​Хүдөөгэй спортын нааданууд Мухар-Шэбэртэ үнгэргэгдэхэ

Буряад Уласай хүдөөгэй үбэлэй спортын нааданууд Мухар-Шэбэр аймагта мартын 1-4-эй үдэрнүүдтэ үнгэргэгдэхөөр хараалагдана. Эндэ түрүү һуури эзэлһэн хүдөөгэй аймаг автомашинада хүртэхэ юм.

Түгнын үргэн талада спортын табан зүйлөөр мүрысөөн болохо юм. Санаар урилдаан, бүмбэгэтэй хоккей, конькигаар урилдаан, үбэлэй ГТО (санаар урилдаан, бэеэ үргэлгэ, пневматическа винтовкоор буудалга) болон зүг шэг тодорхойлолго – иимэнүүд янзануудаар Буряад Уласай бүхы 21 хүдөө аймагууд мүрысэхэ юм.

- Энээнэй урда тээхи наадануудта ша­тар, даам наадалга болон теннис оруулаг­дадаг байгаа. Харин мүнөө мүрысөөнүүд гансал спортын үбэлэй зүйлнүүдээр үнгэргэгдэхэ. Юуб гэхэдэ, Сэлэнгэ аймагта эмхидхэгдэһэн урдахи наадануудай удаа болоһон хэдэн суглаануудта олонхи айма­гуудай түлөөлэгшэд “үбэлэй нааданууд ха­даа ёһотой үбэлэй болог лэ!” гэжэ дурадхал оруулһан юм, - гэжэ Буряад Уласай Спор­тын болон залуушуулай хэрэгүүдэй яама­най таһагые даагша Баяр Дашибальжиров хөөрэнэ.

Мухар-Шэбэр аймагта тус нааданда хабаадагшадые мүнөөшье угтахаар бэ­лэн гэжэ хэлэхэдэ болохо. Сагаан-Нуур һууринда санаар урилдаанай зүргэнүүд һайнаар бэлдэгдэнхэй. Манай мэдээ­жэ һоригшо, һаяхан спортын уласхоо­рондын классай мастерай нэрэ зэргэдэ хүртэһэн Алиса Жамбаловагай аба Саян Владимирович аша үрэтэйгөөр энэ ажал бүтээгөө.

Мүн тиихэдэ Мухар-Шэбэр һууринай 2-дохи һургуулиин стадион һэльбэн шэнэ­лэгдээ. Эндэ тусхай һууринуудтай трибу­на, тамиршадай амарха, хубсаһа хунараа һэлгэхэ таһалганууд түхеэрэгдээ.

Эдэ үдэрнүүдтэ Буряад Уласай Спортын болон залуушуулай хэрэгүүдэй яаманай мэргэжэлтэд, спортын зүйлнүүдэй ахамад шүүгшэд бэлэдхэл шалгажа, һайн сэгнэлтэ үгэһэн байна.

Һая баригдаһан соёлой байшан соо на­аданай соёлой талаар хэмжээ ябуулганууд болохоор хүлеэгдэнэ.

Мүнөө сагта Мухар-Шэбэр аймагай бүхы һууринуудта нааданууд тухай хүн зон һайнаар мэдэнхэй. Ушарынь гэхэдэ, на­аданай галай эстафетэ эмхидхэгдээ. Тэндэ ганса тамиршад бэшэ, мүн хүдөө нютагай ажалшад, хонишод, таряашад болон бусад ажалшад хабаадалуулагдана.

Мартын 1-4-эй үдэрнүүдтэ үнгэрхэ на­адануудта спортдо дуратайшуулые булты­ень уринабди.