726
Байгша 2016 ондо Хүдөө ажахын шэглэлэй һуралсалай эмхинүүдтэ хүдөө ажахын техникэ шэнэлэлгын хэрэгтэ 500 сая түхэриг гүрэнэй Хүдөө ажахын яаман һомолһон байна. Ородой Холбооной социальна эдэй засагай (социально-экономическа) тогтонижоһон байдал хангаха зорилготойгоор энэ үйлэ Засагай газарта баталагдаба. Иигэжэ оюутад шэнэ үеын техникэтэй ажаллажа һураха аргатай болобо гээшэ.
500 сая түхэригэй хубаарилга Хүдөө ажахын дээдэ һуралсалай эмхинүүдэй “Агроинженерия” гэһэн таһагта очно түхэлөөр һурадаг оюутадай тооһоо, өөрын мэдэлэй хүдөө ажахын газарай хэмжүүрһээ дулдыдана гэжэ хэлэлтэй.
2016 оной мартын 25-да баталагдаһан Ородой Холбооной засаг түрын баталһан 501-дэхи дугаарай Тогтоолой ёһоор хүдөө ажахын техникэ бүтээдэг шэглэл дэмжэлгын хэмжээндэ инженернэ таһагай бааза шэнэлэгдэхэ аргатай болоо.
Тус тогтоолой хүсэндөө оруулагдахадань, Буряад Уласай Хүдөө ажахын яаман В.Р. Филипповэй нэрэмжэтэ Буряадай гүрэнэй хүдөө ажахын академиин захиралда тус программада хабаадахыень дурадхаһан байна. Тиигэжэ хүдөө ажахын академи 6 сая 300 мянган түхэриг мүнгэ зөөридэ хүртэбэ.
Бүгэдөөрөө зүбшэжэ, мүнөө үеын түхэлэй комбайн худалдажа абаха гэжэ шиидхэгдээ һэн. Уданшьегүй хүдөө ажахын академи “VECTOR 410” гэһэн хүсэтэй, ехэ арга боломжотой техникэтэй болоо, тэрэнь мүнөө асарагдаад байна. Таряа хуряадаг тус комбайн “Россельмаш” компаниин эгээл һүүлэй үеын түхэлэй, олон үйлэ бүтээдэг техникэ. Тус комбайн дунда зэргын 750 гектар бага гарзатайгаар хуряаха аргатай.
Иигэжэ дээдэ һуралсалай эмхинүүдэй оюутад эрдэм мэдэсэ ганса номоор шудалха бэшэ, харин шэнэ түхэлэй хэрэгсэлнүүдые хэрэг дээрэ туршажа, ажаллажа һураха аргатай болобо гээшэ.
Сүлжээ холбоонһоо фото-зураг абтаба.
Автор: Цырегма САМПИЛОВА
