​Валерий Доржиевай нэрэ алдар сагааруулагдаба

Буряад зониие баясуулха шадалтай һайн мэдээсэл Якутск хотоһоо соностобо. Саха Яхад Уласай Дээдэ шатын шүүлгэ Буряад Уласай Арадай Хуралай һунгамал, бэеын тамирай «Номто» клубай юрэнхы захирал Валерий Пурбуевич Доржиевай олон жэлэй туршада мүрдэгшэдэй ябуулһан хэрэгээр сагааруулагдаһан тухай шиидхэбэри сентябриин 19-дэ гаргаба.

Валерий Доржиев эдилгэ нэхээ, засагай газарай тушаалтанай эрхые хазагайруулаа гэжэ гүрэнэй прокуратура зэмэлдэг байгаа. Зургаан жэлээр буряад арадай һунгамалые түрмэдэ һуулгаха, 100 сая түхэригэй ялада унагааха зорилготой шууяатай хэрэг одоол түгэсэжэ, үнэн худал хоёр сохом илгагдаба. Гүрэнэй шүүгшэ Игорь Верхотуров хардагшадайшье, хамгаалагшадайшье тала шагнахыса шагнаад, шэнжэлхысэ шэнжэлээд, Валерий Пурбуевичые сагааруулха тухай шиидхэбэри гаргаһан байгаа. Теэд хара һанаанай далда хэлсээтэн хуурмаг мэхэ хэрэглэжэ, дээдэ шатын зиндаатай шүүгшэдтэ сэхэ хандаһан байгаа. Гэбэшье, үнэн хэрэг зүб мүрөөр бүтэжэ, Яхад Уласай Дээдэ шатын шүүбэриин 3 шүүгшэ Валерий Доржиев ямаршье гэмгүй байна гэжэ үшөө дахин гэршэлбэ. Зэмэлэгдэгшэ үе сагтаа үндэр тушаал эзэлдэггүй байгаа гэжэ эли болоо. Иимэ оршон байдалда Буряад Уласай Арадай Хуралай һунгамал Валерий Доржиевай үнэн нэрэ сагааруулагдаба.