971
Улаан-Үдын локомотив-вагон заһабарилгын заводой хүдэлмэрилэгшэд урлан нарижуулгын хэгсэлнүүдые үйлэдбэридөө нэбтэрүүлжэ, байгуулгадаа 10 миллион түхэриг алмаха арга олгоо.
Байгша оной эхинһээ үйлэдбэридэ урлан нарижуулгын 327 хэрэгсэл нэбтэрүүлэгдэһэн байна. Эгээл ашаг үрэтэй хэрэгсэлнүүдые нэбтэрүүлһэн хүнүүд нэмэлтэ мүнгөөр урмашуулагдана. Анхандаа электровозой газаа талыень хари гүрэнһөө асарһан шэрээр будадаг һаа, мүнөө Ород гүрэндэ үйлэдбэрилэгдэһэн шэрэ хэрэглэнэ. Тиигэжэ нэгэ электровоз шэрдэхэдэ гаргашань 271 мянга гаран түхэригөөр бага болоо.
Һарын туршада электровозой гурбан секци заһабарилан гаргадаг байна. Энэ урлан нарижуулгын хэрэгсэлнүүдэй ашаар жэлэй дүүрэтэр 4 миллион шахуу түхэриг алмагдаха зэргэтэй. 2013 онһоо заводто урлан нарижуулгын хэрэгсэлнүүдые абажа эхилээ. Тэрэ сагһаа хойшо участок, цехүүдэй үйлэдбэриин аша үрэ дээшэлүүлхэ талаар хэрэгсэлнүүдые нэбтэрүүлжэ эхилһэн байна.
Автор: Дарима ДОНДОКОВА
