​Этигэлэй Хамба өөрөө бодоод ябаа гү?

Энэ гарагай хоёрто интернедэй “Facebook” гэһэн бүлгэм соохи өөрынгөө хуудаһан дээрэ үзэгдөө дуулдаагүй һони Ородой Буддын шажантанай заншалта Сангхын Бандида Хамба лама Дамба Аюшеев дуулгаба.

“Этигэлэй Хамба ордон соогуураа ябажа байна. 2016 оной октябриин 9-нэй үдэшын 20.05 сагта энэнь видео-буулгабари дээрэ элеэр харагдаба. Этигэлэй Хамба лама өөрын Ордондо орохо үүдэнэй дэргэдэ ерээд, хоёр гартаа тулам баряад байна. Иигэжэ анха удаа эли үзэгдөө”, – гээд Хамба бэшэһэн байха юм.

Автор: Интернедэй “Facebook” гэһэн бүлгэм соохи Хамба лама Дамба Аюшеевэй хуудаһанһаа абтаһан гэрэл зурагууд

Описание: Түрүүшын гэрэл зураг дээрэ 18.43 сагта Этигэлэй Хамба өөрынгөө һуурида байһан һаа, 20.05 сагта үүдэнэй хажууда зогсожо байна

Үнэхөөрөө болоһон юм һаа, энэ ушар ямар шалтагаантайб? Орон нютагтаа, гүрэн түрэдөө, арад зондоо юун гэжэ агууехэ Этигэлэй Хамба дуулгахаа һанаба гээшэб? Һайн юумэ зүгнэжэ, ордон соогуураа бодоод гэшхэлбэ гээшэ гү, али муу юумэн тухай манда дуулгаха хүсэлэнтэй гү? Шабар бэень бэшэ, һүүдэр юм гү, али ухаан бодолойнь хүсэн хүнэй нюдэнһөө болохо, видеокамерада харагдаха гэжэ бодоо гү? Эдэ болон бусад олон асуудалнууд һүзэгтэй, һүзэгшьегүй хүнүүдэй толгойдо түрэнэ ёһотой.

Үсэгэлдэр Хамба лама Дамба Аюшеевтэ эдэ асуудалнуудаар хандахадаа, тайлбарииень арад зондоо дуулгаха хүсэлэнтэйгөө мэдүүлбэбди.

– 2010 онһоо хойшо Этигэлэй Хамбын ордондо видео-буулгабари үдэр һүнигүй хэгдэжэ байдаг болонхой. Тэрэ гэһэн сагһаа хойшо Этигэлэй Хамбын ордон руу орожо, гаража байһан зониие адаглан хараха арга бии. Тиимэ ушарһаа үдэшын энэ орой сагта ондоо хэншье байжа болоогүй.

- Хүнэй дүрсэдэл адли юумэн үзэгдөө, һүүдэр юм гү, али ондоо юумэн байгаа гү – мэдэхын аргагүй. Нэгэл юумэ би мэдэнэб: Этигэлэй Хамбын өөрынь үүсхэлээр, тэрэнэй шэдитэ аргаар энэ юумэн манда үзэгдөө. Харин юундэ, ямар шалтагаанаар үзэгдэһыень абаһаар тайлбарилжа хэлэхын арга үгы. Арадтамнай ухаатай, сэсэн мэргэн зон яһала олон, бодомжолжо, шэнжэлжэ, шүүмжэлжэ, харюу бэдэрхэ дуратайшуул олдохо, - гэжэ Бандида Хамба лама айладхаа.

1927 оной зургаадахи һарын 15-най үдэр хүдөөлүүлэгдэһэн XII дугаар Бандида Хамба лама Даша-Доржо Этигэловэй Эрдэни мүнхэ бэе 2002 ондо бусан ерэжэ, гансашье Буряадыемнай бэшэ, бүхы дэлхэйн олониитые ехэтэ гайхуулһан юм гээд һануулая. Тэрэ жэлэй сентябриин 10-да бумхан сооһоо бусажа гарахадань, наринаар шэнжэлдэг мэргэжэлтэд үзөөд, Эрдэни мүнхэ бэеые тусхай аргаар хадагалжа дараагүй, элдэб эсын юумэ түрхеэгүй гээд онсолон тэмдэглээ һэн.