Сагаан һарын баярта зорюулагдаһан хэмжээ ябуулгануудай шугамаар Улаан-Үдэ хотодо февралиин 17-18-най үдэрнүүдтэ «Хуурай наадан-2017» гэһэн уласхоорондын урилдаан үнгэрхэнь.
Тус хэмжээ ябуулгые Буряад Уласай Соёлой яаман, Арадай уран бүтээлэй уласай түб, Бүгэдэ Буряадай үндэһэн соёлой эблэл, Ород гүрэнэй Буддын шажанай заншалта Сангха, П.И. Чайковскиин нэрэмжэтэ Соёл урлагай колледж эмхидхэнэ.
Буряад арадай хүгжэмэй зэмсэгүүд дээрэ наадагшадай, тэдэ зэмсэгүүдые бүтээхэ уран гартанай тоо олошоруулха, бэлиг шадабарииень мүлин дээшэлүүлхэ гэhэн гол зорилготой энэ наадан табадахияа үнгэргэгдэхэнь.
«Хуурай наадан-2017» гэһэн наадан-урилдаанда сууха хуур, хуур, морин хуур, хучир, лимбэ, суур, эбэр бүреэ болоод бусадшье буряад хүгжэмэй зэмсэгүүд дээрэ наадаха дуратайшуул, мэргэжэлтэ гүйсэдхэгшэд, ансамбльнууд хабаадаха юм.
Мүнөө жэлэй урилдаанда шэнэ нэрлэгдэһэн заабаринууд (номинацинууд) нэмэгдээ. Эдэ хоёр шэнээр нэрлэгдэһэн заабарида мэргэжэлтэ хүгжэм найруулагшад болон хүгжэм зохёохо дуратайшуул бэшэһэн зохёолнуудаа, тиихэдэ зэмсэг дархалдаг урашуул бүтээлнүүдээ харуулха юм.
Һайшаалтайнь гэхэдэ, нааданда хабаадаха дуратайшуулай тоо жэлһээ жэлдэ олошорно, илангаяа мүнөө жэлдэ зэмсэг бүтээгшэдэй тоо олон болоо. Тиихэдээ энэ наадан-урилдаанай арадтаа хэрэгтэй, холын хараа бодолтой байһан элирнэ.
Урилдаанай нэгэдэхи шата П.И. Чайковскиин нэрэмжэтэ Соёл урлагай колледждо 2017 оной февралиин 17-до үнгэрхэ.
Түгэсхэлэй тоглолто февралиин 18-да Х. Намсараевай нэрэмжэтэ Буряад драмын театрта болохо. Энэ тоглолтодо урилдаанай илагшад, тиихэдэ мэдээжэ хүгжэмшэн Балданцэрэнэй Баттүвшин болон бусад хүгжэм дуунда абьяастайшуул бэлиг шадабарияа дэлгэжэ, харагшадай шэхэнэйнь шэмэг, нюдэнэйнь хужар болохо, сэдьхэлыень баярлуулха гэжэ дуулгая.
Наадан-урилдаан тухай дүрим болон бусад мэдээсэл Буряад Уласай Арадай уран бүтээлэй түбэй (РЦНТ) Интернет сүлжээнэй www.байкалфолк.рф. гэһэн сайтда орожо харахада болохо.