Октябриин 10-ай байдалаар, Буряад Уласта малтагдаха хартаабхын түсэбэй 98 процентнь хүсэбэ, харин хуряагдаха огородой эдеэнэй түсэбэй 83 процентнь бэелүүлэгдээд байна.
Гандаһан газараа уһалһан таряашан ургаса хуряана
Буряад Уласай Хүдөө ажахын болон эдеэ хоолой яаманай сайдай орлогшо Пётр Брыков иигэжэ мэдээсэбэ:
- 13,7 мянган гектар газарта таригдаһан хартаабха хуряагдаба. Харин 2,1 гектар талмай эзэлһэн огородой эдеэн хадагалагдадаг газартаа оруулагдаба. Хуурай газар уһалха, шиигтэй газар хатааха талаар ажалай һэргээгдэһэнэй ашаар ган гасууртай энэ жэлдэ хартаабха һайнаар ургаба. Огородой эдеэншье эртүүр хосороогүй.
Хүдөө ажахын үйлэдбэринүүд таряалангаа уһалхын тула горитой ажал ябуулна. Ивалга, Мухар-Шэбэр, Байгал шадарай болон Буряадай бусад аймагуудта хуушарһан, эбдэрһэн соргонууд урилагдажа, шэнээр татагдана. Шадалтай ажахынуудай эзэд газар һэндэжэ, худаг малтуулна. Тариһан ургамалаа дулаахан уһаар уһалхын тула зунай наранай шанга элшэдэ хүйтэн уһанай халаха томо-томо амһартанууд тодхогдоо. Таряашанай мүнгэ үрэбхигшэ зайн галаар газарай гүнһөө һорожо абаһан уһаяа алмахын тула дуһал-дуһалаар уһалдаг оньһонуудые хүдөөгэйхид нэбтэрүүлнэ. Иимэ хүдэлмэри дээрэ дурдагдагша ажахынуудта һүүлэй гурбан жэлэй туршада сохом ябуулагдажа байна.
Малай тэжээлдэ горитой анхарал
Үхэр малаа һайнаар ондо оруулхын тула үбһэ асалаад үгэхын хажуугаар амта шэмэтэй тэжээл үе үе болоод лэ үгэжэ байбал зүйтэй. Тиимэһээ тэрэ тэжээлынь эгээл мүнөө бэлдэгдэжэ байна гээшэ.
- Буряад Уласай бүхы аймагуудай хүдөө ажахын таһагуудай согсолдог тоо, баримтануудые абажа харахадамнай, мал баридаг ажахынууд дүн хамта 605 мянган тонно бүдүүн болон шэмэтэ тэжээл бэлдэжэрхёод байна. Нёдондоной тоо, баримтануудтай зэргэсүүлхэдэ, энэ жэлдэ 125 процентээр ехэ тэжээл малдаа нөөсэлөөбди, - гэжэ Пётр Брыков тэмдэглэнэ.
Орооһото ургамалнууд тушаа
Орооһото ургамалнууд энэ жэлдэ ган гасуурһаа нилээн хохидобо. Тиин энэ талаар онсо байдал Буряадай 14 аймагта соносхогдоһон байгаа. Тиин 42,2 мянган гектарта хаяһан үрэһэн үндэһөөрөө хатажа, эзэдээ горитойхон гарзада оруулба ха юм. Юрэнхыдөө үрэһэ хаяһан талмайн 55% процентнь наранда шатаа.
Орооһото ургамалнуудта хабаатай үшөө нэгэ бэрхэшээл бии. Энэ юун бэ гэхэдэ, орооһон нэгэ жэгдээр эдеэшэнэгүй. Таряанай хүсэд эдеэшэхыень хүлеэжэ байһаар, саһанда даруулагшабибди гэжэ шэниисэ таригшад һанаагаа зобоно.
- Бүхэли зунаараа хуурай байһан аад, сентябриин эхилэн сасуу бороо хура орожо, һүйд татаба, - гэжэ Пётр Брыков энэ бэрхэшээлэй шалтагаанииень тайлбарилна. - Хоолостоо байһан орооһоной шанар энээнһээ боложо муудаа. Хабартаа тарилга хэхэдээ¸ үрэһэ хүрэнгэ хаанаһаашьеб худалдажа абаха хэрэг гараха.
Иигэн-тиигэн намарай ургаса хуряалга ябажа байна. Мүнөө дээрээ 8,8 мянган гектар талмай комбайнууд хуряаба. 9,7 мянган тонно орооһон амбаарнуудта хадагалагдаа. Ноябриин эхиндэ 2016 оной ургаса тухай эсэсэй дүнгүүд мэдэгдэхэ.