​Суута Кобзоной заншалта мүрысөөн

СССР-эй арадай артист Иосиф Давыдович Кобзоной шанда хүртэхын түлөө боксоор бүхэроссиин мүрысөөн Ага һууринда үнгэрһэн долоон хоногой дүрбэн үдэр соо үргэлжэлбэ. Тус хэмжээндэ Буряадай боксёрнууд юһэн медаль абажа шадаа.

Автор: Агын тойрогой захиргаанай сайтһаа абтаһан фото-зураг

Описание: Буряадай боксёрнууд юһэн медаль шүүгээ

Энэ мүрысөөн аяар 13-дахияа эмхидхэгдээ гээд тэмдэглэлтэй. Ородой Холбооной долоон можо хизаарнуудай тамиршад суглараа. Эндэ Монголой болон Хитадай залуу боксёрнууд ерэжэ, мүрысөөн бүри һонирхолтойгоор үнгэрбэ.

Ага ерэһэн хүндэтэ айлшадай дунда Олимпиин хоёр дахин чемпион болоһон Алексей Тищенкые нэрлэмээр байгаа. Тэрэ тойрогой үхибүүдээр уулзажа, һонирхолтой хөөрөө эмхидхээ.

Харин ринг дээрэ ганса хүбүүд гараа бэшэ, мүн басагадшье шаасалдаба. 51 килограмм хүрэтэр шэгнүүртэ Буряадаймнай Кристина Серебрякова болон Екатерина Грати хоёр хүрэл медальнуудые абаа. Басагадай дунда Үбэр Байгалай хизаарай болон Монголой хоёр тамиршад түрүүлжэ гараа.

Харин бүһэтэйшүүл хоёр алтан медальда хүртэбэ. Альберт Гатаулин болон Сергей Горда гэгшэд түрүү һууринуудые эзэлжэ, олон тоото аха дүүнэрээ, спортдо дуратайшуулые баясуулба.

Мүнгэн медаль шүүһэн Алдар Ошоров Амгалан Цыренов хоёрые нэрлэмээр. Амгаланай финальна уулзалга мүрысөөнэй эгээл гоё тулалдаан гэжэ тоологдоо. Тэрэ Үбэр Байгалай хизаарай Эльдар Мудаевтай тэмсээ.

Радна Цыбиков, Николай Грищук болон Максим Парфёнов гэгшэд гурбадахи һууринуудые эзэлээ.

Илалтада эрмэлзэһэнэй түлөө тусхай шанда Буряадаймнай Игорь Горюнов хүртөө. Хитадай Ван Кзи Сян мүрысөөнэй эрхим боксёр гэжэ тодороо.

Буряад Уласай болон Эрхүүгэй можын тамиршад юһэ-юһэн медаль абаһан байна. Үбэр Байгалай хизаарай боксёрнууд долоон медальда хүртөө. Тиихэдэ Хабаровска хизаарайхид зургаан шангай һуури эзэлээ.