Гүрэнэй Дүүмын һунгамал Алдар Дамдинов СССР-эй арадай дуушан Иосиф Кобзондо “Буряадай түрүү хүнүүд” гэһэн манай сониной мүрысөөнэ й лауреат болоһон тухай үнэмшэлгэ һаяхан Москва хотодо уулзажа барюулба.
- “Буряад үнэн” Хэблэлэй байшанай болон тэрэнэй захирал Баяр Балдановай даабари дүүргээб: “Буряадай түрүү хүнүүд” конкурсын лауреадай “Сагаан үбгэн” номинацида илалта туйлаһан тухай үнэмшэлгэ СССР-эй арадай дуушан, Федеральна Суглаанай Гүрэнэй Дүүмын долоодохи зарлалай һунгамал Иосиф Кобзондо барюулааб. Иосиф Давыдович ехэтэ хүхижэ, баяраа мэдүүлээд, “Буряад үнэниие” өөрөө амаршалхаб гэжэ дуулгаа. Хэблэлэй байшанда амжалтануудые, урагшаа дабшахыень хүсэнэ, - гээд Алдар Дамдинов интернет холбоондохи өөрынгөө хуудаһан дээрэ урда долооной эсэстэ бэшээ.
Арадай дуушанай үбшэлһэнһөө уламжалан, мүнөөл һая энэ шангынь барюулха аргатай болоһоноо Алдар Дамдинов ойлгуулһан байна.
Үбэлэй эхин һарада, декабриин 24-дэ, “Буряад үнэнэй” ойн баярай үдэшэдэ заншалта конкурсын дүнгүүд согсологдожо, Иосиф Кобзон “Сагаан үбгэн” номинациин илагша болоо һэн. Алдарта дуушан, арад зондомнай, илангаяа Ага тойрогтомнай яһала ехэ туһа үзүүлһэн энэ һунгамал тухай материал мэдээжэ блогер, манай сониной штатнабэшэ сурбалжалагша Намжилма Бальжинимаева бэшэһэн байгаа.
Манай суута ахамад редактор, эрдэмэй доктор Ардан Ангархаевай зохёон байгуулһан “Буряадай түрүү хүнүүд” мүрысөөн урда жэл хоридохиёо үнгэргэгдэһэн байха юм. Илагшадые болон авторнуудые хүндэлэн ёһолхо хэмжээ ябуулга улас түрын үндэһэн “Буряад үнэн” сониной 95 жэлэй, гүрэнэй “Бурятия” сониной 25 жэлэй, мүн тиихэдэ Хэблэлэй байшанай байгуулагдаһаар 15 жэлэй ойн баярнуудтай тудашоо. Тиимэ ушарһаа эдэ бүхы ойн баярнуудые нэгэ мүһэн тэмдэглэхэ шиидхэбэри абтаһан байгаа.
Хэзээ яагаад манай Хэблэлэй байшаниие суута дуушан Иосиф Кобзон амаршалха түсэбтэй байгаа юм, мэдэгдэнэгүй. Ябан ошон, саг харуулна бэзэ.