​Мухар-Шэбэрэй аймагай Сагаан-Нуур тосхондо амбулаториин байшан һэльбэн шэнэлэгдэхэнь

Энээн тухай Буряадай толгойлогшо «СУЭК» компаниин хүтэлбэрилэгшэтэй хэлсэбэ. Вячеслав Наговицын Владимир Рашевскитэй Москвада уулзажа, энээн тухай хэлсэһэн байна. Буряад улас энэ компанитай үнинэй һайн харилсаатай хүдэлдэг. Жэл бүри уулзажа, хоер талын хүгжэлтын асуудалнуудые зүбшэн хэлсэжэ байдагбди. Мүнөө Буряад уласай болон компаниин ерэхэ жэлэй бюджет бүрилдүүлэгдэжэ байна. Тиин ерэхэ жэлэй түсэбүүд тухай хэлсээбди. Тэрэ тоодо Сагаан-Нуур тосхоной социальна инфраструктура хүгжөөхэ асуудалнууд зүбшэгдөө гэжэ Буряадай толгойлогшо мэдүүлээ. Тэрэнэй хэлэһээр энэ тосхондо эмнэлгын хангалга үзүүлхэ асуудал хурсаар табигдана. Эндэхи эмнэлгын газар өөрын байрагүй. Нютагай ажаһуугшад уулзаха бүри амбулаториин шэнэ байшан бариха тухай асуудал табидаг. Мүнөө хамтын аргаар проектыень зохеохо тухай хэлсэгдээ. Тэрэнэй һүүлээр амбулаториие һэльбэн шэнэлэлгэдэ Буряад улас болон компани өөһэдынгөө бюджедүүдһээ адли мүнгэ һомолхо байна.