Буряад угсаатанай анхан сагһаа ажамидардаг нютагууд сооһоо эгээл үндэр гэжэ тоологдодог Аха аймагта Гал Улаагшан Тахяа жэлэй Сагаан һарын шэнын хоёрто Бүгэдэ Буряадай хии морин хиидхүүлэгдэхэнь.
Ород гүрэнэй Буддын шажантанай заншалта Сангхын XXIV Бандида Хамба лама Дамба Аюшеевэй шиидхэбэреэр анха түрүүшынхиеэ арадаймнай энэ ехэ һүлдэ тэмдэг Аха аймагта нёдондо жэл хиидхүүлэгдэһэн юм. Тиихэдэ аймагай хоёр дасанай түлөөлэгшэд Ивалгын дасанай ламанартай хамтаржа, ехэ ном бүтээһэн байна.
Энэ удаа мүн лэ буянтай иимэ үйлэ хэрэг бүтээгдэхэеэ байна. Арад зондомнай удха шанар ехэтэй энэ хэмжээ ябуулга тухай бүгэдэ арадай “Буряад үнэн” сониной удаадахи дугаарнуудай нэгэндэ уншажа болоно.