​Амгалан тайбаниие хүсэнэб тандаа...

Наһажаал зоной Уласхоорондын үдэрые угтуулан, Буряад Уласай Ветерануудай соведэй Түрүүлэгшэ, Россиин Журналистнуудай холбооной гэшүүн Р.Б.Гармаевтай тобшохон хөөрэлдөө хэбэбди.

- Ревомир Баярович, Наһажаал зоной үдэрөөр нэн түрүүн өөрыетнай амаршалая. Арбан хоёрдохи жэлээ эсэлтэ сусалтагүй Ветерануудай соведые толгойлжо, хүндэтэй, харюусалгатай үүргэ дүүргэжэ  ябанат...

- Шадалтай дээрээ ябагданал даа гэхэһээ ондоо юун байхаб. Һүүлэй үедэ манай эмхи яһала олон, удха шанартай хэмжээнүүдые бэелүүлээ гээшэ. 2009 ондо “Ветераниие шагнагты”, Илалтын һайндэрэй жэлдэ «Дайнай үхибүүд хөөрэнэ” гэһэн конкурснуудые үнгэргөө һэмди. Мүнөө жэлдэ “2016-2020 онуудта Россиин Федерациин эрхэтэдые патриотическа талаһаа хүмүүжүүлгэ” гэһэн программатай зохилдуулан, “Түрэл оромнай оршон байгаа һаа...” гэһэн конкурс соносхобобди.

Илалтын һайндэртэ “Дурасхаалай номой” 10-дахи боти гаргагдаа, үшөө 10 мянган нэмэлтэ нэрэ оруулагдаа. Д.М.Цыреновэй “Буряадай батарнууд” гэһэн ном дүрбэдэхеэ шэнэлэн хэблэгдэбэ. “Дайн тухай дурасхаал” гэһэн фотоальбом, уран зохёолшо Михаил Шихановай «Хилээмэнэй карточка» гэһэн дайнай үеын багашуул, эдиршүүл тухай ном, Сергей Ямановай “Илалтын годлинууд” гэһэн Онохойһоо дайнда мордоһон сэрэгшэдэй дайшалхы зам тухай ном хэблэгдээ юм. Тиихэдэ Данри Хилтухин Африкан Бальбуров хоёрой дайнай баатар Гуржап Очиров тухай ном шэнээр толилогдобо.

- Шэнэ үеын зондо, эдиршүүлдэ дайн тухай мэдээсэл илангаяа шухала хэрэгтэй ааб даа...

- Иимэл зорилготойгоор Буряад оронһоо урган гараһан Советскэ Союзай 6 баатарай дурасхаалда баяр ёһолол үнгэргэгдөө гээшэ. Зэдын аймагайхид Брест хото ошожо, нютагайнгаа баатар сэрэгшэ Гармажап Гармаевай дурасхаалые ёһолжо ерээ. Һая, сентябриин 16-да, Кабанскын аймагай Селенгинск һууринайхид дайшалхы Алдар Солын дүүрэн кавалер П.А.Поповой дурасхаалые хүндэлэн ёһолоо. Үнгэрһэн жэл Советскэ Союзай баатар М.И.Котовой мүнхэ дурасхаалда ёһолол үнгэргэгдөө юм. Иигээд тоолоо һаа, олон даа, хүмүүжүүлхы удхатай хэмжээ ябуулганууднай.

- Наһажаал зон заримдаа залуушуулһаа эдэбхитэй. ТОС-уудай хүдэлмэридэ хабаадана. Бэеэ һорихо, элүүржүүлхэ талаар – түрүү зэргэдэ. Скандинавска гуримаар ябалга гээшэ эдэнэйл хүсөөр дэлгэрээ ха юм.

- Зүб даа. Тоо, баримтанууд юу гэршэлнэб гэбэл, ТОС-уудай эдэбхитэдэй бүридэлдэ 70 процентнь – ветеранууд юм. Харин элүүржүүлгын зүргэдэ гараашад жэлһээ жэлдэ олошорно. Юрэнхыдөө, наһаяа утадхаха, үхибүүдтээ, аша гушанартаа туһатай байха гэжэ аһан оролдоно. Олимпиадада хабаадаха делегациин Рио-де-Жанейро ниидэн ошоходонь, холын Хурамхаанай аймагайхид – аяар 400 пенсионер уласай спартакиадада хабаадажа, нютагайнгаа басаган Инна Степановада үндэр амжалта хүсөө һэн. Иимэрхүү жэшээнүүд урма зориг бадараана даа.

- Ревомир Баярович, өөрөө сэтгүүлшэ, “Буряад үнэн” сониной редактор ябаһан хадаа суг хүдэлһэн зоноо дурдадаг лэ ёһотойт.

- Эгээл һайхан дурсалганууд “Буряад үнэн” сонин тухай юм. Сониноо суг гаргадаг байһан нүхэдтөө үнэн сэдьхэлэй талархалаа мэдүүлжэ ябадагби. Илангаяа наһатайшуулаа дурдаагүйдэ аргагүй. Б-М.Ж. Жигжитов, Ц.Б. Содномова, М.Д. Намжилов, Е.Д. Раднаева, Е.М. Зомонова, Д.Р. Жамсаранова, М.Д. Дашанимаева, Т.Н. Нимбуев, Б.Н. Жанчипов, Е.Д. Бадмаева, Н.А. Хазуев, Г.Г. Цыренова, Ц.Р. Бурхинова, Н.Д. Бадмаринчинов, эдэнэй хажууда залуубтар үе – Б.Д. Орбодоева, Т.В. Самбялова, Г.А. Доржиева, Л.Л. Цыденова, Т.Р. Дугданова, А.Ц. Цыренова, Ц.Б. Гуродармаева, Д.Ч. Гомбоева болон бусадшье нүхэдтөө һанаандаа ходол һайниие хүсэжэ ябадагби даа. Редакциин ажалай хүлгөөн шангал һэн, мүнөө һанахадам, ондоо ямаршье ажалһаа орёо, харюусалгатай мэтэ, теэд хуу үрдеэд-хээд ябадаг эршэтэй шиираг хаһамнай бэлэй даа. Мүнөө жэл сониноймнай 95 жэлэй ой гүйсэхэнь гэхэдэ, сэдьхэл бодолдо һайхан лэ бодолнууд түрөө ёһотой хүн бүхэндэмнай.

Наһажаал зоной үдэрөөр, Буряадай бүхы ветеранууд, сэтгүүлшэ нүхэдни. Элүүр энхэ, амгалан тайбан, ухаан бодол һонор, үри хүүгэдтээ ашатай туһатай ябахамнай болтогой!