900
Улаан-Үдэһөө Санкт-Петербург хүрэтэр ниидэхэ биледүүдэй сэн үнэгүй болохонь. Регионууд хоорондохи авирейснүүдые дэмжэхэ тухай Ородой Холбооной Засагай газарай тогтоолдо Улаан-Үдэ – Санкт-Петербург гэһэн шэглэлтэй рейс оруулагдаа.
Тиигэжэ, биледэй сэн 5640 түхэригтэ болохо. Зүгөөр мүнөө дээрээ манай ниислэл хотоһоо Санкт-Петербуг тээшээ агаарай онгосонууд ниидэнэгүй. Харин уласай транспортын яаман энэ авиарейс дахяад ниидүүлдэг болохо тухай дурадхал авиакомпанинуудта эльгээгээ.
Даб дээрээ Буряадай түб Улаан-Үдэһөө Эрхүү, Красноярск, Новосибирск, Благовещенск, Хабаровск, Владивосток, Магадан болон бусад хотонууд руу агаарай онгосонууд ниидэнэ. Гэхэ зуура, хилын саанахи гүрэнүүд руу ниидэдэг рейснууд үсөөн болгогдоо. Улаан-Үдэһөө самоледууд Бээжэн, Манжуур болотор ниидэнэ. Зоной үсөөнһөө боложо, Улаан-Баатар, Сеул руу ниидэдэг рейснүүд саг зуура болюулагдаад байна.
Харин тиихэдэ «ИрАэро» гэhэн авиакомпани Улаан-Үдэhѳѳ Сибириин федеральна тойрогой түб болохо Новосибирск хото руу ниидэдэг шэнэ рейс нээбэ. Сибириин эгээл томо хото ошохонь хоёр дахин бэлэн болобо. Юуб гэхэдэ, hая болотор долоон хоногой нэгэ удаа энэ шэглэлээр агаарай онгосо ниидэдэг бэлэй. «S7» авиакомпани энэ хангалтые гансаараа үзүүлдэг байтараа, мүнѳѳ зэргэлээ хангагшатай болобо гээшэ. Новосибирск руу долоон хоногой хоёр удаа самолёдууд ниидэдэг болохонь.
