Цыдендоржиев 70 метр зайда дэлхэйн рекорд тогтоогоо. Оросой суглуулагдамал командын һайн бэлэдхэл хэһые энэ гэршэлнэ. Тиимэһээ, Бразилида ошоо һаа, шангай һуури эзэлхэ аргатай байгаа гээд һанагдана.
Сергей Хутаков хадаа суута Светлана Дугаровна Гомбожаповагай һорилго доро бэлэдхэл хэнэ. Һонирхолтойнь гэхэдэ, өөрөө Светлана Дугаровна 1984 оной Олимпиин наадануудта ошохо аад, политическэ зүрилдөөнһөө боложо, Лос-Анджелеста ошоогүй бэлэй. Тиихэдэ социалис гүрэнүүд өөһэдын мүрысөө эмхидхээ. Эгээл тэндэ Светлана Гомбожапова түрүүлжэ гараа һэн. Хэдэн жэл болоод, иимэ байдал дахинаа дайралдаба гээшэ.
Олимпиин нааданай баяртай сууряан
Һур харбагша Инна Степанова һүүлэй хэдэн жэл соо ганса түрэл Буряадайнгаа нэрэ хамгаална бэшэ, мүн хажуугаарнь Московско можын түлөө мүрысөөнүүдтэ хабаадана гээшэ. Үнгэрһэн долоон хоногой эсэстэ Московско можын губернатор Андрей Воробьев Олимпиин наадануудта шалгарһан тамиршадта тусхай шан барюулһан байна.
Нэн түрүүн, “Московско можын урда габьяатай байһанай түлөө” гэһэн 3-дахи шатын тэмдэгүүд бултанда зүүлгэгдээ. Гэхэтэй хамта, мүнгэн медальда хүртэһэн тамиршадта 700 мянган түхэригэй шан барюулагдаа.
Олимпиадада Московско можын тамиршад 8 алтан, 4 мүнгэн ба 4 хүрэл медальнуудые абаа гээд хэлэхэ шухала.
Зунай халаанай һүүлшын мүрысөөнүүд
“Саха-Яхадай бриллиантова годлинууд” гэһэн уласхоорондын мүрысөөн хоёрдохи жэлээ Якутск хотодо сентябриин 2-5-най үдэрнүүдтэ болоһон байна. Буряадаймнай тамиршад тэндэ хүрэл хоёр медаль абажа шадаа.
Казахстан, США, Дани, Германи, Беларусь гүрэнүүдэй болон Оросой хэдэн регионуудай харбагшад түрүү һуури эзэлхын тула мүрысөөндэ хабаадалсаа.
Эрэшүүлэй дунда гурбадахи һуури Баир Цыбекдоржиев эзэлээ. Мүн эхэнэрнүүдэй дунда манай Татьяна Бильтрикова хүрэл медальда хүртөө.
Үсэгэлдэр Улаан-Үдэдэ Россиин Кубок эхилһэн байна. Бүхы дээрээ мүрысөөндэ 250 гаран тамиршад хабаадана. Эндэ Буряад Уласые 130 хүн түлөөлнэ гэжэ хэлэхэ хэрэгтэй.
Һур харбалгаар гүрэнэй һоригшо Эрдэм Жигжитовэй хэлэһээр, тус мүрысөөн 2020 ондо Токио хотодо болохо Олимпиадын шэнэ халаанай эхи табиба.
Мүнөөдэр командна тоосоондо түрүү һуури эзэлэгшэд элирхэ. Харин үглөөдэр хубиин тоосоондо Россиин Кубогта хэн хүртөөб гэжэ мэдэхэбди.