Хубиин олзын хэрэг эрхилэгшэдэй тоо Буряад Уласта һүүлэй 4 жэлэй туршада 10 мянгаар үсөөрбэ. Ушар юуб гэхэдэ, 2009-2011 онуудта хубиин олзын хэрэг эрхилэгшэдэй тоо эрид дээшэлһэн байна. Буряадай Толгойлогшо Вячеслав Наговицынай хэлэһээр, эдэ жэлнүүдтэ ажалгүйшүүлдэ 58 мянган түхэриг хэмжээнэй туһаламжа үзүүлэгдэжэ, тэдэнэр хубиин олзын хэрэг эрхилэгшэдэй тоодо ороһон юм. Энэ хугасаада бүхыдөө 21 мянган эрхэтэд гүрэнэй тэдхэмжэ абаһан байна. Гэбэшье, тэдэнэй хахадынь саашанхи ажаябуулгаяа үргэлжэлүүлжэ шадабагүй. Арадай Хуралай депутат Сергей Пашинскийн һанамжаар, Буряад Уласта банкнуудһаа урьһаламжа мүнгэ абахань бэрхэшээлтэй. Тиимэһээ олзын хэрэг эрхилэгшэд өөһэдынгөө компани болон фирмэнүүдээ бусад регионуудта бүридхэлдэ оруулна гэжэ тэрэ хэлэбэ.